ខេត្តប៉ៃលិន ៖ នៅទីបញ្ជាការកងរាជអាវុធហត្ថខេត្ត កាលពីថ្ងៃទី០៥ កុម្ភៈ ២០១៤ លោកឧត្តមសេនីយ៍ឯក ប្រាក់ សិទ្ធ មេបញ្ជាការរងស្នងការ ស្នងការដ្ឋានប្រភពកម្លាំងកងរាជអាវុធហត្ថលើផ្ទៃប្រទេស និងលោកវរសេនីយ៍ទោ ហ្វ្រង់ ស្វ័រដឺប៉េរីយ៉េ ទីប្រឹក្សាបារាំង អមកងរាជអាវុធហត្ថលើផ្ទៃប្រទេស បានជួបសំណេះសំណាល និងសួរសុខទុក្ខដល់នាយ នាយរង និងពលអាវុធហត្ថខេត្ត។
លោកឧត្តមសេនីយ៍ត្រី វ៉ាន់ ណាឡុង មេបញ្ជាការកងរាជអាវុធហត្ថខេត្ត បានធ្វើរបាយការណ៍ពីសកម្មភាព និងលទ្ធផលប្រតិបត្តិការតាមតួនាទីភារកិច្ចរបស់កងរាជអាវុធហត្ថ ក្នុងកិច្ចការពារសន្តិសុខសណ្តាប់ធ្នាប់ជូនប្រជាពលរដ្ឋកាលពីឆ្នាំកន្លងមក ដោយបានទទួលនូវលទ្ធផលល្អប្រសើរ។
ជាក់ស្តែង កងរាជអាវុធហត្ថខេត្ត បានសហការជាមួយសមត្ថកិច្ចពាក់ព័ន្ធ និងអាជ្ញាធរគ្រប់លំដាប់ថ្នាក់ ចុះបង្ក្រាបបទល្មើសនានា ដែលបានកើតឡើងក្នុងភូមិសាស្ត្រ ទទួលខុសត្រូវរបស់ខ្លួនបានទាន់ពេលវេលា ហើយបានថែរក្សា និងការពារសន្តិសុខសណ្តាប់ធ្នាប់ជូនប្រជាពលរដ្ឋ បង្កលក្ខណៈងាយស្រួលដល់បងប្អូនប្រជាពលរដ្ឋ ដែលប្រកបរបររកស៊ីចិញ្ចឹមជីវិតដោយគ្មានការភ័យព្រួយពីអសន្តិសុខអ្វីនោះឡើយ។
លោកវរសេនីយ៍ទោ ហ្វ្រង់ ស្វ័រដឺប៉េរីយ៉េ បានមានប្រសាសន៍ឲ្យដឹងថា ទីប្រឹក្សាបារាំង អមកងរាជអាវុធហត្ថលើផ្ទៃប្រទេស មានតួនាទីភារកិច្ចជួយផ្តល់សម្ភារសម្រាប់ប្រើបាស់លើការស្រាវជ្រាវបទល្មើសនានា ដល់កងរាជអាវុធហត្ថនៅតាមបណ្តាខេត្ត និងសហប្រតិបត្តិការ ក្នុងការជួយបណ្តុះបណ្តាលដល់មន្ត្រីយុត្តិធម៌ ឲ្យមានសមត្ថភាពគ្រប់គ្រាន់ក្នុងការចុះស៊ើបអង្កេតបទល្មើស ដែលបានកើតឡើង។
លោកឧត្តមសេនីយ៍ឯក ប្រាក់ សិទ្ធ ក៏បានកោតសរសើរដល់នាយ នាយរង និងពលអាវុធហត្ថខេត្តទាំងអស់ ដែលបានខិតខំប្រឹងប្រែងបំពេញភារកិច្ចការពារសន្តិសុខសុវត្តិភាពសង្គមបានលទ្ធផលល្អ ជាពិសេសបានពង្រឹងសាមគ្គីភាព និងកិច្ចសហការគ្នាយ៉ាងជិតស្និទ្ធ កសាងអង្គភាពបានរីកចម្រើនគួរឲ្យកត់សម្គាល់។ លោក បានលើកឡើងថា នាយ នាយរង និងពលអាវុធហត្ថ មានភារកិច្ច និងតួនាទីយ៉ាងសំខាន់ក្នុងការថែរក្សាសន្តិសុខ បង្ការ បង្រ្កាប និងជួយសង្គ្រោះដល់ប្រជាពលរដ្ឋ ធានាបាននូវសុខសន្តិភាព ស្ថេរភាពជូនសង្គមជាតិទាំងមូលផងដែរ។
ដូច្នេះ មន្ត្រីកងរាជអាវុធហត្ថទាំងអស់ត្រូវបន្តពង្រឹងកិច្ចសហការជាមួយសមត្ថកិច្ចពាក់ព័ន្ធក្នុងខេត្តឲ្យបានល្អ ដើម្បីរួមគ្នាថែរក្សាការពារសន្តិសុខសណ្តាប់ធ្នាប់ជូនប្រជាពលរដ្ឋគ្រប់ពេលវេលា។ ក្នុងឱកាសនោះ លោកវរសេនីយ៍ទោ ហ្វ្រង់ ស្វ័រដឺប៉េរីយ៉េ ក៏បានប្រគល់ម៉ាស៊ីនថតចម្លង ១គ្រឿង និងសម្ភារមួយចំនួនទៀត ដែលជាអំណោយរបស់ទីប្រឹក្សាបារាំង អមកងរាជអាវុធហត្ថលើផ្ទៃប្រទេស ដល់កងរាជអាវុធហត្ថខេត្តផងដែរ។
នៅថ្ងៃដដែលនោះ លោកឧត្តមសេនីយ៍ឯក ប្រាក់ សិទ្ធ និង លោកវរសេនីយ៍ទោ ហ្វ្រង់ ស្វ័រដឺប៉េរីយ៉េ រួមដំណើរដោយ លោកឧត្តមសេនីយ៍ត្រី វ៉ាន់ ណាឡុង បានចុះត្រួតពិនិត្យសម្ភារ និងអគារ នៅទីបញ្ជាការអាវុធហត្ថខេត្ត ទីបញ្ជាការអាវុធហត្ថក្រុងប៉ៃលិន និងស្រុកសាលាក្រៅ៕
ចែករំលែកព័តមាននេះ