តារាស្គីជប៉ុននាងម៉ាអូ អាសាដា បាននិយាយកាលពីថ្ងៃពុធសប្តាហ៍នេះថា ខ្លួននឹងប្រឹងប្រែងឱ្យអស់ពីលទ្ធភាពធ្វើយ៉ាងណាផ្តួលតារាស្គីកូរ៉េខាងត្បូងនាងគីម យូណា ដណ្តើមយកមេដាយមាសអូឡាំពិករដូវរងា ក្រុងសូជី ឆ្នាំ ២០១៤នេះឱ្យខាងតែបាន ។ ថ្លែងប្រាប់អ្នកកាសែតនៅអាកាសយានដ្ឋានNarita ក្រុងតូក្យូ មុនចាកចេញទៅប្រទេសរុស្ស៊ី ម្ចាស់មេដាយមាសឆ្នាំ ២០០៨និង២០១០រូបនេះបានបញ្ជាក់ថា ៖«ពេលវេលាបានមកដល់ហើយ ។ នោះជាអ្វីដែលខ្ញុំគិត ទាំងសុខភាពរាងកាយ និងទាំងបច្ចេកទេសប្រកួតរបស់ខ្ញុំគឺសុទ្ធតែល្អ ជាពិសេសសម្រាប់ឆ្នាំថ្មីនេះ ខ្ញុំនឹងកែតម្រូវលក្ខខណ្ឌទាំងអស់់របស់ខ្ញុំបន្ទាប់ពីទៅដល់ទីក្រុងសូជី» ។
នាងអាសាដា និងនាងយូណា ដែលមានវ័យ២៣ឆ្នាំដូចគ្នាបានក្លាយជាគូប្រជែងនឹងគ្នាតាំងពីវ័យជំទង់មកម៉្លេះ ។ ពួកគេទាំង២សុទ្ធតែបានអះអាងថា ខ្លួននឹងចូលនិវត្តន៍ពីការប្រកួតនានាបន្ទាប់ពីព្រឹត្តិការណ៍អូឡាំពិកក្រុងសូជីបញ្ចប់ទៅ ។ កាលពីប្រកួតក្នុងព្រឹត្តិការណ៍អូឡាំពិកក្រុងវែនខូវ័រ ប្រទេសកាណាដា ឆ្នាំ២០១០ យូណាបានបំបាក់នាងអាសាដា ដណ្តើមបានមេដាយមាសយកមកគ្រប់គ្រង ។ ដូច្នេះក្នុងព្រឹត្តិការណ៍នៅឆ្នាំនេះ អាសាដាថា គឺជាឱកាសសងសឹកមួយ សម្រាប់រូបនាង ។
ទោះជាយ៉ាងនេះក្តី កាលពីប្រកួតក្នុងព្រឹត្តិការណ៍ជ្រើសរើសជើងឯកពិភពលោកខែមីនា ឆ្នាំកន្លងទៅ យូណា ដណ្តើមបានជើងឯក ខណៈនាងអាសាដា ដណ្តើមបានត្រឹមចំណាត់ថ្នាក់លេខ៣ប៉ុណ្ណោះ ។ នៅរដូវកាលនេះ ពួកគេមិនទាន់បានជួបគ្នាលើទីលានប្រកួតនៅឡើយទេ ។ ចំណែកលោកប្រាយអាន់ អ័រស៊័រ អតីតគ្រូបង្ហាត់នាងយូណា បាននិយាយនៅក្នុងបទសម្ភាសន៍មួយជាមួយកាសែតកីឡាជប៉ុនឈ្មោះ Tokyo Sports កាលពីថ្ងៃពុធថា អូឡាំពិកក្រុងសូជីឆ្នាំនេះគឺដល់វេននាងអាសាដា ឈ្នះមេដាយមាសវិញម្តងហើយ ។ ការអះអាងបែបនេះ ក៏ព្រោះលោកប្រាយអាន់ មើលឃើញថា នាងអាសាដា មានស្នៀតលោត Axel ៣តង់ដ៏មានថាមពល ៕
ចែករំលែកព័តមាននេះ