ខេត្ដប៉ៃលិន ៖ ជនសង្ស័យជាកម្មករម្នាក់ត្រូវបានសន្ដិសុខ និងម្ចាស់រោងចក្រកិនម្សៅដំឡូងមី នាំគ្នាចាប់ឃាត់ខ្លួនប្រគល់ឲ្យសមត្ថកិច្ចស្នងការនគរបាលខេត្ត ដោយចោទពីបទលួចយកដែកពីរោងចក្រទៅលក់ឲ្យស្តង់អេតចាយ។ ការចាប់ឃាត់ខ្លួននេះ បានធ្វើឡើងនៅវេលាម៉ោង ៩ និង ៣០នាទី ព្រឹកថ្ងៃទី០៥ កុម្ភៈ ២០១៤ ខណៈដែលបុរសជនសង្ស័យកំពុងដើរតាមបណ្តោយផ្លូវជាតិ៥៧ នៅខាងលិចហាងពិភពពេញចិត្ដ ស្ថិតក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន។
ជនសង្ស័យមានឈ្មោះ ហេង ហៅគា ភេទប្រុស អាយុ ២២ឆ្នាំ ជាកម្មករ ស្នាក់នៅក្នុងភូមិតាគ្រក់ ឃុំត្រែង ស្រុករតនមណ្ឌល ខេត្ដបាត់ដំបង។ តាមប្រភពព័ត៌មានពីសន្ដិសុខយាមរោងចក្រម្សៅមីខាងលើ បានឲ្យដឹងថា ជនសង្ស័យត្រូវជាបងប្អូននឹងគ្នាជាមួយម្ចាស់រោងចក្រ ដោយមុនពេលចាប់ឃាត់ខ្លួន ម្ចាស់រោងចក្របាននាំយកជនសង្ស័យខាងលើមកពីខេត្ដបាត់ដំបង ដើម្បីឲ្យជួយធ្វើការងារ និងមើលកិច្ចការនៅក្នុងរោងចក្ររបស់ខ្លួន។
តែក្រោយពីជនសង្ស័យចូលមកធ្វើការងារនៅក្នុងរោងចក្របានត្រឹមតែ ២ ទៅ ៣ខែ ក៏ធ្វើសកម្មភាពលួចយកដែកពីរោងចក្ររបស់ខ្លួនទៅលក់ដូរឲ្យអ្នកទិញអេតចាយ ហើយដែកនៅក្នុងរោងចក្របានបាត់បង់ជាបន្ដបន្ទាប់ ដូចជា ដែកជ្រុងចំនួន ៦ដើម និងដែកបន្ទះ ចំនួន ៨សន្លឹក ផងដែរ។ បន្ទាប់ពីមានការសង្ស័យ ទើបម្ចាស់រោងចក្រ ព្រមទាំងសន្ដិសុខការពាររោងចក្រ បានលួចតាមដាន និងឃ្លាំមើលជនសង្ស័យខាងលើអស់រយៈពេលយ៉ាងយូរ ទើបចាប់ភស្តុតាងបាន តែជនសង្ស័យបានរត់គេចខ្លួន។
លុះក្រោយមក ពេលដែលសន្តិសុខ និងម្ចាស់រោងចក្រឃើញជនសង្ស័យកំពុងតែដើរម្នាក់ឯងនៅភូមិកើតហេតុខាងលើ ក៏ធ្វើការចាប់ឃាត់ខ្លួនប្រគល់ជូនសមត្ថកិច្ចព្រហ្មទណ្ឌកម្រិតស្រាល នៃស្នងការនគរបាលខេត្តប៉ៃលិន ដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ