ខេត្តកំពង់ឆ្នាំង ៖ បុរសម្នាក់បានរងរបួសយ៉ាងធ្ងន់ធ្ងរ ដោយសារត្រូវរថយន្តធុនធំកិនពីលើ បណ្តាលឱ្យខ្ទេចជើងទាំងសងខាង ខណៈដែលបុរសរូបនោះជិះម៉ូតូដួលលើផ្លូវជាតិ និងបានស្លាប់ពេលដឹកទៅសង្គ្រោះនៅមន្ទីរពេទ្យខេត្ត ។ ហេតុការណ៏នេះបានកើតឡើងកាលពីវេលាម៉ោង៤និង៤៥នាទីរសៀលថ្ងៃទី៧ កុម្ភៈ ២០១៤ នៅតាមបណ្តោយផ្លូវជាតិលេខ៥ ចំណុចមុខខ្លោងទ្វារវត្តចំពុះ ក្នុងចន្លោះគីឡូម៉ែត្រលេខ៨២ និង៨៣ ស្ថិតក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ។
មន្ត្រីនគរបាលចរាចរ ស្រុក រលាប្អៀរដែលបានទៅពិនិត្យនៅកន្លែងកើតហេតុ បានឱ្យដឹងថា ជនរងគ្រោះមានឈ្មោះ អៀត ប៊ុនធឿន អាយុ៤៥ឆ្នាំ មានទីលំនៅភូមិជ្រៃបាក់ ឃុំជ្រៃបាក់ ស្រុករលាប្អៀរ ជាកម្មករសំណង់។ ប្រភពដដែលបន្តថា មុនពេលកើតហេតុ បុរសរងគ្រោះបានជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខកំពង់ធំ 1E.0958 តាមបណ្តោយផ្លូវជាតិ ពីជើងទៅត្បូង។ លុះមកដល់ចំណុចកើតហេតុ ក៏ជួបគ្រោះថ្នាក់ចរាចរណ៏ បណ្តាលឱ្យរបួសធ្ងន់ និងបានស្លាប់លើរថយន្តសង្គ្រោះរបស់មន្ទីរពេទ្យខេត្ត ខណៈពេលដឹកទៅសង្គ្រោះ។
ចំពោះមូលហេតុនៃគ្រោះថ្នាក់ចរាចរណ៏ ពុំមានសាក្សីណាបានឃើញបែបណានោះទេ ប៉ុន្តែក្រោយការវាស់វែងនិងពិនិត្យស្លាកស្នាមនៅកន្លែងកើតហេតុ ប៉ូលិសសង្ស័យថា បុរសរូបនោះអាចជិះម៉ូតូមកដល់ចំណុចកើតហេតុក៏បានដួល ហើយស្របពេលជាមួយគ្នានោះមានរថយន្តធុនធំមិនស្គាល់ម៉ាកបើកមកពីក្រោយក្នុងដំណើរស្របទិសគ្នាមកដល់ក៏កិនជើងទាំងសងខាងបុរសរងគ្រោះចំត្រឹមជង្គង់ចុះក្រោម បណ្តាលឱ្យខ្ទេចខ្វល់ រងរបួសធ្ងន់ធ្ងរ ហើយរថយន្តបានបើកគេចបាត់តែម្តង ។ មូលហេតុដែលប៉ូលិសសង្ស័យបែបនេះព្រោះម៉ូតូពុំមានស្នាមបញ្ជាក់ថាត្រូវរថយន្តបុក ឬកិនឡើយ ៕
ចែករំលែកព័តមាននេះ