ខេត្តព្រះវិហារ ៖ ច្រកទ្វារអានសេះលើខ្នងភ្នំដងរែក ស្ថិតក្នុងស្រុកជាំក្សាន្ត បច្ចុប្បន្នគឺជាច្រករបៀងមួយសម្រាប់ប្រជាពលរដ្ឋស្រុកជាំក្សាន្ត ធ្វើការដោះដូរទំនិញគ្នាទៅវិញទៅមកជារៀងរាល់ថ្ងៃជាមួយប្រជាពលរដ្ឋថៃ ក្នុងខេត្តឧប៊ុន ។បច្ចុប្បន្នតំបន់ព្រៃភ្នំ ចំណុចច្រកទ្វារអានសេះនេះ កំពុងមានការអភិវឌ្ឍជាបន្តបន្ទាប់ ។ ក្រុមហ៊ុន ទ្រី ភាព គ្រុប បានចូលមកកសាងសណ្ឋាគារនៅតំបន់នោះ រួមមានសណ្ឋាគារសម្រាប់ភ្ញៀវទេសចរ និងអគារកាសីុណូ ដើម្បីទាក់ទាញភ្ញៀវទេសចរជាតិ និងអន្តរជាតិ ហើយក៏នឹងទាក់ទាញអតិថិជន ពាណិជ្ជករធំៗទៅកាន់តំបន់នោះ ដើម្បីទំនាក់ទំនងពាណិជ្ជកម្ម កសិកម្ម ឧស្សាហកម្ម វប្បធម៌ និងទេសចរណ៍ ។
ការអភិវឌ្ឍបែបនេះ ក៏សំដៅធ្វើឱ្យមានទំនាក់ទំនងរវាងប្រជាពលរដ្ឋក្នុងខេត្តព្រះវិហារ និងខេត្តឧប៊ុន និងសីុសាកេត ពិសេសគឺប្រទេសទាំងពីរកម្ពុជា-ថៃ ឱ្យកាន់តែមានភាពល្អប្រសើរឡើង ស្របតាមគោលនយោបាយរបស់រាជរដ្ឋាភិបាលកម្ពុជា ក្នុងការអភិវឌ្ឍនៅតាមបណ្តោយព្រំដែននៃប្រទេសទាំងពីរ ។ លោក អ៊ុំ ម៉ារ៉ា អភិបាលខេត្ត មានប្រសាសន៍ថា ការអភិវឌ្ឍតំបន់នោះ ដោយមានការអនុញ្ញាតពីប្រមុខរាជរដ្ឋាភិបាលកម្ពុជា ក្នុងកិច្ចសហប្រតិបត្តិការល្អរវាងកងកម្លាំងទាំងពីរប្រទេសតាមបណ្តោយព្រំដែន និងការអភិវឌ្ឍច្រករបៀងអានសេះនេះឱ្យក្លាយទៅជាច្រកទ្វារអន្តរជាតិនៅពេលខាងមុខ ។
គោលបំណងគឺធ្វើឱ្យខេត្តព្រះវិហាររបស់កម្ពុជា និងខេត្តឧប៊ុន និងខេត្តសីុសាកេត នៃប្រទេសថៃ មានការអភិវឌ្ឍលើគ្រប់វិស័យជាមួយគ្នា និងដើម្បីកាត់បន្ថយការនាំទំនិញពីរាជធានីភ្នំពេញ មកកាន់ខេត្តព្រះវិហារ ដែលមានចម្ងាយឆ្ងាយជាងការនាំចូលពីប្រទេសថៃ ។ សំខាន់ទៀតនោះ គឺឱ្យប្រជាពលរដ្ឋនៃខេត្តជាប់ព្រំដែនប្រទេសទាំងពីរ មានការដោះដូរទំនិញ ផលិតផលកសិកម្ម និងកសិ-ឧស្សាហកម្ម ។
ចែករំលែកព័តមាននេះ