រាជធានីភ្នំពេញ ៖ វិស័យវិនិយោគនៅរាជធានីភ្នំពេញ កាន់តែមានភាពទូលំទូលាយ និងជាចំណាប់អារម្មណ៍ខ្លាំងពីសំណាក់អ្នកវិនិយោគក្នុង និងក្រៅប្រទេស ។ ហើយនៅរយៈពេលប៉ុន្មានឆ្នាំចុងក្រោយនេះ គឺបន្ទាប់ពីមានវិបត្តិសេដ្ឋកិច្ចពិភពលោក នៅឆ្នាំ២០០៨ មកវិស័យអចលនទ្រព្យចាប់ផ្តើមស្ទុះងើបគួរឱ្យកត់សម្គាល់ និងមានក្រុមហ៊ុន ក៏ដូចជាភ្នាក់ងារខាងប្រឹក្សាយោបល់ រីកដុះដាលច្រើនផងដែរ ។
តាមព័ត៌មានដែលកោះសន្តិភាពទទួលបានពីក្រុមហ៊ុនអចលនទ្រព្យ ខ្មែរ រៀល អីុស្ទេត ដែលបង្ហាញពីតំបន់ពាណិជ្ជកម្មពិសេសនៅរាជធានីភ្នំពេញ សម្រាប់អ្នកវិនិយោគក្នុង និងក្រៅប្រទេស ។ តំបន់ទាំងនោះមានដូចជា ដី និងអគារពាណិជ្ជកម្ម មាននៅលើបណ្តោយមហាវិថីព្រះមុនីវង្ស មហាវិថីព្រះនរោត្តម ម៉ៅសេទុង មហាវិថីកម្ពុជាក្រោម ព្រះសីហនុ និងមហាវិថីព្រះមុន្នីរ៉េត ។ ចំពោះតំបន់ពាណិជ្ជកម្ម ពិសេសមានដូចជានៅតំបន់បឹងកេងកង១ បឹងកេងកង២ បឹងកេងកង៣ អូឡាំពិក ចតុមុខ ចំការមន ដូនពេញ ៧មករា ទួលទំពូង ទួលគោក ហើយជាពិសេសនោះនៅតំបន់ដីណាដែលនៅជាប់នឹងផ្លូវកែង ។
ក្នុងរបាយការណ៍នោះ ក្រុមហ៊ុនខ្មែរ រៀល អីុស្ទេត ក៏បានឱ្យដឹងពីតំបន់ឧស្សាហកម្ម និងតំបន់ដីលំនៅឋាន ចាប់ពី៥ហិចតាទៅ៥០ហិចតា នៅក្នុងខណ្ឌពោធិ៍សែនជ័យ ខណ្ឌដង្កោ សែនសុខ និងស្ទឹងមានជ័យ សម្រាប់សួនឧស្សាហកម្ម និងតំបន់អភិវឌ្ឍលំនៅឋាន ។ ដោយឡែកសម្រាប់ការវាយតម្លៃអចលនទ្រព្យទាំងនេះ ក្នុងគោលបំណងសម្រាប់ហិរញ្ញវត្ថុ ការវិនិយោគ ការសិក្សាគំរោងបរទេស និងសម្រាប់ធនាគារ ស្ថានទូត ក្រុមហ៊ុនឯកជន និងអ្នកជំនួញផ្សេងៗជាច្រើនទៀត បានជ្រាបពីស្ថានភាពនៃតំបន់។ អ្នកវាយតម្លៃ និងភ្នាក់ងារអចលនទ្រព្យជាច្រើនរូបក៏បានវាយតម្លៃថា នៅតំបន់ប៉ុន្មានខាងលើនេះ សុទ្ធតែជាតំបន់ដែលកំពុងតែមានចំណាប់អារម្មណ៍ពីសំណាក់អ្នកវិនិយោគក្នុងការបណ្តាក់ទុនរកទទួលទានក្នុងវិស័យផ្សេងៗ ដូចជាខាងលំនៅឋាន និងធ្វើជារោងចក្រជាដើម ។ មិនតែប៉ុណ្ណោះនៅតាមតំបន់ផ្សេងៗទៀតនៅរាជធានីភ្នំពេញ ក៏មានសក្តានុពលសម្រាប់អ្នកវិនិយោគមិនចាញ់គ្នាប៉ុន្មាននោះទេ ។
ចែករំលែកព័តមាននេះ