ខេត្តបាត់ដំបង ៖ សមត្ថកិច្ចបានសម្រេចឃាត់ខ្លួនបុរសម្នាក់ កាលពីព្រឹកថ្ងៃទី៥ កុម្ភៈ ដោយផ្អែកលើភស្តុតាងនានា និងការផ្តល់តម្រុយពីសាក្សីផង ដែលសង្ស័យថា ជននេះមានជាប់ពាក់ព័ន្ធនឹងអំពើឃាតកម្មទៅលើស្ត្រីម្នាក់ នៅភូមិទូលច្រនៀង ឃុំបាយដំរាំ ស្រុកបាណន់ កាលពីថ្ងៃចន្ទដើមសប្តាហ៍នេះ ។
ខេត្តបាត់ដំបង ៖ សមត្ថកិច្ចបានសម្រេចឃាត់ខ្លួនបុរសម្នាក់ កាលពីព្រឹកថ្ងៃទី៥ កុម្ភៈ ដោយផ្អែកលើភស្តុតាងនានា និងការផ្តល់តម្រុយពីសាក្សីផង ដែលសង្ស័យថា ជននេះមានជាប់ពាក់ព័ន្ធនឹងអំពើឃាតកម្មទៅលើស្ត្រីម្នាក់ នៅភូមិទូលច្រនៀង ឃុំបាយដំរាំ ស្រុកបាណន់ កាលពីថ្ងៃចន្ទដើមសប្តាហ៍នេះ ។ នាយផ្នែកសំណុំរឿងការិយាល័យព្រហ្មទណ្ឌកម្រិតធ្ងន់លោកសុខ សារិន ឱ្យដឹងថា ជនសង្ស័យដែលត្រូវឃាត់ខ្លួនឈ្មោះយ៉ាន់ ឆេត អាយុ៥៣ឆ្នាំ រស់នៅក្នុងភូមិ-ឃុំកើតហេតុខាងលើ ។
លោកនិយាយថា ក្រោយពីកើតហេតុដោយមានការបំភ្លឺពីសាក្សី និងភស្តុតាងមួយចំនួនដែលសមត្ថកិច្ចស្រាវជ្រាវរកឃើញផងនោះឈ្មោះយ៉ាន់ ឆេត ត្រូវគេសង្ស័យថា អាចពាក់ព័ន្ធក្នុងសំណុំរឿងបទ«ឧក្រិដ្ឋ »នេះ ប៉ុន្តែជននេះបានបដិសេធរាល់ការចោទប្រកាន់ បើទោះជាមានភស្តុតាង និងការចង្អុលបង្ហាញពីសាក្សីក្តី ។ គួរកត់សម្គាល់ថា នៅរសៀលថ្ងៃកើតហេតុបន្ទាប់ពីសាច់ញាតិប្រទះឃើញសពស្ត្រីរងគ្រោះជនសង្ស័យឈ្មោះយ៉ាន់ ឆេត ក៏ត្រូវកម្លាំងកងរាជអាវុធហត្ថស្រុកបាណន់ នាំខ្លួនទៅសួរនាំមួយសន្ទុះដែរ តែបានដោះលែងវិញ ក្រោយពីគ្មានភស្តុតាង និងសាក្សី ដាក់បន្ទុក ។ ទោះបីជាបែបណា បុរសនេះនៅតែស្ថិតក្នុងការសង្ស័យរបស់សមត្ថកិច្ចដដែល ដោយសារតែជននេះមានដីចម្ការនៅក្បែរនោះ និងមានប្រវត្តិធ្លាប់មានទំនាក់ទំនងស្នេហាលួចលាក់ជាមួយស្ត្រីរងគ្រោះដែរ ។ ក្រោយពីកងរាជអាវុធហត្ថដោះលែង ជននេះក៏ត្រូវកម្លាំងនគរបាលស្រុកបាណន់ និងកម្លាំងព្រហ្មទណ្ឌកម្រិតធ្ងន់នៃស្នងការខេត្តនាំខ្លួនទៅសួរនាំម្តង តែបានដោះលែងបុរសនេះវិញ ទៀតក្នុងហេតុផលដូចគ្នាដដែល ។
ប៉ុន្តែកម្លាំងនគរបាលជំនាញមិនបានងាកទៅកំណត់មុខសញ្ញាណាផ្សេងទេ ដោយប្រឹងប្រែងស្វែងរកសាក្សីនិងភស្តុតាងនានា ដើម្បីដាក់បន្ទុកលើបុរសនេះ រហូតឈានដល់ការសម្រេចឃាត់ខ្លួនឈ្មោះយ៉ាន់ ឆេត នេះជាថ្មីនៅព្រឹកថ្ងៃទី៥ កុម្ភៈ តែម្តង ដោយយោងតាមបញ្ជារបស់លោកស្នងការខេត្ត និងមានការឯកភាពពីតំណាងអយ្យការផងដែរ ។ លោកសុខ សារិន នាយផ្នែកសំណុំរឿងបញ្ជាក់ថា ក្រោយពីឃាត់ខ្លួនសមត្ថកិច្ចរកឃើញពូថៅ១ និងអាវដៃវែងពណ៌ផ្ទៃមេឃ១មានស្នាមប្រឡាក់ឈាម ដែលបុរសនេះតែងពាក់ជាប្រចាំទៅចម្ការនៅក្បែរកន្លែងកើតហេតុនោះ ។ ប៉ុន្តែបុរសនេះបានយកអាវនោះទៅបោកគក់ សំលៀងពូថៅ និងផ្លាស់ប្តូរដងពូថៅថ្មីយ៉ាងតក់ក្រហល់ដំណាលគ្នានឹងថ្ងៃកើតហេតុ ដែលគេសង្ស័យសកម្មភាពរបស់ជននេះថា បានព្យាយាមលុបបំបាត់ស្លាកស្នាមភស្តុតាង ។ ម្យ៉ាងទៀតបើតាមការបំភ្លឺពីសាក្សីនានាថា បុរសនេះក៏មានពាក់ព័ន្ធនឹងរឿងស្នេហាលួចលាក់ជាមួយនឹងស្ត្រីរងគ្រោះទៀតផង ។ ទោះជាមានការបំភ្លឺពីសាក្សី និងមានភស្តុតាងដែលអាចដាក់បន្ទុកបានមែន តែជនសង្ស័យឈ្មោះយ៉ាន់ ឆេត មិនបានសារភាពអំពីកំហុសរបស់ខ្លួនដែរ ដោយបដិសេធរាល់ការចោទប្រកាន់ទាំងនេះ ។
បុរសវ័យជាងពាក់កណ្តាលជីវិតរូបនេះបានពន្យល់ប្រាប់សមត្ថកិច្ចអំពីភស្តុតាងដែលសមត្ថកិច្ចរកឃើញនោះថា ពូថៅគឺខ្លួនទើបសំលៀង និងទើបផ្លាស់ប្តូរដងមែន ព្រោះវារលុង រីឯអាវដែលមានប្រឡាក់ដូចឈាមនោះគឺប្រឡាក់ជ័រចេកទេ ។ ប៉ុន្តែបន្តិចក្រោយមកនេះបានបញ្ជាក់ថា អាវនោះគឺប្រឡាក់ជ័រដំឡូងឈាមមាន់ទៅវិញ ហើយការសំលៀងពូថៅ ប្តូរដងថ្មី និងការបោកគក់អាវដែលប្រឡាក់ជ័រដំឡូងឈាមមាន់នោះគឺខ្លួនធ្វើឡើងនៅចំថ្ងៃដែលស្ត្រីរងគ្រោះត្រូវគេសម្លាប់ តែមិនពាក់ព័ន្ធនឹងខ្លួន
ទេ ។ សូមបញ្ជាក់ថា ស្ត្រីរងគ្រោះឈ្មោះហូ ហួច អាយុ៤២ឆ្នាំ ត្រូវជនមិនស្គាល់មុខប្រើពូថៅកាប់សម្លាប់យ៉ាងព្រៃផ្សៃកាលពីថ្ងៃទី៣ កុម្ភៈ គ្រាដែលស្ត្រីរូបនេះដឹកគោយកទៅចងឱ្យស៊ីស្មៅនៅខាងក្រោយភូមិតាមទម្លាប់របស់គាត់ ។ សពស្ត្រីរូបនេះត្រូវសាច់ញាតិស្វែងរកឃើញនៅក្បែរគុម្ពោតព្រៃដោយមានគ្របចំបើង ដើម្បីបិតបាំងផង និងមានស្នាមកាប់ចំនួន២ពូថៅចំកញ្ចឹងកពីក្រោយ ។
លោកជេត វណ្ណនី ស្នងការរងខេត្តបញ្ជាក់ថា តាមការបំភ្លឺរបស់សាក្សី និងភស្តុតាង អាចដាក់បន្ទុកជនសង្ស័យនេះបាន បើទោះជាជនសង្ស័យបានបដិសេធមិនទទួលខុសត្រូវក្តី ។ លោកស្នងការរងរូបនេះនិយាយថា ដោយយោងតាមការបំភ្លឺពីសាក្សី ភស្តុងតាងមួយចំនួនដែលសមត្ថកិច្ចរកឃើញ និងតាមរយៈប្រវត្តិខ្លះៗដែលជននេះមានទំនាក់ទំនងជាមួយស្ត្រីរងគ្រោះកន្លងមក លោកព្រះរាជអាជ្ញា និងលោកស្នងការខេត្តបានសម្រេចបញ្ជាឱ្យឃាត់ខ្លួនជននេះ កសាងសំណុំរឿងបញ្ជូនទៅតុលាការហើយ ដើម្បីរង់ចាំបើកការស៊ើុបអង្កេតជាបន្តទៀត៕
ចែករំលែកព័តមាននេះ