រាជធានីភ្នំពេញ ៖ ជាទិសដៅនៅពេលខាងមុខនេះ កម្ពុជានឹងមានតុលាការពាណិជ្ជកម្ម ដើម្បីដោះស្រាយវិវាទពាណិជ្ជកម្មនៅពេលខាងមុខនេះ ។ នេះបើតាមអ្នកនាំពាក្យក្រសួងយុត្តិធម៌ ។
លោកជិន ម៉ាលីន អ្នកនាំពាក្យក្រសួងយុត្តិធម៌បានឲ្យដឹងថា ក្រោយជំនួបពិភាក្សារវាងលោកអង្គ វង្សវឌ្ឍានា រដ្ឋមន្ត្រីក្រសួងជាមួយលោក Zhang Mingqi អនុប្រធាន និងជាអគ្គលេខាធិការ សមាគមច្បាប់របស់ប្រទេសចិន (China law Society) កាលពីរសៀលថ្ងៃទី២៥ ខែកក្កដា នៅទីស្តីការក្រសួងក្នុងជំនួបភាគីទាំងពីរពង្រឹងកិច្ចសហប្រតិបត្តិការជាមួយគ្នាបន្តទៅមុខទៀតឲ្យកាន់តែប្រសើរ និងមានប្រសិទ្ធិភាពលើវិស័យច្បាប់ ។
អ្នកនាំពាក្យក៏បានឲ្យដឹងថា ក្នុងជំនួបនោះភាគីទាំងពីរបានឯកភាពគ្នាក្នុងការធ្វើការជាមួយគ្នា ពាក់ព័ន្ធនឹងការកែទម្រង់ប្រព័ន្ធយុត្តិធម៌ គឺបង្កើតមជ្ឈមណ្ឌលសន្ធានកម្មក្នុងវិស័យពាណិជ្ជកម្ម ។ មជ្ឈមណ្ឌលនេះនឹងបង្កើតនៅក្នុងក្រសួងយុត្តិធម៌ ដើម្បីផ្តល់នូវការសម្រុះសម្រួលវិវាទផ្នែកពាណិជ្ជកម្មរវាងអ្នកវិនិយោគនៅកម្ពុជាក៏ដូចជា ផ្តល់ជំនួយផ្នែកច្បាប់ដល់អ្នកវិនយោគចិននៅកម្ពុជាជាដើម ។ លោកបញ្ជាក់ថា ៖«អីញ្ចឹងទេ ក្នុងកិច្ចសហប្រតិបត្តិការដែលយើងនឹងធ្វើជាមួយគ្នា គឺភាគីចិននឹងជួយដល់ក្រសួងយុត្តិធម៌កម្ពុជាក្នុងការបង្កើតមជ្ឈមណ្ឌសន្ធានកម្ម ក្នុងវិស័យពាណិជ្ជកម្មនេះដូចជា ជំនួយបច្ចេកទេស ជំនួយហិរញ្ញវត្ថុ និងអ្នកជំនាញការផ្សេងៗក្នុងសិក្សា ដើម្បីបង្កើតមជ្ឈមណ្ឌលនេះ» ។
អ្នកនាំពាក្យដដែលក៏បានឲ្យដឹងថា ការបង្កើតមជ្ឈមណ្ឌលនេះ គឺជាទិសដៅមួយសំខាន់ក្នុងការកែទម្រង់ប្រព័ន្ធយុត្តិធម៌នៅកម្ពុជា ។ ព្រោះថា បច្ចុប្បន្ននេះកម្ពុជាមានមជ្ឈមណ្ឌលសន្ធាន កម្មនេះនៅថ្នាក់មូលដ្ឋាន ឬហៅថា មណ្ឌលសេវាយុត្តិធម៌ក្នុងការផ្តល់ប្រឹក្សាសេវាច្បាប់ដល់ប្រជាពលរដ្ឋក្នុងការដោះស្រាយទំនាស់ក្រៅប្រព័ន្ធតុលាការដល់ប្រជាពលរដ្ឋនៅតាមមូលដ្ឋាន ដែលមានវិវាទនៅថ្នាក់មូលដ្ឋានមានប្រសិទ្ធិភាព ។ លោកបញ្ជាក់ថា ៖«អាឡូវនេះយើងចូលមកបញ្ហាទាក់ទង និងផ្នែកវិវាទពាណិជ្ជកម្ម ដើម្បីកាត់បន្ថយវិវាទពាណិជ្ជកម្មនៅក្នុងតុលាការ ។ បានន័យថា នៅពេលអ្នកវិនិយោគមានវិវាទពាណិជ្ជកម្ម យើងយកបញ្ហានេះប្រឹក្សា និងសម្រុះសម្រួល បើគាត់ព្រមចប់ត្រឹមហ្នឹងយើងចប់ ហើយបើមិនចប់ទេគាត់នឹងបន្តទៅដោះស្រាយនៅតុលាការ ។ យើងនឹងយើងក៏កាត់បន្ថយសំណុំរឿងក្តីនៅតុលាការហើយមានភាពលឿនឆាប់រហ័ស និងកាត់បន្ថយការចំណាយ» ។
ជាមួយគ្នានោះដែរ លោកដែរអ្នកនាំពាក្យក៏បានឲ្យដឹងថា នៅពេលខាងមុខកម្ពុជានឹងបង្កើតតុលាការពាណិជ្ជកម្ម ដើម្បីដោះស្រាយវិវាទពាណិជ្ជកម្ម ។ ប៉ុន្តែការដោះស្រាយ គឺដោះស្រាយតាមប្រព័ន្ធតុលាការពាណិជ្ជកម្ម ។ លោក ជិន ម៉ាលីន អ្នកនាំពាក្យក្រសួងយុត្តិធម៌បានឲ្យដឹងក្រោយជំនួបថា ក្នុងជំនួបពិភាក្សាបានធ្វើការផ្លាស់ប្តូរបទពិសោធន៍ និងរៀនសូត្រពីគ្នាទៅវិញទៅមកពាក់ព័ន្ធនឹងកម្មវិធីកំណែទម្រង់ច្បាប់ និងប្រយុត្តិធម៌នៃប្រទេសទាំងពីរ ។
ជជែកគ្នាក្នុងការពង្រឹង និងកិច្ចសហប្រតិបតិ្តការដែលក្រសួងយុត្តិធម៌មានជាមួយសមាគមន៍ចិននាពេលកន្លងមកដែលកម្ពុជា និងចិនបានធ្វើកិច្ចសហប្រតិត្តិការតាំងពីឆ្នាំ២០០៥មកម្ល៉េះពាក់ព័ន្ធនឹងការពង្រឹងសមត្ថភាព និងបញ្ជូនមន្ត្រីទៅសិក្សាពីគ្នាទៅវិញទៅមកផ្លាស់ប្តូរបទពិសោធនពីគ្នាទៅវិញទៅមកតាមរយៈការស្រាវជ្រាវការបោះពុម្ពផ្សាយឯកសារួមគ្នាក៏ដូចជាការចែករំលែកឯកសារច្បាប់ពាក់ព័ន្ធនឹងវិស័យយុត្តិធម៌ជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ