ពេលដែលជួបជុំគ្រួសារម្តងៗ អ្នកប្រហែលជាតែងតែលឺពីបទពិសោធន៍ជោគជ័យរបស់បងប្អូនមួយចំនួនក្នុងការងារ ឬអាជីវកម្មរបស់ពួកគេ ឬរឿងដ៏សោកសៅរបស់បងប្អូនផ្សេងទៀតទាក់ទិននឹងកំហុសឆ្គង និងការសម្រេចចិត្តខុសដែលធ្វើឲ្យពួកគេខាតបង់លុយជាច្រើនជាដើម ។
ការធ្វើការសម្រេចចិត្តខុសមិនមែនជារឿងប្លែកទេ ប៉ុន្តែអ្វីដែលសំខាន់ គឺការទទួលស្គាល់កំហុសរបស់ខ្លួន ។ មនុស្សមួយចំនួនប្រព្រឹត្តកំហុសឆ្គងហើយតែមិនទទួលស្គាល់ថា វាជាកំហុសឆ្គងរបស់ខ្លួនឡើយ ។ ផ្ទុយមកវិញ ពួកគេបែរជាស្តីបន្ទោសអ្នកដទៃ ឬសង្គមទៅវិញ និងងាកមកអ្នកឲ្យផ្តល់ជាជំនួយដល់ពួកគេ ។
ដូច្នេះប្រសិនបើ គ្រួសាររបស់អ្នកមានសមាជិកដែលមិនមានទំនួលខុសត្រូវរឿងលុយកាក់ដូចខាងលើ តើអ្នកគួរតែធ្វើដូចម្តេច ?
ចម្លើយដ៏ងាយ គឺអ្នកមិនអាចធ្វើអ្វីឲ្យពួកគេបានទេ ។ អ្នកគ្រាន់តែអាចអង្គុយចុះ និងស្តាប់ពីរឿងហេតុដែលបានកើតឡើងលើពួកគេប៉ុណ្ណោះ ហើយរាល់ដំបូន្មានរបស់អ្នកប្រហែលជាមិនអាចត្រូវបានទទួលយកដោយពួកគេដែរ ។
ផ្ទុយមកវិញ អ្នកគួរតែស្វែងរកចំណុចប្រសព្វ រួចលួចផ្តល់ជាដំបូន្មានដល់ពួកគេជាដើម ។ ឧទាហរណ៍ដូចជា ប្រាប់ពីបទពិសោធន៍របស់អ្នក ឬមនុស្សដែលអ្នកស្គាល់ និងប្រាប់ពីដំណោះស្រាយដែលជោគជ័យពេលដែលជួបបញ្ហាដូច ឬស្រដៀងគ្នាជាដើម ។ ចុះប្រសិនបើក្នុងករណីពួកគេស្នើសុំខ្ចីប្រាក់របស់អ្នកវិញ ? ប្រសិនបើអ្នកគិតថា ពួកគេមិនមានទំនួសខុសត្រូវគ្រប់គ្រាន់ទេនោះ អ្នកមិនគួរមានសម្ពាធក្នុងការយល់ព្រមរហូតទេ ។ លើសពីនេះទៅទៀត អ្នកគួរតែព្យាយាមស្វែងរកវិធីផ្សេង ដើម្បីជួយពួកគេវិញ ។
ឧទាហរណ៍បើសិនបើពួកគេស្នើខ្ចីប្រាក់ ព្រោះតែបាត់បង់ការងារ អ្នកអាចណែនាំពួកគេទៅកាន់ក្រុមហ៊ុន ឬមនុស្សដែលអ្នកស្គាល់ដែលកំពុងតែស្វែងរកបុគ្គលិកជាដើម ។ កត្តាមួយទៀតដែលអ្នកត្រូវចងចាំ គឺជម្លោះក្នុងគ្រួសារជាច្រើនកើតមានឡើងនៅពេលដែលអ្នកព្យាយាមបង្ខំឲ្យមនុស្សម្នាក់ប្រកាន់គំនិត និងតម្លៃដូចអ្នកដែរ ។ មិនថា ម្នាក់នោះជាមិត្ត ឬបងប្អូនអ្នកទេ ការធ្វើដូច្នេះមានតែធ្វើឲ្យអ្នកបាត់បង់ទំនាក់ទំនងល្អជាមួយពួកគេប៉ុណ្ណោះ ។ ផ្ទុយមកវិញ អ្នកគួរតែស្តាប់ពីជីវិតរបស់ពួកគេដោយចងចាំថា ពួកគេជាមនុស្សដែលដើរផ្លូវខុសពីអ្នក ។ អ្នកក៏មិនដឹងដែរថា ដំណោះស្រាយដែលល្អជាងគេសម្រាប់ពួកគេគឺអ្វី ៕ កែសម្រួលដោយ៖សុឃាក់
ចែករំលែកព័តមាននេះ