ទីភ្នាក់ងារព័ត៌មានបរទេសផ្សាយថា ក្រសួងផ្នែកសន្តិសុខផ្ទៃក្នុងរបស់សហរដ្ឋអាមេរិកបានក្រើនរំលឹកដល់ក្រុមហ៊ុនអាកាសចរណ៍ទាំងអស់ ត្រូវប្រុងប្រយ័ត្នលើជើងហោះហើរចេញ-ចូលរុស្ស៊ី ក្នុងអំឡុងពេលប្រកួតកីឡាអូឡាំពិករដូវរងាក្នុងទីក្រុងសូជី ព្រោះទទួលបានរបាយការណ៍ថា ក្រុមភេរវករអាចលាក់គ្រឿងផ្ទុះនៅលើយន្តហោះក្នុងរូបភាពជាថ្នាំដុសធ្មេញ ។
រហូតមកដល់ពេលនេះ គេមិនទាន់ប្រទះឃើញសកម្មភាពណាមួយទាក់ទិនលើការត្រៀមបង្កភេរវកម្មនៅលើដែនដីអាមេរិក ឬជាមួយក្រុមកីឡាករជនជាតិអាមេរិកនៅឡើយទេ ។ ទោះបីយ៉ាងណា ក្រសួងផ្នែកសន្តិសុខផ្ទៃក្នុងអាមេរិកបានស្នើដល់គ្រប់ភាគីទាំងអស់ត្រូវឃ្លាំមើលស្ថានការណ៍នេះឱ្យបានដិតដល់ ។
សេចក្តីថ្លែងការណ៍របស់ក្រសួងផ្នែកសន្តិសុខផ្ទៃក្នុងអាមេរិកនេះបានកើតមានឡើងក្រោយពីនាវាចម្បាំង២គ្រឿងរបស់កងទ័ពអាមេរិកបានរំកិលចូលទៅប្រចាំការនៅបរិវេណសមុទ្រខ្មៅភាគខាងលិចឆៀងខាងត្បូងប្រទេសរុស្ស៊ី ជិតក្រុងសូជីសម្រាប់ផ្តល់ការជួយសង្គ្រោះ ប្រសិនបើមានកើតហេតុការណ៍អាក្រក់ណាមួយក្នុងពេលប្រកួតកីឡាអូឡាំពិករដូវរងា ដែលចាប់ផ្តើមពីថ្ងៃទី៧ ដល់ ២៣ កុម្ភៈ ឆ្នាំ២០១៤ នេះ ៕
ចែករំលែកព័តមាននេះ