រាជធានីភ្នំពេញ ៖ មន្ត្រីជាន់ខ្ពស់ក្រសួងកសរបទេស និងសហប្រតិបត្តិការអន្តរជាតិ បានឱ្យដឹងថា បានប្រាប់បណ្តាអង្គទូត ដែលមានវត្តមាននៅកម្ពុជា ថា កម្ពុជាបានជូនដំណឹងជាផ្លូវការដល់ប្រទេសថៃ អំពីការសម្រេចរបស់ខ្លួន…
រាជធានីភ្នំពេញ ៖ មន្ត្រីជាន់ខ្ពស់ក្រសួងកសរបទេស និងសហប្រតិបត្តិការអន្តរជាតិ បានឱ្យដឹងថា បានប្រាប់បណ្តាអង្គទូត ដែលមានវត្តមាននៅកម្ពុជា ថា កម្ពុជាបានជូនដំណឹងជាផ្លូវការដល់ប្រទេសថៃ អំពីការសម្រេចរបស់ខ្លួន ក្នុងការស្វែងរកដំណោះស្រាយ ចំពោះការទាមទារតំបន់ដែនសមុទ្រត្រួតគ្នា ។
យោងតាមសេចក្តីប្រកាសព័ត៌មានរបស់ក្រសួងការបទេស ស្តីពីបទបង្ហាញជូនអង្គទូត ស្តីពីការបញ្ចប់អនុស្សរណៈ នៃការយោគយល់គ្នាឆ្នាំ២០០១ របស់ថៃ និងការវិវត្តន៍បញ្ហាព្រំដែនកម្ពុជា-ថៃ បានលើកឡើងថា នៅរសៀលថ្ងៃទី៦ ខែឧសភា ឆ្នាំ២០២៦ លោកជំទាវ អ៊ាត សោភា រដ្ឋមន្ត្រីស្តីទី នៃក្រសួងការបរទេស និងសហប្រតិបត្តិការអន្តរជាតិ បានធ្វើបទបង្ហាញ ជូនប្រធាន និងតំណាងស្ថានបេសកកម្មការទូត និងអង្គការ-អន្តរជាតិនានា នៅរាជធានីភ្នំពេញ អំពីការវិវត្តថ្មីៗ នៃស្ថានការណ៍ព្រំដែនកម្ពុជា-ថៃ ចាប់តាំងពីខែមករា ឆ្នាំនេះ ។
បទបង្ហាញនេះ ដែលមានការចូលរួមពីសមាជិក នៃស្ថានបេសកកម្មការទូត និងអង្គការអន្តរជាតិនានា ប្រចាំកម្ពុជា ចំនួន៤៣រូប ត្រូវបានធ្វើឡើងស្របពេល ដែលប្រទេសថៃ បានបញ្ចប់ដោយឯកតោភាគី នូវអនុស្សរណៈ នៃយោគយល់គ្នារវាងព្រះរាជាណាចក្រកម្ពុជា និងព្រះរាជាណាចក្រថៃ ទាក់ទងនឹងតំបន់ដែនសមុទ្រទាមទារត្រួតគ្នា នៃខ្ពង់រាបបាតសមុទ្រ (MOU-2001) ។
លោកជំទាវ អ៊ាត សោភា បានចាប់ផ្តើមបទបង្ហាញដោយសម្តែង នូវអំណរគុណយ៉ាងជ្រាលជ្រៅរបស់កម្ពុជា ចំពោះកិច្ចខិតខំប្រឹងប្រែង និងការចូលរួមចំណែករបស់ប្រទេសសមាជិកអាស៊ាន និងប្រទេសជាដៃគូអាស៊ាន ក្នុងការសម្រេចបាននូវកិច្ចព្រមព្រៀងបទឈប់បាញ់ និងការដោះស្រាយវិវាទរវាងកម្ពុជា និងថៃ ដោយសន្តិវិធី ។
លោកជំទាវ បានគូសបញ្ជាក់អំពីតួនាទីដ៏សំខាន់របស់ប្រទេសម៉ាឡេស៊ី និងហ្វីលីពីន ក្នុងនាមជាអតីតប្រធានអាស៊ាន និងប្រធានអាស៊ានបច្ចុប្បន្ន ព្រមទាំងការចូលរួមចំណែកយ៉ាងសំខាន់របស់ប្រទេសចិន និងសហរដ្ឋអាម៉េរិក ក្នុងការសម្របសម្រួលឱ្យមានបទឈប់បាញ់ និងជំរុញកិច្ចខិតខំប្រឹងប្រែង ដើម្បីស្តារ ទំនុកចិត្ត និងទំនាក់ទំនងជាប្រក្រតីឡើងវិញ រវាងកម្ពុជា និងថៃ ។
លោកជំទាវ ក៏បានថ្លែងអំណរគុណដល់ប្រទេសហ្វីលីពីនផងដែរ ចំពោះកិច្ចសម្របសម្រួល ក្នុងការរៀបចំកិច្ចប្រជុំត្រីភាគីរវាងថ្នាក់ដឹកនាំ នៃប្រទេសហ្វីលីពីន កម្ពុជា និងថៃ នៅក្រៅកិច្ចប្រជុំ នឹងប្រព្រឹត្តទៅពីថ្ងៃទី៧-៨ ខែឧសភា ឆ្នាំ២០២៦ នៅកោះសេប៊ូ ។
លោកជំទាវ បានសម្តែងក្តីសង្ឃឹមថា កិច្ចប្រជុំនេះ នឹងទទួលបានលទ្ធផលសំខាន់ៗ និងឈានទៅរកការបន្ធូរបន្ថយស្ថានការណ៍បន្ថែមទៀត។
លោកជំទាវ បានស្វាគមន៍ចំពោះប្រទេសហ្វីលីពីន ដែលបានទទួលតួនាទីជាប្រធានប្តូរវេន នៃក្រុមអ្នកសង្កេតការណ៍អាស៊ាន (AOT) កាលពីចុងខែមុន ។
លោកជំទាវ រដ្ឋមន្ត្រីស្តីទី បានបញ្ជាក់សាជាថ្មី នូវការសោកស្តាយ និងការខកចិត្តយ៉ាងខ្លាំងរបស់កម្ពុជា ចំពោះការសម្រេចរបស់ប្រទេសថៃ ក្នុងការលុបក្របខ័ណ្ឌទ្វេភាគី តែមួយគត់ ដែលបានព្រមព្រៀងគ្នារវាងកម្ពុជា និងថៃ សម្រាប់ដោះស្រាយដោយសន្តិវិធីចំពោះតំបន់ទាមទារដែនសមុទ្រត្រួតគ្នា (OCA) និងសម្រាប់កំណត់ព្រំដែនដែនសមុទ្រ ស្របតាមច្បាប់អន្តរជាតិ ។
លោកជំទាវ បានបញ្ជាក់ថា កម្ពុជាបានជូនដំណឹងជាផ្លូវការដល់ប្រទេសថៃ អំពីការសម្រេចរបស់ខ្លួន ក្នុងការស្វែងរកដំណោះស្រាយ ចំពោះការទាមទារតំបន់ដែនសមុទ្រត្រួតគ្នានេះ តាមរយៈយន្តការផ្សះផ្សាដោយបង្ខំ ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ។
ដើម្បីផ្តល់ជាទស្សនៈទានទាក់ទងនឹងទំហំ និងវិសាលភាព នៃបញ្ហាដែលតម្រូវឱ្យមានការដោះស្រាយជាបន្ទាន់ ដើម្បីស្តារសន្តិភាព និងទំនាក់ទំនងភាពជាអ្នកជិតខាងប្រកបដោយសុខដុមរមនារវាងកម្ពុជា និងថៃ ឡើងវិញ លោកជំទាវ ក៏បានសម្របសម្រួលឱ្យមានការធ្វើបទបង្ហាញស្តីពីស្ថានការណ៍បច្ចុប្បន្ន នៃតំបន់ព្រំដែន រវាងប្រទេសទាំងពីរ បន្ទាប់ពីបទឈប់បាញ់ថ្ងៃទី២៧ ខែធ្នូ ឆ្នាំ២០២៥។
លោកជំទាវរដ្ឋមន្ត្រីស្តីទី បានបញ្ជាក់ ជាថ្មីនូវការប្តេជ្ញាចិត្តដ៏មុតមាំរបស់កម្ពុជាក្នុងការស្វែងរកដំណោះស្រាយជម្លោះព្រំដែនទាំងអស់ជាមួយ ប្រទេសថៃ តាមរយៈមធ្យោបាយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីដែលមានស្រាប់ ព្រមទាំងប្រកាន់ខ្ជាប់នូវជំហរជាគោលការណ៍របស់ខ្លួនថា ព្រំដែនមិនត្រូវបានផ្លាស់ប្តូរដោយការប្រើកម្លាំង នោះឡើយ ៕
ចែករំលែកព័តមាននេះ