ខេត្តកំពង់ចាម ៖ ជនជាតិអូស្រ្តាលី និងប្រពន្ធវ័យចំណាស់ ១គូ បានធ្វើដំណើរតាមនាវាទេសចរណ៍ធុនធំទំនើបមានបន្ទប់ស្នាក់នៅដូចសណ្ឋាគារ បានមកចូលចតនៅច្រាំងទន្លេមេគង្គ ត្រង់ចំណុចម្តុំតោ២ សង្កាត់កំពង់ចាម ក្រុងកំពង់ចាម បានបង្កឲ្យមានការភ្ញាក់ផ្អើល នៅរសៀលថ្ងៃទី០៧ កុម្ភៈ ២០១៤ ដោយសារតែបានបាត់លុយចេញពីទូដែកចំនួន ៦៥០ដុល្លារអូស្រ្តាលី និង ២៥យូរ៉ូ ដោយមានមន្រ្តីនគរបាលប៉ុស្តិ៍សង្កាត់កំពង់ចាម រហូតដល់នគរបាលទេសចរណ៍ខេត្ត នគរបាលការិយាល័យបច្ចេកទេសខេត្ត ចុះទៅពិនិត្យសួរនាំផងដែរ។
តាមសមត្ថកិច្ចមួយរូប បានប្រាប់ឲ្យដឹងថា ជនជាតិបរទេស ដែលបាត់លុយមានឈ្មោះ Yamunarajan ភេទប្រុស អាយុ ៦០ឆ្នាំ បានធ្វើដំណើរតាមនាវាទេសចរណ៍ទំនើប ១គ្រឿង ចេញមកពីរាជធានីភ្នំពេញ ដើម្បីដើរលម្ហែកាយស្រូបយកខ្យល់អាកាសនៅតាមជួរដងទន្លេមេគង្គដល់ក្រុងកំពង់ចាម។ សមត្ថកិច្ចចុះទៅដល់លើនាវាទេសចរណ៍ខាងលើ បានប្រាប់បន្តថា នៅពេលដែលជនជាតិអូស្រ្តាលី និងប្រពន្ធ នាំគ្នាចេញមកបន្ទប់ខាងក្រៅ នៅវេលាម៉ោង ៦ និង ៣០នាទី ល្ងាចថ្ងៃទី០៦ កុម្ភៈ ពេលដែលចាក់សោរបើកទ្វារបន្ទប់វិញ ស្រាប់តែឃើញទ្វារទូដែកចំហរ ដោយបានអះអាងថា បាត់លុយចំនួន ៦៥០ដុល្លារអូស្រា្តលី និង ២៥យូរ៉ូ។
បន្ទាប់មកបានទៅប្តឹងដល់អ្នកគ្រប់គ្រងនាវា ដើម្បីឲ្យជួយអន្តរាគមន៍តាមវែកមុខជនសង្ស័យ។ ជាមួយនោះ អ្នកចាត់ចែងបានហៅអ្នករៀបបន្ទប់ចំនួន ៨នាក់ មកសួរនាំ និងឆែកនៅតាមបន្ទប់គេងរបស់បុគ្គលិកទាំងនេះថែមទៀត នៅតែមិនឃើញលុយដែលភ្ញៀវបាត់។ លុះពេលនាវាមកចូលចតច្រាំងទន្លេមេគង្គក្រុងកំពង់ចាម ក៏មិនឲ្យបុគ្គលិកណាម្នាក់ឡើងទៅលើគោកដែរ ព្រោះខ្លាចដូរលុយ ដែលលួចបានយកទៅបំបែកជាលុយផ្សេងៗ ធ្វើឲ្យពិបាកតាមដាន។
នៅក្នុងពាក្យបណ្តឹងរបស់ភ្ញៀវបរទេសនោះ បានបញ្ជាក់ចុងក្រោយថា ត្រូវតែរកលុយដែលបាត់នោះ ប្រគល់ឲ្យមករូបគាត់វិញ (Yamunarajan) និងឲ្យដាក់ទោសទណ្ឌដល់ជនដែលប្រព្រឹត្តិថែមទៀត។ លោកវរសេនីយ៍ត្រី សំ ផាត អធិការនគរបាលក្រុងកំពង់ចាម បានប្រាប់ឲ្យដឹងថា ករណីខាងលើនេះ ភាគីរងគ្រោះ និងអ្នកគ្រប់គ្រងនាវា បានធ្វើការសម្របសម្រួលគ្នាហើយ៕
ចែករំលែកព័តមាននេះ