រាជធានីភ្នំពេញ ៖ កម្លាំងនគរបាលអន្តរាគមន៍ខណ្ឌសែនសុខប្រមាណ២០នាក់ ដឹកនាំដោយលោក ម៉ក់ ហុង អធិការនគរបាលខណ្ឌ និងលោក ម៉ូវ ម៉ានិត អភិបាលរងខណ្ឌ បានបើកប្រតិបត្តិការចុះបង្ក្រាបក្រុមអ្នកប្រើប្រាស់ និងចែកចាយគ្រឿងញៀននៅក្នុងផ្ទះជួលមួយកន្លែង ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ កាលពីវេលាម៉ោង១ និង៣០នាទីរំលងអធ្រាត្រ
រាជធានីភ្នំពេញ ៖ កម្លាំងនគរបាលអន្តរាគមន៍ខណ្ឌសែនសុខប្រមាណ២០នាក់ ដឹកនាំដោយលោក ម៉ក់ ហុង អធិការនគរបាលខណ្ឌ និងលោក ម៉ូវ ម៉ានិត អភិបាលរងខណ្ឌ បានបើកប្រតិបត្តិការចុះបង្ក្រាបក្រុមអ្នកប្រើប្រាស់ និងចែកចាយគ្រឿងញៀននៅក្នុងផ្ទះជួលមួយកន្លែង ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ កាលពីវេលាម៉ោង១ និង៣០នាទីរំលងអធ្រាត្រ ឈានចូលថ្ងៃទី៣ កុម្ភៈ ដោយឃាត់ខ្លួនមនុស្ស៤នាក់ ក្នុងនោះមានមន្ត្រីយោធាស័ក្តិ២ ម្នាក់ ជាមួយថ្នាំញៀន៦កញ្ចប់ និងកាំភ្លើងម៉ាកកា៥៩ មួយដើម។
លោក ម៉ក់ ហុង ឱ្យដឹងថា មនុស្ស៤នាក់ដែលនគរបាលឃាត់ខ្លួននេះមាន ១-ឈ្មោះ ពុធ រស្មី អាយុ២៧ឆ្នាំ អះអាងថា ខ្លួនជាមន្ត្រីយោធាពាក់ស័ក្តិ២ ស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ ២-ឈ្មោះ នឹម គឹមសិទ្ធិ អាយុ១៨ឆ្នាំ ស្នាក់នៅសង្កាត់កាកាប ខណ្ឌពោធិ៍សែនជ័យ ៣-ឈ្មោះ សម ចាន់ដារ៉ា អាយុ១៨ឆ្នាំ និង៤-ឈ្មោះ យឿន ចាន់ដារ៉ាវុធ អាយុ១៨ឆ្នាំ ទាំង២នាក់ ស្នាក់នៅផ្ទះជួល ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ ចំណែកថ្នាំញៀន៦កញ្ចប់តូច ត្រូវបាននគរបាលរកឃើញក្នុងស្បែកជើងរបស់មន្ត្រីយោធាស័ក្តិ២ ។ លោកអធិការនគរបាលខណ្ឌសែនសុខ ឱ្យដឹងទៀតថា មុនពេលដឹកនាំកម្លាំងនគរបាលចុះបង្ក្រាបផ្ទះជួលខាងលើ គឺលោកបានទទួលព័ត៌មានពីប្រជាពលរដ្ឋរស់នៅក្បែរៗនោះ ទូរស័ព្ទមកប្រាប់ថា នៅក្នុងផ្ទះជួលនោះ ជារៀងរាល់យប់មានមនុស្សជាច្រើនលួចប្រើប្រាស់ថ្នាំញៀន និងមានការចែកចាយថ្នាំញៀនយ៉ាងសកម្ម ។ ដោយសារទទួលបានព័ត៌មាននេះ លោកក៏ដឹកនាំកម្លាំងនគរបាលអន្តរាគមន៍ខណ្ឌសែនសុខប្រមាណ២០នាក់ ចុះបង្ក្រាបក្នុងផ្ទះជួលនោះភ្លាមៗ និងឃាត់ខ្លួនមនុស្សចំនួន៤នាក់ ។
ក្រោយពេលបង្ក្រាប នគរបាលបានបញ្ជូនមនុស្សទាំង៤នាក់ខាងលើ រួមទាំងវត្ថុតាងទៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីវិធី ៕
ចែករំលែកព័តមាននេះ