ជាទូទៅគេបង្កើតសារមន្ទីរសម្រាប់តម្កល់វត្ថុសិល្បៈបុរាណ ប៉ុន្តែសម្រាប់នៅប្រទេសហូទ្បង់វិញ សារមន្ទីរពេស្យាមួយត្រូវគេបង្កើតទ្បើង ។ សារមន្ទីរនោះ អ្នកបង្កើតមានគោលបំណងទាក់ទាញអ្នកទេសចរឱ្យចូលទស្សនា ។ សារព័ត៌មានបរទេស កាលពីថ្ងៃទី៦ កុម្ភៈ ឆ្នាំ២០១៤ ផ្សាយថា លោកស្រី ម៉េល ស៊័រឌ័រវីន អ្នកបង្កើតសារមន្ទីរពេស្យា ក្នុងទីក្រុងអាំស្ទែរដាម ប្រទេសហូទ្បង់ ឱ្យដឹងថា សារមន្ទីរពេស្យាលើកដំបូងបានបើកឱ្យភ្ញៀវទេសចរចូលទស្សនា ដើម្បីទាក់ទាញចំណាប់អារម្មណ៍ពីអាជីវកម្មពេស្យា ក្នុងក្រុងអាំស្ទែរដាម ព្រោះភ្ញៀវទេសចរភាគច្រើនរមែងចង់ដឹង និងចង់ឃើញថា តើស្ត្រីពេស្យាមានជីវភាពរស់នៅបែបណា និងកើតមានអ្វីខ្លះនៅក្នុងពិភពនេះ?
សារមន្ទីរពេស្យានោះ មានទីតាំងស្ថិតនៅមាត់ស្ទឹងក្នុងទីក្រុងអាំស្ទែរដាម និងស្ថិតនៅចន្លោះពីទីតាំងបម្រើផ្លូវភេទចំនួន២កន្លែងមានឈ្មោះល្បី រួមទាំងជាប្រភពទេសចរណ៍ដ៏គួរឱ្យចាប់អារម្មណ៍ ។ អាជីវកម្មផ្លូវភេទ គឺជាអាជីវកម្មស្របច្បាប់នៅប្រទេសហូទ្បង់ តាំងពីឆ្នាំ២០០០មក និងបច្ចុប្បន្នមានស្ត្រីពេស្យាក្នុងទីក្រុងអាំស្ទែរដាម៧០០០នាក់ ៕
ចែករំលែកព័តមាននេះ