រាជធានីភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នឹងដឹកនំាគណៈប្រតិភូជាន់ខ្ពស់រាជរដ្ឋាភិបាលវិលនិវត្តន៏ពីបំពេញទស្សនកិច្ចផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ នៅម៉ោង៤និង៣០នាទីរសៀលថ្ងៃទី០៧ កុម្ភៈ ២០១៤ ។
បើយោងតាមទូរទស្សន៏ជាតិកម្ពុជា បានឲ្យដឹងថា លទ្ឋផលនៃដំណើរទស្សនកិច្ចនៅក្នុងទីក្រុងវៀងច័ន្ទប្រទេសឡាវ ដែលចាប់ផ្តើមកាលពីថ្ងៃទី០៦កុម្ភៈម្សិលមិញ ប្រមុខរដ្ឋាភិបាលនៃប្រទេសទំាងពីរបាន សំដែងនូវការវាយតំលៃខ្ពស់ និងកោតសរសើរ ចំពោះទំនាក់ទំនងនិងកិច្ចសហប្រតិបត្តិការនៃប្រទេសទាំងពីរកាលពីពេលកន្លងមក។ ជាមួយគ្នានេះប្រមុខរដ្ឋាភិបាលនៃប្រទេសទាំងពីរក៏បានវាយតំលៃខ្ពស់ចំពោះការតភ្ជាប់នូវខ្សែកាប្លិ៍អុបទិករវាងប្រទេសទាំងពីរ ដែលនោះគឺជាការរួមចំណែកដល់ការពង្រីកទំនាក់ទំនង និងការតភ្ជាប់ប្រកបដោយភាពជិតស្និតរវាង រដ្ឋាភិបាល និង ប្រជាពលរដ្ឋនៃប្រទេសទាំងពីរ ។ក្នុងជំនួបពិភាក្សាគ្នាក្នុងទីក្រុងវៀងច័ន្ទនោះដែរ ប្រមុខរដ្ឋាភិបាលនៃប្រទេសទាំងពីរបានធ្វើការពិភាក្សាយ៉ាងស៊ីជំរៅទាក់ទិនទៅនឹងការជំរុញឲ្យមានការពង្រីក ការហោះត្រង់ នៃប្រទេសទាំងពីរឲ្យមានចំនួនទ្វេរដង។ តាមរយៈនេះ សម្តេចតេជោ នាយករដ្ឋមន្ត្រីបានស្នើឲ្យមានការបង្កើតឡើង នូវគណៈកម្មាធិការចំរុះ នៃប្រទេសទាំងពីរក្នុងការកសាងស្ពានឆ្លងកាត់ប្រទេសទាំងពីរក្នុងភូមិសាស្ត្រខេត្តព្រះវិហាររបស់កម្ពុជា ជាមួយនិង ខេត្តចំប៉ាសាក់ របស់ឡាវ ។ ជាមួយគ្នានេះដែរ សម្តេចតេជោ ហ៊ុន សែន ក៏បានស្នើដល់សមភាគីឡាវធ្វើយ៉ាងណាជំរុញទំហំពាណិជ្ជកម្មនៃប្រទេសទាំងពីរឲ្យមានការកើនឡើងទ្វេរដងពោល គឺទំហំពាណិជ្ជកម្មនៃប្រទេសទាំងពីរដែលមានត្រឹមតែ ប្រមាណ ១០ លានដុល្លារអាមេរិក ក្នុងឆ្នាំ ២០០០ ឲ្យកើនដល់ ២០ លានដុល្លារអាមេរិកនៅឆ្នាំ ២០១៤ ឬឆ្នាំ២០១៥។ចំណែកលោកនាយករដ្ឋមន្ត្រីឡាវ ថងស៊ីង ថំាម៉ាវង្ស បានមានប្រសាសន៍ថា ប្រទេសឡាវនិងបន្តសហការយ៉ាងជិតស្និតជាមួយនិងភាគីកម្ពុជា ក្នុងការជំរុញកំណើនសេដ្ឋកិច្ចនិងពាណិជ្ជកម្មនៃប្រទេសទាំងពីរ ។ តាមរយៈនេះភាគីឡាវនិងជំរុញឲ្យការនាំចូលប្រភពថាមពលអគ្គិសនីពីឡាវទៅកាន់ប្រទេសកម្ពុជាឲ្យមានការកើនឡើងពី ១១៥ គីឡូវ៉ុល ដល់ ១៣០ គីឡូវ៉ុល រួមទាំងការការសាងបណ្តាញបញ្ជួនភ្លើងឲ្យកាន់តែទូលំទូលាយថែមទៀត ។
បន្ទាប់ពីពិភាក្សាសម្តេចនាយករដ្ឋមន្រ្តី ហ៊ុន សែន និង លោក ថងស៊ីង ថំាម៉ាវង្ស នាយករដ្ឋមន្រ្តីនៃសាធារណរដ្ឋប្រជាធិបតេយ្យប្រជាមានិតឡាវ ក៏បានអញ្ជើញធ្វើជាសាក្សីក្នុងពិធីចុះហត្ថលេខាលើឯកសារ និង កិច្ចព្រមព្រៀងសំខាន់ៗចំនួន៧ក្នុងនោះរួមមាន ៖
០១-អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការអភិវឌ្ឍន៏វិស័យសុខាភិបាល ។
០២-អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យច្បាប់ និង យុត្តិធ៌ម ។
០៣-អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យវប្បធ៌ម និងសិល្បៈសម្រាប់ឆ្នាំ២០១៤-២០១៧ ។
០៤-កិច្ចព្រមព្រៀង ស្តីពីវិស័យអប់រំសម្រាប់ឆ្នាំ២០១៤-២០១៨ ។
០៥-ផែនការកិច្ចសហប្រតិបត្តិការសម្រាប់ឆ្នាំ២០១៤ រវាងក្រសួងមហាផ្ទៃកម្ពុជានិងក្រសួងសន្តិសុខសាធារណៈឡាវ ។
០៦-អនុស្សារណៈនៃការយោគយល់គ្នាស្តីពីការបង្កើតអគ្គកុងស៊ុលរវាងកម្ពុជា និង ឡាវ ។
០៧-កិច្ចព្រមព្រៀង ស្តីពីការបង្កើតចំណងសម្ព័ន្ឋមេត្រីភាពរវាងរាជធានីភ្នំពេញ និងរដ្ឋធានីវៀងចន្ទ័ ។
ក្រៅពីនេះសម្តេចអគ្គមហាសេនាបតីតេជោ ហ៊ុន សែន បានជួបសម្តែងការគួរសមដាច់ដោយឡែកជាមួយលោក ជួមម៉ាលី សៃញ៉ាសន ប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ និង លោកស្រី ប៉ានី យ៉ាថរទូ ប្រធានសភាជាតិឡាវ ៕
ចែករំលែកព័តមាននេះ