ខេត្តបន្ទាយមានជ័យ ៖ ល្បែងស៊ីសងអាប៉ោងដុះស្លែក្បែរបន្ទាត់ព្រំដែន ១វង់ ក្នុងភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត ត្រូវបានសមត្ថកិច្ចនគរបាលការពារព្រំដែនគោកលេខ៩១១ ប៉ុស្តិ៍ព្រៃគប់ ធ្វើការបង្ក្រាប កាលពីវេលាម៉ោង ៣ រសៀល ថ្ងៃទី០៤ កុម្ភៈ ២០១៤ ប៉ុន្តែ អ្នកញៀនល្បែងទាំងនោះ បានរត់គេចអស់ទៅហើយ ចាប់បានតែកម្រាលសម្រាប់ចាក់អាប៉ោង និងហៅម្ចាស់ទីតាំងទៅអប់រំជាលើកទី៣។
ម្ចាស់ទីតាំង ដែលអនុញ្ញាតឲ្យគេលេង ដើម្បីបានតុង ហើយត្រូវសមត្ថកិច្ចនាំទៅអប់រំនោះ ឈ្មោះ ឆែ សឿន ភេទស្រី អាយុ ៥៣ឆ្នាំ។ លោក កែវ បូរ៉ា នាយប៉ុស្តិ៍ព្រៃគប់ នៃនគរបាលការពារព្រំដែនគោកលេខ៩១១ បានប្រាប់ថា ស្ត្រីខាងលើត្រូវបានលោកហៅធ្វើកិច្ចសន្យា និងអប់រំ ២លើក រួចមកហើយ ប៉ុន្តែ មិនរៀងចាលសោះ ទើបចាប់អប់រំជាលើកទី៣ និងធ្វើរបាយការណ៍ជូនថ្នាក់លើឲ្យបានដឹង។
លោកនាយប៉ុស្តិ៍បន្តថា ដើម្បីចូលរួមអនុវត្តន៍គោលនយោបាយភូមិ-ឃុំមានសុវត្ថិភាព តាមបទបញ្ជាពី លោកឧត្តមសេនីយ៍ត្រី ខេង ស៊ុំ ស្នងការនគរបាលខេត្ត ក៏ដូចជាការចង្អុលបង្ហាញណែនាំពី លោក សូរ ចាន់ណារី មេបញ្ជាការវរៈ បើគិតតាំងពីឆ្នាំ២០១៣ មកដល់ឆ្នាំ២០១៤ នេះ ករណីបង្រ្កាប និងអប់រំអ្នកញៀនល្បែងបាន ៦លើកហើយ។
គួរបញ្ជាក់ថា មួយរយៈនេះ ថ្វីត្បិតតែសមត្ថកិច្ចព្រំដែន និងសមត្ថកិច្ចនគរបាលរដ្ឋបាល នៅក្រុងប៉ោយប៉ែត បានធ្វើការបង្រ្កាបល្បែងស៊ីសង បៀ អាប៉ោង និងចាក់កន្ទុយលេខជាបន្តបន្ទាប់ក្ដី ប៉ុន្តែ អ្នកស្រុកនៅតែរិះគន់ថា ល្បែងស៊ីសងជល់មាន់បង្កប់ដោយអាប៉ោងបៀចាក់ភ្នាល់គ្នា និងលក់សំបុត្រចូលទស្សនាហូរកញ្ច្រៀវភ្នាល់ប្រាក់ធំៗ ក្នុងបរិវេណកាស៊ីណូហ្គោលដិនក្រោន ហើយអ្នកលេងសុទ្ធតែជាខ្មែរ ពុំមានអ្នកបង្រ្កាបនោះទេ ធ្វើឲ្យអ្នកស្រុកព្រួយបារម្ភពីអំពើចោរកម្ម និងអំពើហិង្សាក្នុងគ្រួសារ៕
ចែករំលែកព័តមាននេះ