ក្តីរំពឹងរបស់កីឡាករហ្វាំងឡង់យ៉ារី ម៉ាតទី ឡាតវ៉ាឡា យកឈ្នះពានជើងឯកព្រឹត្តិការណ៍ប្រណាំងរថយន្តប្រភេទ Rally កម្មវិធី WRC Rally of Sweden បានដូចបំណង បន្ទាប់ពីរូបគេយកឈ្នះការប្រណាំងនៅថ្ងៃបញ្ចប់កាលពីថ្ងៃសៅរ៍ ទី៨ ខែកុម្ភៈ នៅក្រុង Karlstad ប្រទេសស៊ុយអែត ។
ក្តីរំពឹងរបស់កីឡាករហ្វាំងឡង់យ៉ារី ម៉ាតទី ឡាតវ៉ាឡា យកឈ្នះពានជើងឯកព្រឹត្តិការណ៍ប្រណាំងរថយន្តប្រភេទ Rally កម្មវិធី WRC Rally of Sweden បានដូចបំណង បន្ទាប់ពីរូបគេយកឈ្នះការប្រណាំងនៅថ្ងៃបញ្ចប់កាលពីថ្ងៃសៅរ៍ ទី៨ ខែកុម្ភៈ នៅក្រុង Karlstad ប្រទេសស៊ុយអែត ។
ឡាតវ៉ាឡា បានបើករថយន្ត Volkswagenរបស់ខ្លួនចូលដល់ទីព្រ័ត្រក្នុងថិរវេលា៣ម៉ោងនិង៣១.១វិនាទីយកឈ្នះកីឡាករមិត្តរួមជាតិនិងមិត្តរួមក្រុម Andreas Mikkelsen ដែលបានប្រើពេលច្រើនជាង៥៣.៦វិនាទី ។
ចំណែកកីឡាករន័រវែស Mads Ostberg បើកបរឱ្យក្រុម Citroen បញ្ចប់ការប្រណាំងក្នុងលំដាប់ទី៣ បន្ទាប់ពីបានប្រើពេលច្រើនជាងឡាតវ៉ាឡា៥៩.៥វិនាទីតាមពីក្រោយដោយកីឡាករហ្វាំងឡង់ Mikko Hirvonen របស់ក្រុម M-Sport Ford ដែលបញ្ចប់ការប្រណាំងក្នុងលំដាប់ទី៤ ។
សម្រាប់ ឡាតវ៉ាឡា នេះជាលើកទី២ ហើយដែលរូបគេដណ្តើមបានជ័យជម្នះក្នុងកម្មវិធី Rally Sweden ឱ្យក្រុម Volkswagen ។ សរុបជ័យជម្នះក្នុងប្រទេសស៊ុយអែត គឺគេឈ្នះ៣លើកទាំងលើកនេះ ។
គេបាននិយាយថា ៖ «ខ្ញុំបើកបរបានល្អក្នុងថ្ងៃនេះ ។ វាពិតជាគួរឱ្យភ្ញាក់ផ្អើលដ្បិតកាលពី៥ឆ្នាំមុន ខ្ញុំបានឈ្នះជើងឯកនៅទីនេះហើយក្នុងពេលនេះខ្ញុំឈ្នះសាជាថ្មីម្តងទៀត ។ លើកទី១ដែលខ្ញុំឈ្នះជើងឯកនៅទីនេះ គឺខ្ញុំមានវ័យក្មេងជាងគេបំផុតក្នុងចំណោមបណ្តាកីឡាករប្រណាំង Rally ។ វាពិតជារឿងអស្ចារ្យបំផុតដែលបានឈ្នះវាម្តងទៀត។ ខ្ញុំគិតថាក្រុមដែលយើងត្រូវប្រណាំងប្រជែងគឺ Citroen»។
កីឡាករ Mads Ostberg របស់ក្រុមCitroen ដែលដណ្តើមបានចំណាត់ថ្នាក់លេខ៣បាននិយាយថា ៖ «លទ្ធផលលើកនេះមិនជាអាក្រក់ណាស់ណាទេ ។ ខ្ញុំគិតថា នៅចុងសប្តាហ៍នេះ យើងបានទទួលមេរៀននិងចេះដឹងច្រើន ។ ខ្ញុំពិតជាចង់ដណ្តើមយកជ័យជម្នះជូនក្រុម តែកីឡាករឡាតវ៉ាឡា ពិតជាខ្លាំងមែននៅក្នុងការប្រណាំងលើកនេះ»។
សម្រាប់កីឡាករបារាំងសេបាស្ទៀន អូហ្ស៊ីយ៉េ ដែលជាជើងខ្លាំងស្ទើរគ្រប់ការប្រណាំង និងគ្រប់រដូវកាលធ្វើមិនបានល្អទេលើកនេះ ។ គេបញ្ចប់ការប្រណាំងដោយដណ្តើមបានត្រឹមចំណាត់ថ្នាក់លេខ៦ប៉ុណ្ណោះ ។
សូមបញ្ជាក់ថា ការប្រណាំងរថយន្តប្រភេទRally សម្រាប់ឆ្នាំ២០១៤ នេះមាន១៣ដំណាក់។ ដំណាក់ទី១ បានចាប់ផ្តើមកាលពីថ្ងៃទី១៤ ខែមករាដើមឆ្នាំនៅប្រទេសបារាំង និងដំណាក់ចុងក្រោយបំផុតនឹងធ្វើនៅថ្ងៃទី១៤ ខែវិច្ឆិកាខាងមុខនៅចក្រភពអង់គ្លេស ។ ដោយឡែក ការប្រណាំងនៅប្រទេសស៊ុយអែតនេះ គឺស្ថិតនៅក្នុងដំណាក់ទី២ ។ ការប្រណាំងនៅដំណាក់បន្ទាប់នឹងធ្វើនៅប្រទេសម៉ិចស៊ិក ចាប់ពីថ្ងៃទី៦ ដល់ថ្ងៃទី៩ ខែមីនា ៕
ចែករំលែកព័តមាននេះ