ខេត្តកណ្តាល ៖ ប្រជាពលរដ្ឋនៅខេត្តកណ្តាល និងរាជធានីភ្នំពេញ ពិសេសអ្នករស់នៅក្រុងតាខ្មៅ និងខណ្ឌមានជ័យ រាជធានីភ្នំពេញ មានការត្រេកអរ និងសប្បាយចិត្តយ៉ាងខ្លាំង ដោយបានឃើញសំណង់ស្ពានឆ្លងទន្លេបាសាក់ ហៅស្ពានព្រែកសំរោង បានសាងសង់តភ្ជាប់ហើយ គឺបានប្រមាណ៩៥ភាគរយ នៅតែការកសាងផ្នែកសោភ័ណភាពទៀតប៉ុណ្ណោះ គឺអាចធ្វើដំណើរឆ្លងកាត់បាន និងលែង
ខេត្តកណ្តាល ៖ ប្រជាពលរដ្ឋនៅខេត្តកណ្តាល និងរាជធានីភ្នំពេញ ពិសេសអ្នករស់នៅក្រុងតាខ្មៅ និងខណ្ឌមានជ័យ រាជធានីភ្នំពេញ មានការត្រេកអរ និងសប្បាយចិត្តយ៉ាងខ្លាំង ដោយបានឃើញសំណង់ស្ពានឆ្លងទន្លេបាសាក់ ហៅស្ពានព្រែកសំរោង បានសាងសង់តភ្ជាប់ហើយ គឺបានប្រមាណ៩៥ភាគរយ នៅតែការកសាងផ្នែកសោភ័ណភាពទៀតប៉ុណ្ណោះ គឺអាចធ្វើដំណើរឆ្លងកាត់បាន និងលែងពិបាកឆ្លងទូកដទៀតហើយ ។
លោក ម៉ឹង យូរឡេង ប្រធានមន្ទីរសាធារណការ និងដឹកជញ្ជូនខេត្ត ឱ្យដឹងថា សំណង់ស្ពានឆ្លងទន្លេបាសាក់ ហៅស្ពានព្រែកសំរោង រហូតដល់ពេលនេះ ស្ថាបនាបានប្រមាណ៩៥ភាគរយ ហើយ គឺនៅសល់តែការកសាងផ្នែកសោភ័ណភាព និងការស្ថាបនាផ្លូវនៅគល់ស្ពានទាំងសងខាងទៀតប៉ុណ្ណោះ ។ ស្ពានឆ្លងទន្លេបាសាក់នេះ បានត្រូវស្ថាបនាឡើងដោយក្រុមហ៊ុនសំណង់សៀងហៃ ដែលគ្រោងចំណាយថវិកាប្រមាណ៣៣លានដុល្លារអាមេរិក ជាកម្ចីប្រាក់សម្បទានរបស់ប្រទេសចិន និងមួយចំនួនទៀតជាថវិការបស់រាជរដ្ឋាភិបាលកម្ពុជា ។ ស្ពាននេះជាប្រភេទស្ពានបេតុងខ្សែកាបរឹត មានប្រវែង៨៥៥ម៉ែត្រ ទទឹង១៣ម៉ែត្រកន្លះ មានគន្លងផ្លូវសម្រាប់រថយន្ត៧ម៉ែត្រ គន្លងផ្លូវសម្រាប់ទោចក្រយានយន្ត និងចិញ្ចើមផ្លូវទាំងសងខាង ។ ក្បាលស្ពានត្រើយខាងលិចស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល និងត្រើយខាងកើត ស្ថិតក្នុងភូមិព្រែកចំពុះក្អែក សង្កាត់ព្រែកថ្មី ខណ្ឌមានជ័យ រាជធានីភ្នំពេញ ។
ស្ពាននេះគ្រោងចំណាយពេលសាងសង់ចំនួន៤២ខែ ដែលបានបើកការដ្ឋានសាងសង់កាលពីថ្ងៃទី៦ កក្កដា ឆ្នាំ២០១១ ហើយនឹងត្រូវបញ្ចប់ត្រឹមពាក់កណ្តាលឆ្នាំ២០១៤នេះ ។ ស្ពាននេះមិនត្រឹមតែជួយសម្រួលការកកស្ទះចរាចរណ៍នៅរាជធានីភ្នំពេញ និងជាផ្លូវវាងតែប៉ុណ្ណោះទេ គឺមានប្រយោជន៍ខ្លាំងណាស់ សម្រាប់រួមចំណែកអភិវឌ្ឍន៍ និងជំរុញកំណើនសេដ្ឋកិច្ចសង្គម កាត់បន្ថយភាពក្រីក្ររបស់ប្រជាពលរដ្ឋ ពិសេសបានជួយដល់ប្រជាពលរដ្ឋនៅក្នុងតំបន់ត្រើយខាងកើត និងត្រើយខាងលិចទន្លេបាសាក់ ដែលកន្លងមកមានការលំបាកក្នុងការដឹកជញ្ជូនទំនិញ និងកសិផលផ្សេងៗទៅកាន់ទីផ្សារ ក៏ដូចជាការធ្វើដំណើរត្រូវប្រើរយៈពេលយូរ ត្រូវឆ្លងទូកដ និងចំណាយថវិកាថែមទៀតផង ។
សមិទ្ធផលថ្មីស្ពានឆ្លងទន្លេបាសាក់នេះ គឺជាការស្រមើស្រមៃរបស់ប្រជាពលរដ្ឋនៅតំបន់ត្រើយខាងលិច និងត្រើយខាងកើតទន្លេបាសាក់ជាយូរមកហើយ រហូតមកដល់ពេលនេះ ការស្រមើស្រមៃ និងការរំពឹងទុកនេះ គឺពិតជាបានដូចបំណងមែន ៕
ចែករំលែកព័តមាននេះ