រាជធានីភ្នំពេញ ៖ ជនសង្ស័យប្រុសស្រី០៣នាក់ ត្រូវបានកម្លាំងអាវុធហត្ថរាជធានី សហការជាមួយអាវុធហត្ថខណ្ឌពោធិ៍សែនជ័យ ចុះឃាត់ខ្លួន កាលពីវេលាម៉ោង៨និង៣០នាទីព្រឹកថ្ងៃទី០៨ កុម្ភៈ ២០១៤ នៅជាប់របងវិទ្យាល័យហ៊ុន សែន ជម្ពូវ័ន្ត ស្ថិតក្នុងភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ បន្ទាប់ពីសង្ស័យពួកគេមានជាប់ពាក់ព័ន្ធករណីបាញ់ប្លន់យកម៉ូតូម៉ាកCBR កាលពីយប់មិញមិនបានសម្រេច និងប្លន់កន្លងមកនៅក្នុងខណ្ឌពោធិ៍សែនជ័យ ។ ក្រោយពីឃាត់ខ្លួន សមត្ថកិច្ចរកឃើញសម្ភារកាច់.កម៉ូតូ និងស្លាកលេខម៉ូតូជាច្រើនទៀត ។
សូមបញ្ជាក់ថា បុរសម្នាក់បានរងរបួសយ៉ាងធ្ងន់ធ្ងរ ខណៈដែលជនរងគ្រោះដឹកសង្សារមកពីដើរលេង ហើយត្រឡប់ទៅផ្ទះវិញ ក៏ត្រូវជនសង្ស័យមានគ្នា ០២នាក់ ជិះម៉ូតូ០១គ្រឿង ប្រដាប់ដោយកាំភ្លើងបាញ់០១គ្រាប់ ប្លន់យកម៉ូតូម៉ាក CBR ០១គ្រឿង ពណ៌ខ្មៅ អត់មានស្លាកលេខ តែមិនបានសម្រេច រួចក្រុមចោរបានជិះម៉ូតូរត់គេចខ្លួនបាត់អស់ ។ ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង ២ និង ៥០នាទី យប់រំលងអាធ្រាត្រឈានចូលថ្ងៃទី០៨ កុម្ភៈ ២០១៤ នៅតាមបណ្តោយផ្លូវវ៉េងស្រេង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះមានឈ្មោះ ខា សុខឃឹម ភេទប្រុស អាយុ ២៥ឆ្នាំ មុខរបរអ្នកម៉ៅការសំណង់ ស្នាក់នៅការដ្ឋានសំណង់ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ ត្រូវជនសង្ស័យបាញ់ចំនួន ៣គ្រាប់ តែត្រូវ ១គ្រាប់ ចំកំប៉េះគូទខាងស្តាំបៀមគ្រាប់រងរបួសធ្ងន់ ត្រូវរថយន្តសាមុយដឹកយកទៅសង្រ្គោះនៅមន្ទីរពេទ្យ។
ចែករំលែកព័តមាននេះ