ខេត្តបន្ទាយមានជ័យ ៖ ពលករស៊ីឈ្នួលកាប់ និងអូសឈើគ្រញូងជាង ៣០នាក់ បានវិលត្រលប់ពីប្រទេសថៃ ដោយសុវត្ថិភាព នៅវេលាម៉ោងជិត ៦ល្ងាច ថ្ងៃទី០៨ កុម្ភៈ ២០១៤ នៅក្រុងប៉ោយប៉ែត ប៉ុន្តែ អះអាងថា ត្រូវមេការបោកប្រាក់អស់ជាងពាក់កណ្ដាលម្នាក់ៗ រួចគេចទៅបាត់។ ក្រុមពលករខាងលើមិនព្រមប្រាប់ពីអត្តសញ្ញាណឡើយ ប៉ុន្តែ ភាគច្រើននៃពួកគេនិយាយថា មកពីស៊ីឈ្នួលកាប់ និងអូសឈើគ្រញូងលើដីថៃ ហើយវិលត្រលប់វិញតាមច្រករបៀងនៅក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ពួកគេរអ៊ូរទាំថា ប្រាក់កម្រៃធ្វើការងារជិត ១ខែ សរុបម្នាក់ៗ បាន ២៨០០០បាត ប្រាក់ថៃ (២ម៉ឺន ៨ពាន់បាត) តែត្រូវមេការបើកឲ្យតែម្នាក់ ១០០០០បាត តែប៉ុណ្ណោះ រួចគេចទៅបាត់ធ្វើឲ្យពួកគេមានភាពរញ៉េរញ៉ៃក្នុងការចែកប្រាក់គ្នាមុនរករថយន្តជិះត្រលប់ទៅស្រុកកំណើតរៀងខ្លួនៗ។ អ្នកខ្លះថា នៅខេត្តកំពត និងមួយចំនួនធំនៅស្រុកសំឡូត ខេត្តបាត់ដំបង។
ពួកគេប្រាប់ថា ទីតាំងស៊ីឈ្នួលកាប់ និងអូសឈើគ្រញូងនៅដីថៃនោះ គឺនៅលើភ្នំ ហើយមានចម្ងាយជាង ១០០គីឡូម៉ែត្រ ពីព្រំដែន។ ការវិលត្រលប់របស់ក្រុមពលករស៊ីឈ្នួលកាប់ និងអូសឈើគ្រញូងនេះ ថ្វីត្បិតតែទទួលបានសុវត្ថិភាពឆ្លងផុតពីការបាញ់ប្រហារពីសំណាក់សមត្ថកិច្ចថៃ ប៉ុន្តែ វាគួរឲ្យសោកស្ដាយបំផុត ដែលសមត្ថកិច្ចគួរតែទទួលបានព័ត៌មានពីពួកគេថា តើនរណាជាអ្នកនៅពីក្រោយខ្នងក្នុងការជួលឲ្យទៅកាប់ និងអូសឈើគ្រញូងលើដីថៃ ផ្សងនឹងគ្រោះថ្នាក់ជាទីបំផុតនេះ ខណៈដែលកន្លងមក ខ្មែរជាច្រើននាក់ត្រូវបានគេបាញ់សម្លាប់ និងរបួសជាបន្តបន្ទាប់លើដីថៃ។
ម្យ៉ាងទៀត ក្រុមពលករទាំងនេះ គួរតែទទួលបាននូវការអប់រំកុំឲ្យប្រថុយប្រថានផ្សងគ្រោះថ្នាក់លើដីថៃទៀតក្នុងការទៅស៊ីឈ្នួលកាប់ និងអូសឈើគ្រញូង។ សមត្ថកិច្ចស្ថាប័នមួយនៅក្រុងប៉ោយប៉ែត ខណៈដែលអ្នកយកព័ត៌មានរាយការណ៍ជូនពីបញ្ហាខាងលើ ហាក់មិនមានវិធានការមកហៅសួរនាំក្រុមពលករទាំងនេះឡើយ បណ្ដោយឲ្យក្រុមពលករទាំងនោះ ឡើងរថយន្តចេញទៅបាត់៕
ចែករំលែកព័តមាននេះ