ខេត្តក្រចេះ ៖ បើទោះបីជាស្ថានភាពទឹកទន្លេមេគង្គ ក្នុងរមណីយដ្ឋានកាំពីនៅមិនទាន់វិលរកសភាពដើម ស្ថិតក្នុងសភាពជ្រៅនិងហូរខ្លាំងជាងឆ្នាំមុនៗយ៉ាងណាក៏ដោយ ក៏ស្ថានភាពភ្ញៀវទេសចរដែលបានមកលេងកំសាន្ត នៅក្នុងរមណីយដ្ឋានមួយនេះ ក្នុងឱកាសបុណ្យចូលឆ្នាំប្រពៃណីចិន-វៀតណាម គឺមានកំណើនខ្ពស់ជាងឆ្នាំមុន នេះបើតាមការអះអាងរបស់អាជ្ញាធរខេត្ត។
រយៈពេល៣ថ្ងៃក្នុងឱកាសបុណ្យចូលឆ្នាំប្រពៃណីចិន-វៀតណាម គិតចាប់ពីថ្ងៃទី៣០ មករា ដល់ថ្ងៃទី០១ កុម្ភៈ គឺមានភ្ញៀវទេសចរជាតិប្រមាណជាង០២ម៉ឺននាក់ បានមកលេងនៅរមណីយដ្ឋានទឹកជួរទន្លេមេគង្គកាំពី ដែលអាត្រានេះត្រូវបានអាជ្ញាធរចាត់ទុកថាមានកម្រិតខ្ពស់ជាងឆ្នាំមុន។
រមណីយដ្ឋានកាំពី ត្រូវបានអាជ្ញាធរឲ្យជាប់ចំណាត់ថ្នាក់លេខ១ នៃតំបន់អេកូទេសចរណ៏នៅប៉ែកឦសាននៃប្រទេសកម្ពុជា។ រមណីយដ្ឋានមួយនេះ គឺមានចំងាយជាង១៥គីឡូម៉ែត្រពីទីរួមខេត្ត។ គេសង្កេតឃើញថា បើទោះបីជាស្ថានភាពផ្លូវក្រាលកៅស៊ូទៅតំបន់ទេសចរណ៏មួយនេះ មានសភាពតូចចង្អៀតក្តី ក៏រយៈពេលនៃឱកាសបុណ្យចូលឆ្នាំប្រពៃណីចិន-វៀតណាម គឺស្ថានភាពភ្ញៀវទេសចរបានធ្វើដំណើរយ៉ាងសស្រាក់សស្រាំប្រជ្រៀតគ្នា ដោយមធ្យោបាយរៀងខ្លួនតម្រង់ឆ្ពោះទៅលេងនៅតំបន់រមណីយដ្ឋាន មួយចំនួននៅតាមបណ្តោយផ្លូវតូចមួយនេះជាប់នឹងដងទន្លេមេគង្គ។
នៅក្នុងរមណីយដ្ឋានកាំពីគេសង្កេតឃើញថា តាំងពីព្រឹកដល់ព្រលប់ រយៈពេល៣ថ្ងៃជាប់ៗគ្នា នាឱកាសបុណ្យចូលឆ្នាំប្រពៃណីចិន-វៀតណាម គឺមានភ្ញៀវទេសចរបានមកងូតទឹកលេង និងហូបចំណីអាហារយ៉ាងច្រើនកុះករ ដោយខ្លះជាលក្ខណៈគ្រួសារ និងលក្ខណៈមិត្តភក្តិនៅតាមបណ្តារោងក្យូសប្រក់ស្បូវសង់ជាជួរៗរបស់ប្រជាសហគមន៏ ៕
ចែករំលែកព័តមាននេះ