រាជធានីភ្នំពេញ ៖ លោកម៉ម សូណង់ដូ ប្រធានវិទ្យុសំបុកឃ្មុំ លោកស្រីធីតា ឃិះ អ្នកស្រីទេព វន្នី សកម្មជនបឹងកក់ សហគមន៍ថ្មគោល បុរីកីឡា តំណាងសហជីព និងព្រះសង្ឃប្រមាណជាង១០០នាក់ នៅវេលាម៉ោង៨ព្រឹក ថ្ងៃទី៧ កុម្ភៈ ២០១៤បាននាំគ្នាជួបជុំនៅមុខព្រះអង្គដងកើលើកំណាត់វិថីព្រះសីសុវត្ថិ(មុខព្រះបរមរាជវាំង) ស្ថិតក្នុងសង្កាត់ជ័យជំនះ ខណ្ឌដូនពេញ ដើម្បីអុជធូបបួងសួងសុំឱ្យប្រជាពលរដ្ឋខ្មែរជួបតែសុខ សន្តិភាព ជាពិសេសបួងសួងសុំឱ្យមានការដោះលែងមនុស្សចំនួន២៣នាក់ដែលត្រូវបានចាប់ និងឃុំខ្លួននៅពន្ធនាគារត្រពាំងផ្លុងកាលពីថ្ងៃទី២ និងទី៣ ខែមករា ២០១៤។
មន្ត្រីសាលាខណ្ឌដូនពេញដែលឃ្លាំមើលសកម្មភាពនេះបានឱ្យដឹងថា ក្រោយពីអង្គការសង្គមស៊ីវិល តំណាងសហជីព សកម្មជនបឹងកក់ សហគមន៍ថ្មគោល បុរីកីឡា និងព្រះសង្ឃនាំគ្នាអុជធូបរួច ពួកគេក៏បានបង្ហោះប៉េងប៉ោងភ្ជាប់នឹងពាក្យស្លោក ព្រមទាំងលែងចាប ក៏ប៉ុន្តែការប្រមូលផ្តុំនេះមិនមានការអនុញ្ញាតពីសាលារាជធានីភ្នំពេញទេ តែក៏មិនត្រូវបានសមត្ថកិច្ចរារាំងដែរ។
ការជួបជុំគ្នានេះត្រូវបានរំសាយទៅវិញនៅវេលាម៉ោងជាង១០ព្រឹកថ្ងៃដដែល ក្រោមការតាមឃ្លាំមើលពីអាជ្ញាធរមូលដ្ឋាន។ មន្ត្រីដដែលបានបញ្ជាក់ថា នៅព្រឹកថ្ងៃទី១០ កុម្ភៈ ២០១៤ ខាងមុខនេះ នឹងមានការជួបជុំគ្នារវាងតំណាងសហជីពប្រមាណជាង១០០មកពីបណ្តារោងចក្រនៅមុខព្រះអង្គដងកើដើម្បីអុជធូបបួងសួង បង្ហោះប៉េងប៉ោង និងលែងសត្វ ព្រមទាំងដាក់ញ្ញត្តិតាមបណ្តាស្ថានទូតមួយចំនួនដូចជា អាមេរិក ចិន បារាំង អង់គ្លេស និងសុំឱ្យមានការដោះលែងមនុស្ស២៣នាក់ដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ចាម និងស្នើឱ្យមានការចរចាប្រាក់ឈ្នួលឡើងវិញ ៕
ចែករំលែកព័តមាននេះ