ខេត្តកំពង់ធំ ៖ នៅសាលប្រជុំខេត្តកំពង់ធំ (អគារB) កាលពីរសៀលថ្ងៃទី០៤ កុម្ភៈ ២០១៤ មានរៀបចំកិច្ចប្រជុំស្តីអំពីផែនការជាតិប្រឆាំងភេរវកម្ម ឆ្នាំ២០១៤ ក្រោមអធិបតីភាព ឯកឧត្តម អ៊ឹង អៀង សមាជិកលេខាធិការដ្ឋាន គណៈកម្មាធិការជាតិប្រឆាំងភេរវកម្ម ឯកឧត្តម អ៊ុត សំអន អភិបាល នៃគណៈអភិបាលខេត្តកំពង់ធំ ដោយមានការអញ្ជើញចូលរួមពីមេបញ្ជាការប្រដាប់អាវុធទាំង៣ មន្ទីរនានា ជុំវិញខេត្តផងដែរ។
ឯកឧត្តម អ៊ុត សំអន បានមានប្រសាសន៍ថា ក្នុងនាមអាជ្ញាធរខេត្ត សូមសម្តែងនូវសេចក្តីសោមនស្សរីករាយក្រៃលែងចំពោះវត្តមានគណៈអធិបតី ដែលបានឆ្លៀតពេលវេលាដ៏មានតម្លៃអញ្ជើញមកបើកកិច្ចប្រជុំស្តីអំពីផែនការជាតិប្រឆាំងភេរវកម្ម ក្នុងខេត្តកំពង់ធំ នាពេលនោះ។
បន្ទាប់មក ឯកឧត្តម អ៊ឹង អៀង បានអញ្ជើញមានប្រសាសន៍ស្តីអំពីគោលបំណង នៃកិច្ចប្រជុំនាពេលរសៀលនេះ រួមមាន ៤ចំណុច សំខាន់ៗ ទី១. ដោះស្រាយបញ្ហាភេរវកម្ម ដែលអាចនឹងកើតមានឡើង ទី២. រក្សាភាពរលូនក្នុងការប្រតិបត្តិរវាងស្ថាប័នពាក់ព័ន្ធ តាមរយៈការកំណត់តួនាទី ភារកិច្ចច្បាស់លាស់ ទី៣. ការសម្របសម្រួលការងាររវាងស្ថាប័នពាក់ព័ន្ធ តាមរយៈលេខាធិការដ្ឋាន គណៈកម្មាធិការជាតិប្រឆាំងភេរវកម្ម និងទី៤. បង្កើនប្រសិទ្ធភាព នៃការដោះស្រាយដោយធ្វើសុខដុម្យនីយកម្ម នៃអនុសញ្ញាអន្តរជាតិមួយចំនួន ដែលរាជរដ្ឋាភិបាលកម្ពុជា ជាហត្ថលេខី បានតម្រូវឲ្យមានការអភិវឌ្ឍន៍ សន្តិសុខជាក់លាក់ និងកម្រិតថ្នាក់ជាតិ ដូចជា អាកាសចរណ៍ស៊ីវិល និងសន្តិសុខកំពង់ផែ ជាដើម។
ចំណែកតួនាទី និងការទទួលខុសត្រូវរបស់មេបញ្ជាការនៅកន្លែងកើតហេតុ គឺស្នងការរាជធានី និងខេត្ត ត្រូវធ្វើ ១. ត្រួតពិនិត្យកន្លែងកើតហេតុគ្រប់ពេល ២. បញ្ជាគ្រប់អង្គភាពឆ្លើយតបរាជធានី-ខេត្ត នៅក្នុងកម្រិតកលយុទ្ធ ៣. អនុវត្តតាមគោលការណ៍ណែនាំរបស់គណៈបញ្ជាការឯកភាព ក្រុមសម្របសម្រួលឧប្បទ្ទវហេតុ ៤. បង្កើតផែនការ ដើម្បីដោះស្រាយឧប្បទ្ទវហេតុ ៥. ផ្តល់ធនធានសម្រាប់ផែនការទាំងនោះ ៦. អនុវត្តផែនការទាំងនោះ។
ឆ្លៀតក្នុងឱកាសនោះដែរ ឯកឧត្តម ឧត្តមសេនីយ៍ត្រី ផាន់ សុផេង ស្នងការ នៃស្នងការដ្ឋានខេត្ត បានអញ្ជើញមានប្រសាសន៍រាយការណ៍អំពីសភាពការណ៍មួយចំនួន ដែលកងកម្លាំងនគរបាលទូទាំងខេត្តសម្រេចបាន និងធ្វើការស៊ីបអង្កេតបង្ក្រាបបានមុខសញ្ញាមេចោរប្លន់ ចាប់ជំរិតឈ្មោះ តុង ហួន បញ្ជូនទៅកាន់ពន្ធនាគារផ្តន្ទាទោសតាមផ្លូវច្បាប់។ ចំណែកករណីគប់គ្រាប់បែក កាលពីយប់ថ្ងៃទី២៥ មករា ២០១៤ កន្លងទៅថ្មីៗនេះ ដែលបណ្តាលឲ្យស្លាប់មនុស្សចំនួន ១០នាក់ និងរងរបួសធ្ងន់ស្រាល ៣៩នាក់ នោះ វាជារឿងគំនុំ មិនមែនជារឿងភេរវកម្មនោះទេ។
តាមរយៈនៃកិច្ចប្រជុំនេះដែរ ឯកឧត្តម ផាន់ សុផេង បានសំណូមពរតាមរយៈគណៈអធិបតី សូមជួយឧបត្ថម្ភនូវរថយន្តពន្លត់អគ្គីភ័យ រថយន្តសង្គ្រោះ និងរថយន្តអន្តរាគមន៍បន្ថែមទៀត ដើម្បីមានលទ្ធភាពក្នុងការអន្តរាគមន៍ជួយសង្គ្រោះនៅពេលមានឧប្បទ្ទវហេតុកើតឡើង។ បន្ទាប់ពីបានស្តាប់នូវសេចក្តីរាយការណ៍របស់ឯកឧត្តមស្នងការដ្ឋានខេត្តរួចមក ឯកឧត្តម អ៊ឹង អៀង បានមានប្រសាសន៍កោតសរសើរយ៉ាងជ្រាលជ្រៅចំពោះស្នងការដ្ឋាននគរបាលខេត្តកំពង់ធំ ក្នុងការបំពេញកាត្វកិច្ចបម្រើប្រជាពលរដ្ឋ និងប្រទេសជាតិ ចំណែកសំណូមពររបស់ឯកឧត្តមស្នងការ លោកនឹងពាំនាំពាក្យទាំងអស់នេះ ទៅជម្រាបជូនថ្នាក់លើ៕
ចែករំលែកព័តមាននេះ