ក្រោយការជួបប្រជុំពិភាក្សាគ្នារបស់គណៈប្រតិភូបីនៃប្រទេសកូរ៉េទាំងពីរមក គេបានព្រមព្រៀងគ្នាកាលពីថ្ងៃទី៥ កុម្ភៈ រៀបចំការជួបជុំសាច់ញាតិព្រាត់គ្នាដោយសារសង្គ្រាមកូរ៉េរវាងពី ថ្ងៃទី២០ ទៅ២៥ កុម្ភៈ ខាងមុខនេះ ។ កូរ៉េខាងត្បូង និងកូរ៉េខាងជើងចាប់ផ្តើមកាលពីថ្ងៃទី៥ កុម្ភៈ ពិភាក្សាគ្នាក្នុងកម្រិតប្រតិបត្តិការនៅភូមិជាប់ព្រំដែនបានមុនហ្សូម ដើម្បីពិភាក្សាគ្នាពីភាពលម្អិតនៃការជួបជុំសាច់ញាតិគ្រួសារព្រាត់គ្នា ។ គណៈប្រតិភូបីរបស់ប្រទេសទាំងពីរបានចូលរួមក្នុងកិច្ចប្រជុំនោះ ដែលចាប់ផ្តើមពីម៉ោង១០ព្រឹកទៅនៅ TONGILGAK ជាអគាររដ្ឋបាលមួយស្ថិតនៅផ្នែកកូរ៉េខាងជើងនៃភូមិបានមុនហ្សូម ។
យោងតាមក្រសួងបង្រួបបង្រួមកូរ៉េខាងត្បូងថា ក្រុងសេអ៊ូល និងក្រុងព្យុងយ៉ាងបានព្រមព្រៀងគ្នាធ្វើការចរចារវាងតំណាងកាកបាទក្រហមរបស់ប្រទេសទាំងពីរដើម្បីពិភាក្សាពីការរៀបចំចាំបាច់នានាសម្រាប់ការជួបជុំនោះ ។ ក្រោយការចរចាគ្នា ភាគីទាំងពីរបានព្រមព្រៀងគ្នាថា ការជួបជុំសាច់ញាតិគ្រួសារដែលព្រាត់គ្នាចាប់តាំងពីសង្គ្រាមឆ្នាំ១៩៥០-៥៣ មក នឹងមានរយៈពេល៦ថ្ងៃ គឺពីថ្ងៃទី២០ ដល់២៥ កុម្ភៈ នៅភ្នំទេសចរណ៍ KUMGANG ខាងផ្នែកកូរ៉េខាងជើង ។
ប្រសិនបើអ្វីៗប្រព្រឹត្តទៅដូចការគ្រោងទុកនោះនឹងជាការជួបជុំគ្នាលើកដំបូងរបស់សាច់ញាតិ ដែលព្រាត់គ្នាចាប់តាំងពី៣ឆ្នាំមកហើយ ។ ពេលមានពិធីជួបជុំបែបនេះចំនួន១៨លើករវាងឆ្នាំ១៩៨៥ ទៅ២០១០ មានជនជាតិកូរ៉េប្រមាណជា២២.០០០នាក់បានជួបជាមួយសាច់ញាតិ ៕
ចែករំលែកព័តមាននេះ