រាជធានីភ្នំពេញ៖ សមត្ថកិច្ចចំរុះដឹកនំាដោយលោក គិត សុផល មេបញ្ជាការកងរាជអាវុធហត្ថខណ្ឌមានជ័យ និងតំណាងអយ្យការអមសាលាដំបូងរាជធានីភ្នំពេញ នៅម៉ោងល្ងាចថ្ងៃទី០៣ កុម្ភៈ ២០១៤ បានចុះអង្កេតស្រាវជ្រាវករណីការផ្ទុះអាវុធបណ្តាលឲ្យមនុស្សប្រុស២នាក់របួសកាលពីរសៀលថ្ងៃចន្ទនេះ ។
បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឲ្យដឹងដែរថា ក្នុងការចុះស្រាវជ្រាវអង្កេតនៅផ្ទះលេខ ៤៦ ក្រុម១៤ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យនេះដែរ សមត្ថកិច្ចចំរុះបានរកឃើញឧបករណ៏ជាម៉ាស៊ីនកែច្នៃអ្វីម្យ៉ាង ហើយនៅពេលនេះដែរសមត្ថកិច្ចកំពុងបន្តស្រាវជ្រាវបន្តទៀត ។
គួររំលឹកថា មានហេតុការណ៍ផ្ទុះអាវុធមួយបានកើតឡើងនៅចំណុចផ្ទះល្វែងមួយកន្លែងស្ថិតក្នុងទីតំាងខាងលើ កាលពីវេលាម៉ោង១២និង៥០នាទីថ្ងៃទី០៣ កុម្ភៈ ២០១៤ បណ្តាលឲ្យមនុស្សប្រុសពីរនាក់រងរបួសធ្ងន់ ។
បុរសទាំងពីរនាក់ខាងលើនេះ ម្នាក់ឈ្មោះ អែល ហាលី ភេទប្រុស អាយុ៤៤ឆ្នាំ មុខរបរជានគរបាលនៃស្នងការដ្ឋានខេត្តកណ្តាល ជាម្ចាស់កាំភ្លើង ត្រូវរងរបួសត្រកៀកខាងឆ្វេង និងម្នាក់ទៀតឈ្មោះ អ៊ុយ កានកិត្យា ភេទប្រុស អាយុ៣២ឆ្នាំ មុខរបរជាជាងម៉ូតូ ត្រូវរងរបួសប្រអប់ដៃខាងឆ្វេង ។ បើតាមឈ្មោះ អ៊ុយ កានកិត្យា បានឲ្យដឹងថា ខ្លួនឃើញកាំភ្លើងបងប្រុសទុកនៅក្នុងផ្ទះ ទំនងស្រួលក៏ទាញមកអាម៉េលេង ហើយបណ្តាលឲ្យផ្ទុះ ពេលនោះបងប្រុសរបស់ខ្លួន បានដណ្តើមយកកាំភ្លើងពីខ្លួនវិញ ក៍កើតជារឿងហេតុផ្ទុះចំនួនពីរបីគ្រាប់ផ្ទួនៗគ្នា បណ្តាលឲ្យរងរបួសទាំងអស់គ្នាតែម្តង ។
ប៉ុន្តែឈ្មោះ អ៊ុយ កានកិត្យា បាននិយាយត្រង់ចំណុចមួយទៀតថា កាំភ្លើងខាងលើនេះគឺខ្លួនទើបតែដូរម៉ូតូគេយកមកទុកនៅជាប់ខ្លួន ដោយមិនដឹងថា ទុកដើម្បីគោលបំណងអ្វីច្បាស់លាស់នោះទេ ។ ចម្លើយទាំងអស់នេះ សមត្ថកិច្ចមិនទាន់សន្និដ្ឋានយ៉ាងណានៅឡើយទេ គឺសមត្ថកិច្ចកំពុងតែធ្វើការស៊ើបអង្កេតយ៉ាងយកចិត្តទុកដាក់បំផុតលើការស្រាវជ្រាវ ។
សូមបញ្ជាក់ថារវាងឈ្មោះអែល ហាលី និងឈ្មោះអ៊ុយ កានកិត្យា គឺជាបងប្អូនធម៌នឹងគ្នា ដែលក្នុងនោះកាលពីយប់មិញម៉ោង១២រំលងអធ្រាត្រឈ្មោះ អែល ហាលី បានចេញពីធ្វើការចេញទៅស្នាក់នៅក្នុងផ្ទះកើតហេតុខាងលើតាំងពីយប់រហូតដល់វេលាកើតហេតុតែម្តង ។នេះបើតាមការអះអាងរបស់ប្រពន្ធឈ្មោះ អ៊ុយ កានកិត្យា ។បើតាមប្រពន្ធរបស់ អ៊ុយ កានកិត្យា ដដែលបាននិយាយបន្តថា ប្តីរបស់ខ្លួននិងឈ្មោះ អែល ហាលី ដែលជានគរបាលខេត្តកណ្តាល និងធ្វើការមួយកន្លែងទៀត នៅកាស៊ីណូ ណាកា ជាមនុស្សរាប់អានគ្នាល្អូកល្អូនស្រលាញ់គ្នាខ្លាំងណាស់ មិនធ្លាប់មានទំនាស់អ្វីជាមួយ គ្នាឡើយ ហើយក្នុងហេតុការណ៍ផ្ទុះអាវុធនេះ ដំបូងឡើយក៏នាងមិនបានដឹងដែរ ព្រោះនាងនៅក្នុងបន្ទប់ខាងក្រោមជាប់បំពេរ និង បំបៅឲ្យកូនគេង ហើយបុរសជាម្ចាស់កាំភ្លើង និងប្តីរបស់នាងនៅក្នុងបន្ទប់ឡៅតឿ លុះលឺសូរផ្ទុះអាវុធ ទើបនាងស្ទុះចេញមកក្រៅ ក៏ឃើញអ្នកទាំងពីរនាក់កំពុងដេកដួលក្នុងថ្លុកឈាមបង្កការភ្ញាក់ផ្អើលឡើងតែម្តង ។
បើទោះបីជាមានការអះអាងពីប្រភពខ្លះៗខាងលើនេះក្តី ក៏សមត្ថកិច្ចនៅមិនទាន់ជឿ លើការលើកឡើងរបស់ជនរងគ្រោះទាំងពីរដែរ តែសមត្ថកិច្ចកំពុងបន្តធ្វើការស្រាវជ្រាវយ៉ាងយកចិត្តទុកដាក់ និងអាចឈានទៅមានពន្លឺផ្សេងក៏ថាបានដែរ ប៉ុន្តែនគរបាលម្នាក់ទៀតបានបង្ហើបថា ប្រសិនបើរឿងហេតុនេះដូចអ្វីដែលឈ្មោះអ៊ុយ កានកិត្យា បាននិយាយពិតមែន គឺមិនមានបញ្ហាអ្វីនោះទេ ៕
ចែករំលែកព័តមាននេះ