រាជធានីភ្នំពេញ ៖ យុវជនម្នាក់ត្រូវសមត្ថកិច្ចនគរបាលផ្នែកព្រហ្មទណ្ឌ ខណ្ឌ ៧មករា ចាប់ឃាត់ខ្លួន កាលពីវេលាម៉ោង ២ និង ៣០នាទី រសៀលថ្ងៃទី០៨ កុម្ភៈ ២០១៤ នៅចំណុចមុខផ្ទះសំណាក់ ហង្សនាគ២ តាមបណ្តោយផ្លូវលេខ២៧១ សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ជនសង្ស័យមានឈ្មោះ ចាន់ រ៉ា ភេទប្រុស អាយុ ២៨ឆ្នាំ ជាអតីតសន្តិសុខឯកជន ស្នាក់នៅផ្ទះជួលបុរី ១០០ខ្នង សង្កាត់ទឹកថ្លា ខណ្ឌសែនសុខ។
ការឃាត់ខ្លួនជនសង្ស័យខាងលើនេះ ត្រូវសមត្ថកិច្ចឲ្យដឹងថា នៅវេលាម៉ោង ១០ព្រឹក ថ្ងៃទី០៧ កុម្ភៈ ជនរងគ្រោះម្ចាស់ម៉ូតូឈ្មោះ គៀត ស៊ុនហួរ ភេទប្រុស អាយុ ១៨ឆ្នាំ ស្នាក់នៅផ្ទះលេខ១៣៥ មហាវិថីសហព័ន្ធរុស្សី សង្កាត់ទឹកថ្លា ខណ្ឌសែនសុខ បានចេញពីសាលារៀនឯកជន ជ័យ ថាវី នៅសង្កាត់វាលវង់ ខណ្ឌ ៧មករា ដោយជិះម៉ូតូ ១គ្រឿង ម៉ាកហុងដាឌ្រីម១២៥ សេរី២០១២ ទៅលេងមិត្តស្រីឈ្មោះ ខួច អាយុ ១៨ឆ្នាំ នៅផ្ទះលេខ៥Eo ផ្លូវ១៩៦ សង្កាត់វាលវង់ ជិតវិទ្យាល័យបាក់ទូក។
ពេលទៅដល់ ជនរងគ្រោះក៏ចាក់សោម៉ូតូទុកខាងក្រោម ហើយបានឡើងទៅជួបមិត្តស្រីផ្ទះនៅខាងលើ និងបានទុកសោម៉ូតូនៅលើឡាបូលាងដៃ។ នគរបាលបានបន្តថា បន្តិចក្រោយមកឈ្មោះ ចាន់ រ៉ា ដែលជាជនសង្ស័យបានទៅដល់ដែរ ប៉ុន្តែ គេបានឡើងទៅលេងមួយភ្លែត ក៏ចុះមកវិញ និងបានយកសោម៉ូតូរបស់ជនរងគ្រោះលួចជិះចេញទៅ។ លុះពេលជនរងគ្រោះចុះតាមក្រោយបាត់ទាំងសោ បាត់ទាំងម៉ូតូ ទើបសង្ស័យថា គ្មានចោរណាមកលួចក្រៅតែពីឈ្មោះ ចាន់ រ៉ា នោះឡើយ។
ក្រោយពីបាត់ ១ថ្ងៃ នៅវេលាម៉ោង ២ និង ៣០នាទី រសៀលថ្ងៃទី០៨ កុម្ភៈ ជនរងគ្រោះបានឃើញជនសង្ស័យឈប់ម៉ូតូនៅមុខផ្ទះសំណាក់ហង្សនាគ២ តាមបណ្តោយផ្លូវ២៧១ ក៏បានទាក់ទងទៅសមត្ថកិច្ចនគរបាលព្រហ្មទណ្ឌ ខណ្ឌ ៧មករា ឲ្យឃាត់ខ្លួន។ ពេលឃាត់សមត្ថកិច្ចដកហូតម៉ូតូ ១គ្រឿង សេ១២៥ ផលិតនៅប្រទេសចិន ដែលមិនមែនជាម៉ូតូរបស់ជនរងគ្រោះទេ ហើយនៅចំពោះមុខសមត្ថកិច្ច ជនសង្ស័យសារភាពថា ខ្លួនមិនបានលួចម៉ូតូរបស់ឈ្មោះ គៀត ស៊ុនហួរ ឡើយ។
ទោះជាយ៉ាងណា សមត្ថកិច្ចនគរបាលផ្នែកព្រហ្មទណ្ឌ ខណ្ឌ ៧មករា បានកសាងសំណុំរឿងបញ្ជួនជនសង្ស័យទៅកាន់សាលាដំបូងរាជធានីភ្នំពេញ តាមនីតិវិធី៕
ចែករំលែកព័តមាននេះ