ក្រសួងការពារជាតិកូរ៉េខាងត្បូងថ្លែងកាលពីថ្ងៃទី១០ កុម្ភៈថា សមយុទ្ធយោធារួមប្រចាំឆ្នាំរវាងកូរ៉េខាងត្បូង និងសហរដ្ឋអាមេរិក នឹងប្រព្រឹត្តទៅរវាងថ្ងៃទី២៤ កុម្ភៈ ទៅថ្ងៃទី១៨ មេសា ទោះបីមានការតវ៉ាពីសំណាក់ប្រទេសកូរ៉េខាងជើងក៏ដោយ ។
លោក KIM MIN-SEOK អ្នកនាំពាក្យរបស់ក្រសួងការពារជាតិកូរ៉េខាងត្បូងថ្លែងក្នុងសន្និសីទសារព័ត៌មានមួយថា ទីបញ្ជាការកងទ័ពកូរ៉េខាងត្បូងនិងអាមេរិក នឹងចាប់ធ្វើពីថ្ងៃទី២៤ កុម្ភៈ ទៅថ្ងៃទី៦ មីនា នូវសមយុទ្ធមានឈ្មោះថា KEY RESOLVE ។ លោក KIM បន្តថា សមយុទ្ធយោធានេះរៀបចំធ្វើរៀងរាល់ឆ្នាំដោយសម្ព័ន្ធមិត្តទាំងពីរដែលមានលក្ខណៈការពារ ហើយសំដៅត្រួតពិនិត្យមើលសមត្ថភាពការពាររួមរវាងកងទ័ពកូរ៉េខាងត្បូង និងកងទ័ពអាមេរិក។ ទាហានអាមេរិកប្រមាណជា៥.២០០នាក់នឹងចូលរួមក្នុងសមយុទ្ធនាឆ្នាំនេះ ជាចំនួនច្រើនមួយបើប្រៀបធៀបទៅនឹងសមយុទ្ធដូចគ្នានេះលើកមុន ដែលមានទាហានអាមេរិកចូលរួមត្រឹមតែ៣.៥០០នាក់នោះ ។
ម្យ៉ាងវិញទៀត សមយុទ្ធយោធារួមប្រចាំឆ្នាំទី២ មានឈ្មោះថា FOAL EAGLE នឹងប្រព្រឹត្តទៅពីថ្ងៃទី២៤ កុម្ភៈ ទៅថ្ងៃទី១៨ មេសា។ យោងតាមលោក KIM ថា ទាហានអាមេរិកប្រមាណជា៧.៥០០នាក់នឹងចូលរួមក្នុងសមយុទ្ធនោះ ដែលចំនួននេះមានទាបជាងសមយុទ្ធឆ្នាំទៅមិញ ដែលមានទាហានអាមេរិកចូលរួមដល់ទៅ១០.០០០នាក់ ។លោក KIM បញ្ជាក់ថា បានប្រាប់រឿងនោះដល់កូរ៉េខាងជើងកាលពីព្រឹកថ្ងៃទី៩ កុម្ភៈ ។
ភាពតានតឹងកើតមានជាថ្មីនៅឧបទ្វីបកូរ៉េដោយសារសមយុទ្ធយោធារួមនេះ ដោយកូរ៉េខាងជើងប្រកាសលុបចោលទស្សនកិច្ចរបស់បេសកជនអាមេរិកម្នាក់ដែលមានទិសដៅឱ្យមានការដោះលែងជនជាតិអាមេរិកម្នាក់ដែលជាប់ឃុំឃាំង ។ ក្រុងព្យុងយ៉ាងបានបរិហារចំពោះសមយុទ្ធទាំងនេះ ។
ក្នុងសេចក្តីប្រកាសមួយចេញផ្សាយកាលពីយប់ថ្ងៃទី៩ កុម្ភៈ ក្រសួងការបរទេសអាមេរិកនិយាយថា ខ្លួនមានការខកចិត្តយ៉ាងខ្លាំងចំពោះការសម្រេចចិត្តរបស់កូរ៉េខាងជើងលុបចោលការអញ្ជើញឯកអគ្គរដ្ឋទូតលោក ROBERT KING ដែលគ្រោងឱ្យមានការដោះលែងលោក KENNETH BAE សញ្ជាតិអាមេរិក ដើមកំណើតកូរ៉េ ដែលក្រុងព្យុងយ៉ាងឃុំឃាំងចាប់តាំងពីខែវិច្ឆិកា ឆ្នាំ២០១២ មក ។
នេះជាលើកទី២ហើយដែលការគ្រោងធ្វើដំណើររបស់លោក KING មកកាន់ក្រុងព្យុងយ៉ាងដើម្បីចរចាពីការដោះលែងបុរសអាមេរិកនេះត្រូវលុបចោលវិញនៅនាទីចុងក្រោយ ។
ពួកអ្នកវិភាគជាច្រើនគិតថា ការប្រកាសពីកាលបរិច្ឆេទនៃការធ្វើសមយុទ្ធយោធារួមទាំងនេះ ក៏អាចញ៉ាំងឱ្យកូរ៉េខាងជើងលុបចោលការជួបជុំសាច់ញាតិគ្រួសារព្រាត់គ្នា ដែលបានកំណត់ពេលរួចរាល់នាពេលមុននេះដូចដែលក្រុងព្យុងយ៉ាងធ្លាប់ធ្វើរួចហើយកាលពីខែកញ្ញា ឆ្នាំទៅមិញ ។
កូរ៉េខាងជើងអំពាវនាវជាច្រើនលើកដល់ក្រុងសេអ៊ូល និងក្រុងវ៉ាស៊ីនតោនឱ្យបោះបង់ចោលសមយុទ្ធទាំងនោះ ដោយធ្វើការគំរាមកំហែងនានា ប្រសិនបើសមយុទ្ធនោះពិតជាធ្វើ ។
សមយុទ្ធយោធារួមកូរ៉េខាងត្បូង អាមេរិក កាលពីឆ្នាំ២០១៣ នាំឱ្យមានភាពតានតឹងយ៉ាងខ្លាំង ដោយកូរ៉េខាងជើងគំរាមធ្វើការបាញ់អាវុធនុយក្លេអ៊ែរបង្ការ ខណៈដែលបណ្តាយន្តហោះទម្លាប់គ្រាប់បែកយុទ្ធសាស្ត្រអាមេរិកដែលអាចផ្ទុកគ្រាប់បែកនុយក្លេអ៊ែរ ធ្វើការហោះហើរហ្វឹកហ្វឺនពីលើឧបទ្វីបកូរ៉េ ៕
ចែករំលែកព័តមាននេះ