ខេត្តរតនគិរី ៖ ទាក់ទិនករណីមហាជនប្រតិកម្មខឹងអ្នកគ្រូពេទ្យឈ្មោះណុប យ៉ុម ប្រចាំការនៅមន្ទីរពេទ្យបង្អែកខេត្តរតនគិរី បានទះកំផ្លៀងនិងប្រើសម្តីគ្មានសុជីវធម៌លើអ្នកជំងឺជនជាតិតិច«គ្រឹង»នោះ ត្រូវបានអ្នកគ្រូពេទ្យរូបនេះបកស្រាយថា ស្ត្រីចំណាស់ជាអ្នកជំងឺ បានមកទទួលសេវាព្យាបាលភ្នែកមានឈ្មោះប៉ង ពាន…
ខេត្តរតនគិរី ៖ ទាក់ទិនករណីមហាជនប្រតិកម្មខឹងអ្នកគ្រូពេទ្យឈ្មោះណុប យ៉ុម ប្រចាំការនៅមន្ទីរពេទ្យបង្អែកខេត្តរតនគិរី បានទះកំផ្លៀងនិងប្រើសម្តីគ្មានសុជីវធម៌លើអ្នកជំងឺជនជាតិតិច«គ្រឹង»នោះ ត្រូវបានអ្នកគ្រូពេទ្យរូបនេះបកស្រាយថា ស្ត្រីចំណាស់ជាអ្នកជំងឺ បានមកទទួលសេវាព្យាបាលភ្នែកមានឈ្មោះប៉ង ពាន អាយុ៥៦ឆ្នាំ រស់នៅភូមិផាកណាម ឃុំកោះពាក្យ ស្រុកវើុនសៃ ខេត្តរតនគិរីបាន ។ សូមរំលឹកថា៖ នរណាទទួលយកបាន…ជាគ្រូពេទ្យបែរទះកំផ្លៀងអ្នកជំងឺ?
អ្នកគ្រូពេទ្យបន្តថា អ្នកជំងឺបានមកសម្រាកព្យាបាលជំងឺភ្នែកកាលពីថ្ងៃទី១៦ រហូតដល់ថ្ងៃទី១៨ កក្កដា ហើយគាត់មកវាស់គំហើញ ដើម្បីធ្វើការវះកាត់ជូនគាត់ក្នុងពេលរសៀលថ្ងៃដដែលនោះ។ ប៉ុន្តែនៅពេល ដែលកំពុងពន្យល់ពីនីតិវិធីវាស់គំហើញ អ្នកជំងឺដែលជាបងប្អូនជនជាតិមិនចេះស្តាប់ភាសា ខ្មែរបានច្បាស់ ហើយមិនព្រមធ្វើតាមការណែនាំរបស់គ្រូពេទ្យ ។ ពេលនោះ រូបគាត់ក៏ប្រើកាយវិការដើរទៅជិតខ្លួន អ្នកជំងឺ ដើម្បីយកដៃទៅបិទភ្នែកឆ្វេងម្តង និងភ្នែកស្តាំម្តងឱ្យគាត់ មើលទៅផ្ទាំងអក្សរគំរូ ហើយពេលនោះអ្នកជំងឺនោះបានអង្គុយបញ្ឈរជង្គង់ និងលើកដៃទាំងពីរមកច្រត់ចង្ការថែមទៀត ។
សកម្មភាពនេះ ជាហេតុធ្វើឱ្យមានការរំខានដល់ការងាវាស់គំហើញ ហើយយកដៃទៅគោះដៃគាត់ឱ្យដាក់ ចុះ និងអង្គុយដាក់ជើងឱ្យត្រង់ចុះក្រោម និងយកដៃទៅគោះថ្ពាល់គាត់ខាងស្តាំ និងចង់ប្រាប់ថា កុំយកដៃ ច្រត់ថ្ពាល់ ចង្ការ និងឱ្យមើលទៅផ្ទាំងអក្សរគំរូ ។ ប៉ុន្តែអ្នកជំងឺនោះ និងកូនៗគាត់មិនយល់ក៏មានការភាន់ ច្រឡំ និងភាសាផង កាយវិការផងថា គ្រូពេទ្យនោះទះកំផ្លៀងគាត់តែម្តង ។ ដោយឡែក សម្រាប់លោកប្រធានផ្នែកចក្ខុរោគបានធ្វើការសម្របស្រួលឱ្យបញ្ចប់ ដោយធ្វើការសុំទោសគ្នាទៅវិញ ទៅមកដល់អ្នកជំងឺ និងកូនៗគាត់ កុំឱ្យមានការភាន់ច្រឡំបន្តទៀតហើយដែរ ។
កត់សម្គាល់ថា ការឈានដល់ក្រសួងសុខាភិបាល បានចេញប្រកាសស្ដីពីការដាក់ទណ្ឌកម្មខាងវិន័យឲ្យស្ថិត នៅក្នុងភាពទំនេរគ្មានប្រាក់បៀវត្ស តាមវិធានការខាងវិន័យរយៈពេលមួយឆ្នាំនោះ គឺបន្ទាប់ពីកូនប្រុសរបស់ស្ត្រីជំងឺប្រើគណនីហ្វេសប៊ុកឈ្មោះ «ដើម្បីប្រជាជនកម្ពុជា» បានបង្ហោះសារបង្ហាញពីការខកចិត្ត ចំពោះសកម្មភាពអ្នកគ្រូពេទ្យដោយស្នើឱ្យថ្នាក់លើរកយុត្តិធម៌ចំពោះម្ដាយខ្លួន ។
កូនប្រុសអ្នកជំងឺបង្ហោះសារថា «យេីងខ្ញុំសែនខកចិត្ត យ៉ាងខ្លាំងចំពោះមន្ទីរពេទ្យបង្អែក ខេត្តរតនគិរី៖ កាលពីថ្ងៃទី១៨ ខែកក្ដដា ឆ្នាំ២០១៩ ខ្ញុំបាននាំអ្នក ម្តាយឈ្មោះប៉ះ ពាល អាយុ៥៦ឆ្នាំ ជនជាតិគ្រឹង មកពីភូមិផាក់ណាម ឃុំកោះពាក់ ស្រុកវ៉េីនសៃ ទៅពិនិត្យជំងឺភ្នែកដល់មន្ទីរពេទ្យ លោកគ្រូពេទ្យប្រាប់អាការ:ជំងឺ គឺមានសភាពធ្ងន់ហេីយត្រូវសំរាកព្យាបាល វះកាត់ ភ្នែករយៈពេលមួយអាទិត្យ យេីងខ្ញុំក៏យល់ព្រមតាម ការណែនាំរបស់គ្រូពេទ្យ។ រឿងដែលហួសចិត្តនោះ គឺទៅដល់អគារផ្នែកភ្នែកបានជួបនឹងអ្នកគ្រូម្នាក់សំដីសំដៅ គ្មានសីលធម៌ វិជ្ជាជីវៈជាពេទ្យសោះ សម្តី កោងកាច តិះដៀល ប្រមាថ មាក់ងាយថា ពួកអាជនជាតិល្ងីល្ងឺ ភ្លីភ្លឺ បិបឹៗ អាចុយម្រាយ ។ ដោយ ភិន ភាគអ្នកគ្រូគ្មានសីលធម៌ម្នាក់នេះ មាឌល្អិត ស្គម សំបុរស តែថ្លេីមធំណាស់ ហ៊ានលេីក ដៃទះកំផ្លៀង ឆ្វេង ស្តាំ និងវាយដៃចាប់ទាញ ជេីង ដូចទាញអុស ខណៈពេល កំពុងធ្វេីការពិនិត្យអ្នកជំងឺ។ អ្នម្តាយ ខ្ញុំមានជំងឺ គរ ថ្លង់ ពិការ ភ្នែក មេីលមិនឃេីញ ហេីយមិនអាចស្តាប់ និងចេះ និយាយភាសាខ្មែរទេ ព្រោះគាត់ជា ស្រីមេម៉ាយជនជាតិដេីមភាគតិច» ។
កោះសន្តិភាព បានទទួលព័ត៌មាននិងស្តាប់ពីអ្នកជំងឺឬអ្នកកំដរផ្សេងៗទៀតបានអះអាងថា អ្នកគ្រូម្នាក់នេះ គឺកាចអាក្រក់ណាស់ គឺតែងតែជេរ និងទះកំផ្លៀងអ្នកជំងឺជារឿយៗអញ្ជឹងឯង ។ មិនដឹងថា គាត់(គ្រូពេទ្យ)នេះ មានខ្សែក្រាសប៉ុណ្ណាទេ ទេីបគ្មាននរណាធ្វេីអីគាត់បាន។ ប្រជាពលរដ្ឋខេត្តរតនគិរី ពេលឈឺគឺត្រូវពឹងពាក់លេពេទ្យជួយសង្គ្រោះ ចុះបើប៉ះគ្រូពេទ្យប្រភេទនេះ តើឱ្យគាត់ទ្រាំចឹងឬ? (សម្រួលដោយ៖ ស្រីណា)
ចែករំលែកព័តមាននេះ