មានអារម្មណ៍រអើលខ្លាចរាប់រយពាន់បែប ធ្វើឱ្យមនុស្សជាច្រើននៅមិនសុខពេលជួបប្រទះ។ក្នុងការចេញផ្សាយ ថ្មីៗនេះ កាសែត Telegraph សរុបបានជំងឺខ្លាច១៣យ៉ាងកំពុងស្ថិតស្ថិរលើលោក ដែលស្តាប់ទៅមិនគួរឱ្យជឿ ហើយថែមទាំងគួរឱ្យអស់សំណើចទៀតផង តែតាមពិតទៅកំពុងកើតមានប្រាកដមែន ។ ជំងឺខ្លាច១៣យ៉ាងដ៏គួរឱ្យអស់សំណើចនោះ មានដូចតទៅ៖
មានអារម្មណ៍រអើលខ្លាចរាប់រយពាន់បែប ធ្វើឱ្យមនុស្សជាច្រើននៅមិនសុខពេលជួបប្រទះ។ក្នុងការចេញផ្សាយ ថ្មីៗនេះ កាសែត Telegraph សរុបបានជំងឺខ្លាច១៣យ៉ាងកំពុងស្ថិតស្ថិរលើលោក ដែលស្តាប់ទៅមិនគួរឱ្យជឿ ហើយថែមទាំងគួរឱ្យអស់សំណើចទៀតផង តែតាមពិតទៅកំពុងកើតមានប្រាកដមែន ។ ជំងឺខ្លាច១៣យ៉ាងដ៏គួរឱ្យអស់សំណើចនោះ មានដូចតទៅ៖
១-ខ្លាចមាស ឬវត្ថុពណ៌លឿង
អ្នកមានអារម្មណ៍ផ្អើលខ្លាចបែបនេះ តែងភ្ញាក់ហើបខ្លួនស្ទុះថយក្រោយពេលជួបវត្ថុ ឬបាតុភាពអ្វីមានពណ៌លឿង ។ ពួកគេតែងស្រៀវខ្លួនតាំងពីពន្លឺថ្ងៃពណ៌លឿង រហូតដល់ផ្កាផ្សេងៗពណ៌លឿង ហើយសូម្បីមាសពណ៌លឿងក៏ស្រៀវស្ញើបក្នុងការលូកដៃកាន់ ឬស្ទាប ។ មនុស្សមានអារម្មណ៍ផ្អើលបែបនេះ អ្នកខ្លះសូម្បីតែឮគេនិយាយពីពណ៌លឿង ក៏អាចព្រឺសម្បុរគីង្គក់បាន ។
២-ខ្លាចដំចំណីហ្វ្រូម៉ាស
អ្នកមានជំងឺ Turophobia រូបភាពដុំហ្វ្រូម៉ាសតែងធ្វើឱ្យអារម្មណ៍ពួកគេស្រមៃឃើញដល់ការឈឺចាប់អ្វីមួយ ។ មិនថាហ្វ្រូម៉ាសអីុតាលីម៉ាក Mazzarella ឬហ្វ្រូម៉ាសអង់គ្លេសម៉ាក Cheddar ហ្វ្រូម៉ាសដុំធំ ឬដុំតូចទេ ឱ្យតែក្រទ្បេកឃើញតែងស្រៀវខ្លួនស្ទុះថយក្រោយ ។ មានដែរអ្នកជំងឺខ្លះខ្លាចតែហ្វ្រូម៉ាសប្រភេទណាមួយប៉ុណ្ណោះ តែប្រភេទផ្សេងអត់ខ្ចីខ្លាច តែអ្នកជំងឺខ្លះមិនអីុចឹងឯណា ឱ្យតែហ្វ្រូម៉ាសគឺខ្លាចទាំងអស់ ។
៣-ខ្លាចដេក
ជំងឺ Somniphobia តែងលេចទ្បើងពេលត្រូវចូលដេក ដោយអារម្មណ៍ចេះតែ ផ្អើលៗខ្លាចដេកលក់រហូតលែងដឹកខ្លួនវិញ ។ អ្នកខ្លះទៀតឱ្យតែដេកពេលណាដឹងតែសុបិនអាក្រក់ ដូច្នេះវាជាហេតុនាំឱ្យអ្នកនោះ កើតមានជំងឺSomniphobia គឺជំងឺខ្លាចដេក ។
៤-ខ្លាចតួត្លុក
បច្ចុប្បន្ន នៅបស្ចិមប្រទេស ការខ្លាចប្រឈមជាមួយតួត្លុក ដែលមានច្រមុះក្រហមប៉ោង មុខក្រវេមក្រវាម កើតមានច្រើនគួរសម ។តាមការស្រាវជ្រាវឃើញថា ក្មេងៗខ្លាចតួត្លុកច្រើនជាងមនុស្សចាស់ ។ ការខ្លាចប្រឈមជាមួយនាយត្លុក ជួនកាលកើតមានលើមនុស្សល្បីល្បាញទៀតផង ដូចយ៉ាងតារាសម្តែងអង់គ្លេសឈ្មោះ Daniel Red clifte ឬតារាភាពយន្តហូលីវូដ Johnny Depp ជាដើម ។ Depp និយាយត្រង់ៗ៖ «មុខមាត់ក្រវេមក្រវាមរបស់គេ ធ្វើឱ្យយើងយល់មិនបានថាក្នុងក្បាលគេកំពុងគិតអ្វី នៅ សុខៗគេស្ទុះមកខាំមុខយើងឬអត់? រាល់ពេលប្រឈមមុខនាយត្លុក ទោះនាយត្លុករូបណាក៏ដោយ ខ្ញុំតែងមានអារម្មណ៍ ផ្អើលៗបែបនេះជានិច្ច»។
៥-ខ្លាចដើមឈើ
នេះជាជំងឺចម្លែកម៉្យាង ។ ជំងឺHylophobia គឺការស្រៀវខ្លួន ខ្លាចៗនៅចំពោះមុខដើមឈើ ឬព្រៃឈើ ។ ការខ្លាចនេះតែងកើតមានក្រោយពេលកុមារ ឬមនុស្សចាស់ខ្លះមើលភាពយន្ត ឬស្តាប់រឿងព្រេងស្តីពីព្រៃគ្រោះថ្នាក់ ឬដើមឈើសាហាវគួរឱ្យតក់ស្លុត ។ មនុស្សមួយចំនួនមានជំងឺ Hylophobia តាំងពីក្មេង លុះធំទ្បើងក៏នៅតែជំនះភាពរអើលបែបនេះមិនបាន ដល់ថ្នាក់គ្រាន់តែនឹកពីការដើរកម្សាន្តក្នុងឧទ្យាន ក៏ព្រឺខ្លួនមុនទៅហើយ ។
៦-ខ្លាចផ្ចិត
នេះក៏ជាជំងឺចម្លែកគួរឱ្យអស់សំណើច ។ អ្នកមានជំងឺ Omphalophobia តែង ផ្អើលៗខ្លាចមានអ្នកណាប៉ះផ្ចិតខ្លួន ហើយក៏ខ្លាចខ្លួនឯងប៉ះផ្ចិតអ្នកដទៃដូចគ្នា ។ មូលហេតុនាំឱ្យមានអារម្មណ៍បែបនេះ ដោយសារអ្នកនោះ ពេលមើលផ្ចិតខ្លួនឯង ឬមើលផ្ចិតអ្នកដទៃតែងស្រមៃដល់ទងផ្ចិតរតេរតាយនៅក្នុងផ្ទៃម្តាយ ដល់អីុចឹងទៅពេលខ្លះចេះតែមានអារម្មណ៍ ផ្អើលៗដល់ថ្នាក់មិនហ៊ានគិតដល់ផ្ចិតទៀតផង ទោះផ្ចិតខ្លួនឯងក៏ដោយ ។
៧-ខ្លាចបាត់ទូរស័ព្ទ
នេះជាការខ្លាចក្នុងសម័យទំនើប ។ ឈ្មោះជំងឺ Nomophobia លេចទ្បើង៥ឆ្នាំហើយ ពេលអ្នកវិទ្យាសាស្ត្រសម្គាល់ឃើញអារម្មណ៍អ្នកខ្លះ ពេលណាក៏ខ្លាចបាត់ទូរស័ព្ទដៃដែលខ្លួនកំពុងប្រើ ។ តាមការស្រាវជ្រាវ ថ្មីៗនេះ គេរកឃើញថា សព្វថ្ងៃប្រជាជនអង់គ្លេសប្រមាណកន្លះនគរកើតមានជំងឺចម្លែកនេះ ។ ពួកគេតែង ផ្អូចៗនឹកបារម្ភ ក្រែងទៅដល់កន្លែងណាមួយគ្មានសេវាសម្រាប់ទាក់ទងមកអ្នកផ្ទះ ឬខ្លាចទូរស័ព្ទដៃសុខៗ ស្រាប់តែអស់ថ្មដោយចៃដន្យនៅទីនោះ ។ ពេលខ្លះពួកគេ ស្រាប់តែកើតមានអារម្មណ៍តក់ស្លុត ភ្លាមៗពេលងាករកមើលទូរស័ព្ទដៃអត់ឃើញនៅក្បែរខ្លួន ។
៨-ខ្លាចភ្លៀង
អ្នកមានជំងឺ Omprophobia តែងភ័យខ្លាចការធ្លាក់ភ្លៀង ម្តងៗដូចជា ការចាប់ផ្តើមវាយប្រហារអ្វីម៉្យាងដ៏សាហាវមកលើខ្លួន ។ អ្នកវិទ្យាសាស្ត្រគិតថា ការភ័យខ្លាចដែលកើតមានពេលភ្លៀងដូច្នេះ មិនមែនបណ្តាលមកពីកត្តាតែមួយទេ វាអាចរួមមានទាំងកត្តា ក្មេងៗឧស្សាហ៍ត្រូវហាមឃាត់មិនឱ្យប៉ះពាល់ទឹកភ្លៀងផង ព្រោះមានក្មេងខ្លះធ្លាក់ខ្លួនឈឺក្រោយពីឆ្លងកាត់ភ្លៀង។លើសពីនេះ ទិដ្ឋភាពមេឃធ្លាក់ភ្លៀង ច្រើនផ្សារភ្ជាប់អារម្មណ៍ស្រងូតស្រងាត់ ស្រពាប់ស្រពោនទៀត ។
៩-ខ្លាចសម្តេចសង្ឃកាតូលិក
អារម្មណ៍ផ្អើលខ្លាចពេលឃើញសម្តេចសង្ឃកាតូលិក ឬវិមានវា៉ទីកង់ មានមិនច្រើនប៉ុន្មានទេ វាស្ថិតស្ថិរលើមនុស្សមួយចំនួនប៉ុណ្ណោះ ។ ជំងឺនេះច្រើនផ្សារភ្ជាប់ទៅជំងឺ Hierophobia ដែលខ្លាចឃើញពួកបព្វជិតសាសនាគ្រឹស្ត ឬមុខសញ្ញាសាសនានោះ ។ វាក៏មានពាក់ព័ន្ធជំងឺ Hagiophobia ដែលខ្លាចមិនហ៊ានសំទ្បឹងវិហារគ្រឹស្ត ឬបុរាណស្ថានពាក់ព័ន្ធសាសនា ។
១០-ខ្លាចមេឃ
អ្នកមានជំងឺ Ursanophobia តែងមានអារម្មណ៍តក់ស្លុតរាល់ពេលនឹកដល់ផ្ទៃមេឃ និងពិភពផ្សេងនៅខាងក្រៅ ។ ការខ្លាចបែបនេះ ច្រើនកើតមានចំពោះអ្នកជឿលើសាសនាគ្រឹស្ត ដែលគ្រឹស្តបរិស័ទខ្លះជឿស្លុងពេកចេះតែកើតអារម្មណ៍ខ្វល់ខ្វាយគិតដល់ថ្ងៃអវសានពិភពលោក ដែលព្រះជាអ្នកកំណត់ ។
១១-ខ្លាចពុកចង្កាព័ទ្ធដល់ជើងសក់
ពាក្យ Pogonophobia ត្រូវបានគេប្រើតាំងពីឆ្នាំ១៨៥០ សម្រាប់និយាយសំដៅការខ្លាចពុកចង្កាព័ទ្ធដល់ជើងសក់ ។ ថ្មីៗនេះ អ្នកចាត់ចែងកម្មវិធីទូរទស្សន៍អង់គ្លេសម្នាក់ឈ្មោះ Jeremy Paxman ចោទអ្នកដឹកនាំទូរទស្សន៍ BBC ថា ជាមនុស្សមានជំងឺនេះ ក្រោយពេលអ្នកដឹកនាំរូបនេះត្រូវរិះគន់ ព្រោះបង្ហាញខ្លួនជាសាធារណៈជាមួយពុកចង្កាក្រាស់ឃ្មឹកព័ទ្ធដល់ជើងសក់ក្នុងកម្មវិធី Newsnight។
១២-ខ្លាចរន្ធប្រហោង
អ្នកកើតមានជំងឺ Tripophobia តែងខ្លាចរបស់របរមានប្រហោង តូចៗច្រើន ។ សព្វថ្ងៃជំងឺ Tripophobia មិនទាន់ត្រូវបានចាត់ចំណាត់ថ្នាក់ផ្លូវការក្នុងបញ្ជីនៅទ្បើយ ថ្វីបើមានឯកសារជាច្រើនបង្ហាញឱ្យឃើញថា មានមនុស្សរាប់ពាន់នាក់ បានកើតជំងឺនេះក៏ដោយ ។ ក្រុមស្រាវជ្រាវសន្និដ្ឋានថា បណ្តារន្ធប្រហោងស្អេកស្កះទាំងទ្បាយ តែងធ្វើឱ្យអ្នកកើតជំងឺ Tripophobia មានអារម្មណ៍ ផ្អើលៗខ្លាចមានគ្រោះថ្នាក់អ្វីមួយកើតទ្បើងចំពោះខ្លួនចេញពីរន្ធប្រហោងនោះ ។ អ្នកជំងឺ Tripophobia ខ្លាចតាំងពីសម្បុកឃ្មុំ តាំងពីដុំពពុះដុសខ្លួន រហូតដល់ដើមឈើមានប្រហោង តូចៗតាមសម្បកក៏រអាអត់ហ៊ានចូលជិត ។ អាការរោគ Tripophobia ដែលគេសង្កេតឃើញជាច្រើន គឺអ្នកនោះឧស្សាហ៍រកកល់ក្អួតចង្អោរ ដោយគ្មានហេតុផល ជួនរមាស់តាមខ្លួនប្រាណ ឬ សុខៗលេចចេញអាការភិតភ័យយ៉ាងចម្លែក ។
១៣-ខ្លាចលេខ១៣
មនុស្សជាច្រើនដក់អបិយជំនឿពាក់ព័ន្ធដល់លេខ១៣ ប៉ុន្តែមិនមែនអ្នកទាំងនោះគ្រប់គ្នាសុទ្ធតែមានជំងឺនេះទេ ។ ការខ្លាចនេះជួនកាលផ្សារភ្ជាប់ជាមួយខ្លាចថ្ងៃសុក្រ ទី១៣ ទៀតផង ។ អ្នកមានអារម្មណ៍ដិតដាមការខ្លាចលេខ១៣ តែងខំប្រយ័ត្នប្រយែងចំពោះរបស់ប្រើប្រាស់ និងសកម្មភាព ផ្សេងៗពាក់ព័ន្ធដល់លេខ១៣ ៕
ចែករំលែកព័តមាននេះ