ខេត្តពោធិ៍សាត់ ៖ មានការភ្ញាក់ផ្អើលទាំងព្រឹក បន្ទាប់ពីប្រទះឃើញទារកទើបនឹងកើតដេកស្រែកយំក្នុងថ្លុកឈាមនៅកន្លៀតរបងខ្លោងទ្វារពហុកីឡដ្ឋានខេត្តពោធិ៍សាត់ កាលពីវេលាម៉ោង៨ និង១៥នាទីព្រឹក ថ្ងៃទី៩ កុម្ភៈ ២០១៤ ។
ខេត្តពោធិ៍សាត់ ៖ មានការភ្ញាក់ផ្អើលទាំងព្រឹក បន្ទាប់ពីប្រទះឃើញទារកទើបនឹងកើតដេកស្រែកយំក្នុងថ្លុកឈាមនៅកន្លៀតរបងខ្លោងទ្វារពហុកីឡដ្ឋានខេត្តពោធិ៍សាត់ កាលពីវេលាម៉ោង៨ និង១៥នាទីព្រឹក ថ្ងៃទី៩ កុម្ភៈ ២០១៤ ។
តាមការសាកសួរពីប្រជាពលរដ្ឋឱ្យដឹងថា នៅវេលាព្រឹកនោះអ្នករុញធុងការ៉េមលក់ទឹកអំពៅឃើញឆ្កែចេះតែព្រូសមិនឈប់សោះនៅកន្លៀតរបងខ្លោងទ្វារពហុកីឡដ្ឋានខេត្តពោធិ៍សាត់មានការងឿងឆ្ងល់ក៏ដើរទៅមើលស្រាប់តែឃើញទារកទើបនឹងកើតកំពុងដេកស្រែកយំក្នុងថ្លុកឈាមគួរឱ្យអាណិតខ្លាំងណាស់។ ពេលនោះគាត់ក៏ស្រែកប្រាប់អ្នកដំណើរឱ្យមកជួយគ្នាទើបផ្អើលមនុស្សម្នាមកចោមរោមមើលតែម្តង។
លោកវរសេនីយ៍ត្រី ម៉ម ឆៃលី ប្រធានការិយាល័យវិទ្យុទាក់ទងនៃស្នងការដ្ឋាននគរបាលខេត្តពោធិ៍សាត់បានប្រាប់កោះសន្តិភាពថា ខណៈពេលលោកបើករថយន្តមកដល់មុខខ្លោងទ្វារពហុកីឡដ្ឋានខេត្តនោះឃើញមនុស្សជុំៗក៏ឈប់សួរគេបានប្រាប់ថា មានគេប្លុងទារកចោល។ ពេលនោះលោកក៏ចុះទៅមើលផ្ទាល់ឃើញទារកនោះទើបដឹងថា មិនមែនប្លុងចោលទេ គឺស្ត្រីជាម្តាយបានបង្កើតកូនដោយខ្លួនឯងរួចហើយទុកកូនចោលនៅទីនោះ។ ដោយឃើញគួរឱ្យអាណិតអាសូរពេកលោកក៏យកក្រមាពោះគោរុំលើកដាក់លើរថយន្តនាំយកទៅមន្ទីរពេទ្យ។
ពេលយកទៅដល់មន្ទីរពេទ្យ ក្រុមគ្រូពេទ្យបានយកចិត្តទុកដាក់កាត់ទងផ្ចិតងូតទឹកសម្អាតខ្លួន និងចាក់ថ្នាំការពារទៅតាមជំនាញបច្ចេកទេសបានយ៉ាងល្អ។ តាមការអះអាងរបស់គ្រូពេទ្យបញ្ជាក់ថា ទារកនេះមានទម្ងន់៣,៤គីឡូក្រាម មានសុខភាពល្អ ទើបតែកើតក្នុងចន្លោះពីម៉ោង៤ទៅម៉ោង៥ទៀបភ្លឺនេះប៉ុណ្ណោះ។ ក្រោយពីសម្អាត និងចាក់ថ្នាំបង្ការរួចទារកនេះបានប្រគល់ទៅឱ្យស្ត្រីម្នាក់រស់នៅក្នុងភូមិចំការចេកខាងជើងសង្កាត់ផ្ទះព្រៃ ក្រុងពោធិ៍សាត់យកទៅចិញ្ចឹម ៕
ចែករំលែកព័តមាននេះ