ខេត្តបន្ទាយមានជ័យ ៖ ការបិតផ្សាយជាសាធារណៈនូវឯកសារ នៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធ ចំនួន ៣ភូមិ ស្មើ ២,២២៨ក្បាលដី បានធ្វើឡើងនៅព្រឹកថ្ងៃទី០៥ កុម្ភៈ ២០១៤ នៅវត្តកោះកេតអូរប្រាសាទ ភូមិអូរប្រាសាទ ឃុំអូរប្រាសាទ ស្រុកមង្គលបូរី។ ក្នុងពិធីនោះ មានការចូលរួមពីគណៈអធិបតី ឯកឧត្តម គោ ស៊ុំសារឿត អភិបាលខេត្តបន្ទាយមានជ័យ និង លោកវរសេនីយ៍ត្រី រស់ សំបូរ មេបញ្ជាការកងរាជអាវុធហត្ថស្រុកមង្គលបូរី និងប្រធានមន្ទីរពាក់ព័ន្ធជាច្រើនរូបទៀត។
លោក លី សារី ប្រធានមន្ទីររៀបចំដែនដីនគរូបណីយក៍ម្ម សំណង់ និងសូរិយោលដីខេត្ត បានមានមតិរាយការណ៍ថា ការបិតផ្សាយជាសាធារណៈនូវឯកសារ នៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធ ចំនួន ៣ភូមិ មានភូមិគោកអំពិល ភូមិអូរប្រាសាទ ភូមិពោធិ៍រៀង ក្នុងឃុំអូរប្រាសាទ ស្រុកមង្គលបូរី មានចំនួន ២,២២៨ក្បាលដី។
ឯកឧត្តម គោ ស៊ុំសារឿត ក៏បានមានមតិកោតសរសើរចំពោះមន្ត្រីមន្ទីររៀបចំដែនដីនគរូបណីយ៍កម្ម សំណង់ និងសូរិយោលដីខេត្ត ដែលបានខិតខំវាស់វែងដីធ្លីបម្រើប្រជាពលរដ្ឋបានល្អ រហូតបានបិតផ្សាយជាសាធារណៈនូវឯកសារ នៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធនេះ។ ឯកឧត្តមបានផ្តាំផ្ញើដល់មន្ត្រីជំនាញ ដែលបានចុះអនុវត្តការងារបម្រើប្រជាពលរដ្ឋលើវិស័យដីធ្លីនេះ ធ្វើយ៉ាងណាមិនឲ្យមានបាតុភាពណាមួយពាក់ព័ន្ធការទាមទារ និងយកលុយពីប្រជាពលរដ្ឋ ដែលជាអំពើពុករលួយឡើយ។
ចំណែកមន្ត្រីក្រុមប្រឹក្សាឃុំ-សង្កាត់ ទាំងអស់នៅពេលដែលការអនុវត្តន៍វាស់វែងដីធ្លីពាក់ព័ន្ធឯកសារ ពេលប្រជាពលរដ្ឋទៅធ្វើនៅឃុំ-សង្កាត់ មិនត្រូវយកលុយទេ បើមាននឹងត្រូវអនុវត្តន៍តាមផ្លូវច្បាប់៕
ចែករំលែកព័តមាននេះ