រាជធានីភ្នំពេញ ៖ ជំនួបកីឡាករមាស សារិទ្ធិ មកពីក្លិបរកាខ្នុរគុនខ្មែរបង្ក្រាបគ្រឿងញៀន និងកីឡាករសុខ ចំរើនស្រ៊ុន មកពីមជ្ឈមណ្ឌលសកម្មភាពកម្ចាត់មីនកម្ពុជា កាលពីថ្ងៃសុក្រ ទី៧ កុម្ភៈ បានធ្វើឱ្យមានការចាប់អារម្មណ៍យ៉ាងខ្លាំង ខណៈដែលពួកគេទាំងពីរជាអតីតសិស្សរួមគ្រូ រួមក្លិប ហើយត្រូវមកប៉ះគ្នាលើរេញ តែការវាយគ្នាមានសភាពរស់
រាជធានីភ្នំពេញ ៖ ជំនួបកីឡាករមាស សារិទ្ធិ មកពីក្លិបរកាខ្នុរគុនខ្មែរបង្ក្រាបគ្រឿងញៀន និងកីឡាករសុខ ចំរើនស្រ៊ុន មកពីមជ្ឈមណ្ឌលសកម្មភាពកម្ចាត់មីនកម្ពុជា កាលពីថ្ងៃសុក្រ ទី៧ កុម្ភៈ បានធ្វើឱ្យមានការចាប់អារម្មណ៍យ៉ាងខ្លាំង ខណៈដែលពួកគេទាំងពីរជាអតីតសិស្សរួមគ្រូ រួមក្លិប ហើយត្រូវមកប៉ះគ្នាលើរេញ តែការវាយគ្នាមានសភាពរស់រវើក ។
មួយរយៈមុន អ្នកណាក៏ដឹងថា កីឡាករមាស សារិទ្ធិ និងកីឡាករសុខ ចំរើនស្រ៊ុន ជាអតីតសិស្សប្រចាំក្លិបយុវកីឡាខេត្តកណ្តាលតែមួយ ។ ក្រោយមកបើទោះជាពួកគេជ្រកក្នុងក្លិបខុសគ្នា ក៏ពួកគេហ្វឹកហាត់ជាមួយគ្រូម្នាក់ ឬ២នាក់ដូចគ្នា ។ ដោយសារតែក្នុងពិភពកីឡាប្រដាល់ គ្រូម្នាក់បង្វឹកកីឡាករមិនតិចជាង៣ក្លិបផ្សេងគ្នានោះឡើយ អុីចឹងហើយទើបជំនួបរវាងកីឡាករទាំងពីរនាក់នេះបានធ្វើឱ្យមានការចាប់អារម្មណ៍គួរសមនៅលើសង្វៀនប្រដាល់ស្ទឹងមានជ័យ។ ក្រុមអ្នកដឹងពីប្រវត្តិដើមរបស់ពួកគេ ហាក់ស្រឡាំងកាំងនៅពេលឃើញអ្នកទាំងពីរវាយប្រយុទ្ធគ្នាបានល្អ ដោយសូម្បីតែកន្លងមកពួកគេគឺជាសិស្ស និងជាកីឡាករដែលមានទម្រង់ស្នៀត និងការវាយប្រយុទ្ធមានលំនាំតែមួយ ។ អ្វីដែលធ្វើឱ្យមានការភ្ញាក់ផ្អើលថែមទៀត គឺកីឡាករបង្គោលក្រហម មាស សារិទ្ធិ និងកីឡាករបង្គោលខៀវ សុខ ចំរើនស្រ៊ុន មិនបានទុកមុខឱ្យគ្នាទាល់តែសោះ និងបានទាំងបង្ហាញសភាពវាយសន្ធាប់ដាក់គ្នាយ៉ាងពេញទំហឹងធ្វើឱ្យមានការជក់ចិត្ត ។ បើទោះជាធាតុពិតអ្នកទាំងពីរអាចនឹងដាក់វេនសម្រុកគ្នា ប៉ុន្តែអ្វីដែលគេបានឃើញនោះគឺសមភ្នែក ។ តាំងពីទឹកទី១ រហូតដល់ទឹកចុងក្រោយ កីឡាករបង្គោលខៀវ និងបង្គោលក្រហម ប្រើអស់ពីកម្លាំងកាយតែម្តងជាមួយនឹងការធ្វើឱ្យកីឡាករបង្គោលខៀវទក់សាច់ដោយកណ្តាប់ដៃឆ្វេងស្តាំ និងរន្ទះជើងផុតដល់ចុងសក់នោះផង ។ ទោះបីយ៉ាងណា កីឡាករបង្គោលខៀវ សុខ ចំរើនស្រ៊ុន ក៏មិនបានទុកស្នៀត និងដៃជើងដែលគ្រូនិងម្តាយចែកឱ្យនៅទំនេរនោះដែរ ដោយគេបានប្រើអស់ដូចគ្នា ។ គាប់ជួនជាកីឡាករទាំងពីរហាក់ចេញគ្រឹះពីកន្លែងហ្វឹកហាត់តែមួយផង ទើបធ្វើឱ្យការវាយសម្រុករបស់ពួកគេមានភាពល្អឥតខ្ចោះក្នុងរយៈពេល៥ទឹក ។ ក្រុមអ្នកទស្សនាលើកឡើងថា បើពួកគេមិនចេញពីប្រភពតែមួយ ហើយមិនធ្លាប់មានទំនាក់ទំនងស្អិតរមួតជាមួយគ្នានៅក្រៅឆាកទេ ប្រាកដជាល្អមើលជាងនេះឆ្ងាយណាស់ ។ សភាពវាយលុករបស់ពួកគេ បើទោះជាមានចំណុចខ្លះហាក់ចន្លោះប្រហោង ឬទុកមុខឱ្យគ្នា ប៉ុន្តែក៏ក្លាយជាគំរូមួយដែលអាចនិយាយបានថា ចេញពីទឹកចិត្តពិតប្រាកដក្នុងនាមជាកីឡាករដែលនៅក្រៅសង្វៀនគឺជារឿងផ្សេង លុះនៅក្នុងសង្វៀនត្រូវតែវាយគ្នាដោយមិនឱ្យអ្នកទស្សនាខកបំណង ។ រវាងកីឡាករទាំងពីរ បង្គោលក្រហមមាស សារិទ្ធិ បានក្លាយជាអ្នកឈ្នះពិន្ទុ ខណៈដែលលទ្ធផលនេះបានធ្វើឱ្យក្រុមអ្នកទស្សនាភាគច្រើនអបអរសាទរ ។
នៅលើសង្វៀននោះដែរ កីឡាករចៅ ផលឌឿ ជើងខ្លាំងមកពីក្លិបសំរោងកោងបានបង្ហាញអារម្មណ៍ស្រងាកចិត្តតិចតួច បន្ទាប់ពីត្រូវចាញ់ពិន្ទុកីឡាករហេង វិច្ឆ័យ មកពីក្លិបកងពលតូចលេខ៧០ ដោយអាម៉ាស់ ។ បើទោះជា ហេង វិច្ឆ័យ មានរូងរាងខ្ពស់ និងមានដៃជើងវែងៗ ប៉ុន្តែគ្រប់ពេលចូលកៀក គេរមែងត្រូវកីឡាករចៅ ផលឌឿ ផ្តួលឱ្យបះជើងច្រងាប់ច្រងិលបំផុតចាប់តាំងពីទឹកទី១ ។ ស្ទើរគ្រប់ទឹកកីឡាករបង្គោលខៀវមិនត្រឹមតែដួលផ្ងារជើងប៉ុណ្ណោះទេ សូម្បីតែមុខ និងដងខ្លួន ក៏ត្រូវកណ្តាប់ដៃរបស់ ចៅ ផលឌឿ ឡើងសុសសាច់ដូចគ្នា ។ ត្រង់ហ្នឹងហើយដែលលទ្ធផលនៅវគ្គចុងក្រោយបានក្លាយជារឿងស្រងាកចិត្ត ដែលចៅ ផលឌឿ និងអ្នកគាំទ្រមិនអស់ចិត្ត ។ ទោះបីយ៉ាងណា កីឡាករហេង វិច្ឆ័យ ថ្វីបើមានឱកាសវាយចេញតិច ប៉ុន្តែក៏ត្រូវចំគោលដៅបានល្អដែរ ។
ក្រុមអ្នកផ្តល់ពិន្ទុបានអះអាងថា នោះគឺជាលទ្ធផលដោយសារតែបង្គោលខៀវវាយចេញតិច ប៉ុន្តែត្រូវច្រើន ដែលក្នុងមួយស្នៀតៗគឺសុទ្ធសឹងតែជាចំណុចចំគោលដៅនៃការប្រមូលពិន្ទុ ។ ការប្រកាសឱ្យ ចៅ ផលឌឿ ចាញ់ពិន្ទុបានធ្វើឱ្យមានការរិះគន់ខ្លះក្នុងចង្កោមអ្នកគាំទ្រ ប៉ុន្តែក៏ធ្វើឱ្យអ្នកចេះវិភាគពីការប្រដាល់ទាំងមូលអស់ចិត្ត។ ក្រុមអ្នកទស្សនាមួយក្រុមទៀតក៏លើកហេតុផលដូចគ្នា ស្របនឹងការអះអាងរបស់ក្រុមគណៈកម្មការដែលបានការពារចំពោះសេចក្តីសម្រេចរបស់ខ្លួន ។ ភាគីមួយក្រុមនោះលើកឡើងថា នោះជារឿងសក្តិសមដែល ចៅ ផលឌឿ វាយបានល្អមែន បុ៉ន្តែក៏ត្រូវទក់សាច់ដោយការវាយឆ្មក់របស់កីឡាករបង្គោលខៀវគ្រប់លើក ។ គណៈកម្មការរៀបចំការប្រកួតបានប្រាប់ថា នឹងផ្តល់ឱកាសឱ្យ ចៅ ផលឌឿ ឡើងសងសឹកឆាប់ៗដើម្បីបំបាត់មន្ទិលសង្ស័យរបស់អ្នកគាំទ្រមកពីការកាត់ក្តីរបស់ពួកគេឱ្យជ្រះស្រឡះ ។ នៅលើសង្វៀននោះដែរ កីឡាករផាន់ ពិសិដ្ឋ មកពីក្លិបគជសារកីឡា ស្មើពិន្ទុជាមួយកីឡាករស៊ឹម ប៊ុនឆៃ មកពីក្លិបព្រៃទទឹងខេត្តបាត់ដំបង និងកីឡាករអៀង ចាន់ល័ក្ខ មកពីក្លិបកងទ័ពជើងគោក ផ្តួលកីឡាករសល់ អាម៉ា មកពីក្លិបកុសលកីឡាឱ្យសន្លប់ក្នុងទឹកទី៣ ៕
ចែករំលែកព័តមាននេះ