ខេត្តកណ្តាល ៖ មានហេតុការណ៍ភ្ញាក់ផ្អើលមួយនៅសាលាបឋមសិក្សាព្រែកអញ្ចាញ ស្ថិតក្នុងភូមិក្រោម ឃុំព្រែកអញ្ចាញ ស្រុកមុខកំពូល កាលពីវេលាម៉ោង ៩ និង ១៥នាទី ព្រឹកថ្ងៃទី០៤ កុម្ភៈ ២០១៤ ដោយមានពាក្យចចាមអារ៉ាមថា មានគ្រូពេទ្យ ១ក្រុម ចុះមកធ្វើការចាក់ថ្នាំបង្ការជំងឺនានា បានធ្វើឲ្យកូនសិស្សនៅក្នុងសាលាខ្លះសន្លប់ និងខ្លះស្លាប់ ហើយក៏ផ្អើលដល់អាណាព្យាបាលរត់មកប្រសេចប្រសាចយកកូនចេញពីសាលារៀនទាំងតក់ក្រហល់។
ការភ្ញាក់ផ្អើលខាងលើត្រូវបានក្រុមអាណាព្យាបាលសិស្សនិយាយឲ្យដឹងថា បន្ទាប់ពីពួកគាត់បានឮអ្នកភូមិនិយាយតៗគ្នាថា មានគ្រូពេទ្យ ១ក្រុម ដែលជាជនជាតិវៀតណាម ចុះមកចាក់ថ្នាំជំងឺដល់សិស្សនៅក្នុងសាលាព្រែកអញ្ចាញ ធ្វើឲ្យកូនសិស្សខ្លះសន្លប់ ខ្លះស្លាប់ ពួកគាត់មានការភ័យស្លន់ស្លោ ក៏រត់ទៅយកកូនចេញពីសាលាមិនឲ្យក្រុមគ្រូពេទ្យទាំងនោះ ធ្វើការចាក់ថ្នាំដល់កូនៗ របស់ពួកគាត់ឡើយ។
លុះពេលមកដល់សាលា ឃើញទ្វារសាលាបិទជិត និងមានសភាពស្ងប់ស្ងាត់ ពួកគាត់ក៏នាំគ្នាផ្លោះរបងចូលទៅក្នុង ហើយក៏នាំកូនចេញពីក្នុងថ្នាក់រៀនបង្កឲ្យមានការភ្ញាក់ផ្អើលពេញទីធ្លាសាលាតែម្តង។
ពាក់ព័ន្ធនឹងករណីខាងលើនេះ អាជ្ញាធរមូលដ្ឋានបានឲ្យដឹងថា ពាក្យចចាមអារ៉ាមដែលថា មានគ្រូពេទ្យ ១ក្រុម ចុះមកធ្វើការចាក់ថ្នាំបង្ការជំងឺនោះ គឺគ្មានទេ ហើយនេះ ជាការបំផុសបំផុលឲ្យមានភាពជ្រួលច្របល់ប៉ុណ្ណោះ។ ចំណែកអាណាព្យាបាល ក៏ដូចជាមាតាបិតាសិស្ស ពេលចូលមកដល់ក្នុងសាលា និងក្នុងថ្នាក់រៀន គឺពួកគាត់មិនបានសួរនាំគ្រូប្រចាំថ្នាក់ ឬនាយកសាលានោះឡើយ៕
ចែករំលែកព័តមាននេះ