សារព័ត៌មានបរទេស កាលពីថ្ងៃទី២ កុម្ភៈ ឆ្នាំ២០១៤ ផ្សាយថា លោកអាកាស ស៊ូប៉ាងហ្គាត អ្នកនាំពាក្យឧទ្យានសត្វ ក្រុងសូរ៉ាបាយ៉ា នៅលើកោះជ្វាខាងកើត ប្រទេសឥណ្ឌូណេស៊ី បញ្ជាក់ថា សត្វនាគកូម៉ូដូ មួយក្បាលបានងាប់ដោយមិនដឹងមូលហេតុ ។ អ្នកនាំពាក្យរូបនោះ បញ្ចាក់ថា នាគកូម៉ូដូ អាយុ៧ឆ្នាំ បានងាប់នៅក្នុងទ្រុង កាលពីថ្ងៃទី១ កុម្ភៈ ។ ទោះជាយ៉ាងណាក៏ដោយ លោក ស៊ូប៉ាងហ្គាត បដិសេធការចោទថា ឧទ្យានសត្វព្រងើយកន្តើយមិនយកចិត្តទុកដាក់លើសត្វ ។
ក្រុមប៉ូលិសធ្វើកោសល្យវិច័យលើសត្វងាប់កំពុងស៊ើបអង្កេតរកមូលហេតុពីការងាប់របស់សត្វកូម៉ូដូនោះ ។ ការងាប់របស់កូម៉ូដូ ធ្វើឱ្យឧទ្យានសត្វនៅសល់នាគកូម៉ូដូ ត្រឹមតែ៥៧ក្បាលប៉ុណ្ណោះ ។ ទន្ទឹមនេះតាមការប៉ាន់ប្រមាណមាននាគកូម៉ូដូ រស់នៅជាលក្ខណៈធម្មជាតិប្រហែល២៥០០ក្បាល នៅលើកោះកូម៉ូដូ កោះប៉ាដា និងកោះរីនហ្គា ភាគខាងកើត ប្រទេសឥណ្ឌូណេស៊ី ។
ឧទ្យានសត្វ ក្រុងស៊ូរ៉ាបាយ៉ា មានរហស្សនាមថាជា «ឧទ្យានសត្វមរណៈ» ព្រោះមានសត្វប្រហែល ៣.៥០០ក្បាល ប្រឈមមុខនឹងជំងឺរាតត្បាត អស់រយៈពេលយូរ ធ្វើឱ្យសត្វងាប់មុនអាយុ និងកាលពីខែមុនតោអាហ្វ្រិក ត្រូវគេប្រទះឃើញព្យួរ.កងាប់នៅលើខ្សែកាបក្នុងទ្រុង និងតោញីងាប់ ដោយសារអាកាសធាតុក្តៅ ៕
ចែករំលែកព័តមាននេះ