ខេត្តប៉ៃលិន ៖ យុវជនម្នាក់ត្រូវគេបញ្ជូនទៅព្យាបាលនៅមន្ទីរពេទ្យបង្អែកខេត្ត ចំណែកបុរស ៣នាក់ទៀត ត្រូវសមត្ថកិច្ចឃាត់ខ្លួន ដើម្បីសួរនាំរួចបញ្ជូនទៅអធិការក្រុង បន្ទាប់ពីពួកគេផឹកស្រាស្រវឹងប្រើអំពើហិង្សាវាយតប់គ្នា ដែលហេតុការណ៍នេះ បានកើតឡើងកាលពីវេលាម៉ោង ១២ និង ២០នាទី យប់រំលងអធ្រាត្រឈានចូលថ្ងៃទី០៧ កុម្ភៈ ២០១៤ ស្ថិតក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន។
យុវជនបង្កហេតុ ទី១. ឈ្មោះ សឿន ផល្លា អាយុ ១៦ឆ្នាំ រងរបួសរលាត់ថ្ពាល់ និងរលាត់ក្រោមចង្ការ រយះក្បែរភ្នែកខាងស្តាំ សម្រាកព្យាបាលនៅមន្ទីរពេទ្យបង្អែកខេត្ត ទី២. ឈ្មោះ សឿន សុរិទ្ធិ ភេទប្រុស អាយុ ២២ឆ្នាំ គ្មានរបួស។ ចំណែកជនរងគ្រោះ ទី១. ឈ្មោះ ជា ប្រុស អាយុ ៤៣ឆ្នាំ ជាកសិករ ជាំភ្នែកឆ្វេង ទី២. ឈ្មោះ ជា ពៅ ភេទប្រុស អាយុ ៣៧ឆ្នាំ ជាកសិករ ជាំភ្នែកឆ្វេង ហើមបបូរមាត់ផ្នែកខាងលើសន្លប់នៅនឹងកន្លែង ទី៣. ឈ្មោះ ហឿន ហឿប ភេទប្រុស អាយុ ៣៧ឆ្នាំ កសិករ របួសស្រាល បច្ចុប្បន្នទាំងអស់គ្នារស់នៅភូមិកើតហេតុខាងលើ។
មន្រ្តីសមត្ថកិច្ចប៉ុស្តិ៍នគរបាលរដ្ឋបាលសង្កាត់អូរតាវ៉ៅ បានឲ្យដឹងថា មុនពេលកើតហេតុ មានកម្មវិធីបង្កក់កូននៅផ្ទះបុរសម្នាក់ឈ្មោះ ហាន ហៅម៉ាប់ ដោយបុរស ៣នាក់ ខាងលើបាននាំគ្នាទៅចូលរួមកម្មពិធីតាំងពីវេលាម៉ោង ៦ និង ៣០នាទីល្ងាច រហូតដល់ម៉ោង ១១ និង ៣០នាទីយប់ ស្រាប់តែមានយុវជនបង្កហេតុម្នាក់ឈ្មោះ ផល្លា បានស្រវឹងស្រាជោកជាំនៅកន្លែងផឹកស៊ីខាងក្រៅដើរចូលទៅរាំនៅក្នុងពិធីបង្កក់កូននោះ។
លុះរាំបានមួយសន្ទុះបុរសទាំង ៣នាក់ បានបមុ្រងជិះម៉ូតូចេញត្រលប់ទៅផ្ទះវិញ ក៏ឃើញយុវជនរូបនោះ នាំបងថ្លៃរបស់ខ្លួនម្នាក់ឈ្មោះ វុធ រិទ្ធិ ហៅតឹន អាយុ ២២ឆ្នាំ មកឈរកាក់នៅមុខម៉ូតូបុរសទាំង ៣នាក់ រួចក៏ចាប់ផ្តើមដាល់អ្នកទាំង ៣នាក់ បណ្តាលឲ្យរងរបួស ចំណែកយុវជនបង្ករបួសរយះមុខ របួស.ក រត់គេចខ្លួនបាត់។ លុះព្រឹកឡើងគេឃើញយុវជនបង្ករត់ទៅដាក់ពាក្យបណ្តឹងនៅប៉ុស្តិ៍សង្កាត់អូរតាវ៉ៅ ឯបុរសទាំង ៣នាក់ ក៏បាននាំគ្នាទៅដាក់ពាក្យបណ្តឹងនៅប៉ុស្តិ៍ដែរ។
យុវជនបង្កហេតុបន្ទាប់ពីដាក់ពាក្យរួច ក៏ចូលទៅសម្រាកព្យាបាលរបួសនៅមន្ទីរពេទ្យបង្អែកខេត្ត លុះដល់វេលាម៉ោង ៥ និង ៣០នាទី រសៀលថ្ងៃដដែល ស្រាប់តែឮថា មានអាការៈក្អួតចង្អោររបួសធ្ងន់ត្រូវក្រុមគ្រួសារបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ចំណែកបុរសទាំង ៣នាក់ ត្រូវសមត្ថកិច្ចប៉ុស្តិ៍នគរបាលសង្កាត់អូរតាវ៉ៅ ចាប់ឃាត់ខ្លួននៅវេលាម៉ោង ៩ និង ៣០នាទី ព្រឹកថ្ងៃទី០៨ កុម្ភៈ នៅក្នុងផ្ទះរបស់ខ្លួនភូមិខាងលើយកមកសួរនាំ រួចរៀបចំសំណុំរឿងបញ្ជូនទៅអធិការក្រុងប៉ៃលិន ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ