ប្រទេសហ្វីលីពីន ៖ នាយករដ្ឋមន្ត្រីកម្ពុជា និងថៃ បានពិភាក្សាគ្នា លើការបន្ធូរបន្ថយភាពតានតឹង និងវិធានការកសាងទំនុកចិត្ត ដើម្បីស្តារ និងពង្រឹងក្របខ័ណ្ឌការងារ ដែលមានដំណើរការសម្រាប់ការរក្សាសន្តិភាពយូរអង្វែង…
ប្រទេសហ្វីលីពីន ៖ នាយករដ្ឋមន្ត្រីកម្ពុជា និងថៃ បានពិភាក្សាគ្នា លើការបន្ធូរបន្ថយភាពតានតឹង និងវិធានការកសាងទំនុកចិត្ត ដើម្បីស្តារ និងពង្រឹងក្របខ័ណ្ឌការងារ ដែលមានដំណើរការសម្រាប់ការរក្សាសន្តិភាពយូរអង្វែង និងធ្វើឱ្យទំនាក់ទំនងវិលទៅរកភាពប្រក្រតីឡើងវិញ។ នេះបើតាមប្រសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានមានប្រសាសន៍នៅក្នុងសន្និសីទកាសែត ក្រោយជំនួបត្រីភាគីរវាងសម្តេច និងនាយករដ្ឋមន្ត្រីថៃ និងប្រធានាធិបតីហ្វីលីពីន លោក Ferdinand Marcos ។
សម្តេច បានមានប្រសាសន៍ថា យើងបានពិភាក្សាអំពីការបន្តឡើងវិញ នូវរាល់យន្តការ ដែលមានស្រាប់ ជាពិសេសគឺ JBC, GBC និង RBC ខណៈដែលរដ្ឋាភិបាលថ្មី នៃប្រទេសថៃ បានចាប់ផ្តើមដំណើរការការងារពេញលេញរបស់ខ្លួន ។
កម្ពុជាវាយតម្លៃខ្ពស់ចំពោះតួនាទីដ៏សំខាន់របស់ក្រុមអ្នកសង្កេតការណ៍អាស៊ាន (AOT) និងសូមថ្លែងអំណរគុណដល់បណ្តាប្រទេសជាសមាជិកអាស៊ាន សម្រាប់ការគាំទ្រ និងការរួមចំណែកជាបន្តបន្ទាប់។ កម្ពុជាបានស្វាគមន៍ចំពោះប្រទេសហ្វីលីពីន ដែលបានទទួលតួនាទីដឹកនាំបន្តពីប្រទេសម៉ាឡេស៊ី។ កម្ពុជាបានផ្តល់កិច្ចសហប្រតិបត្តិការពេញលេញ និងបានអំពាវនាវឱ្យពង្រឹងតួនាទីរបស់ AOT ដើម្បីផ្ទៀងផ្ទាត់ និងធានានូវការអនុវត្តបទឈប់បាញ់ និងរាល់វិធានការនានា ដែលបានព្រមព្រៀងគ្នា ។
យើងក៏បានលើកឡើងពីសារៈសំខាន់ នៃការផ្លាស់ប្តូររវាងប្រជាជន និងប្រជាជន រួមទាំងតាមរយៈសមាគមមិត្តភាពកម្ពុជា-ថៃ ដែលជាសសរស្តម្ភបំពេញបន្ថែម ក្នុងការកសាងទំនុកចិត្ត និងការលើកកម្ពស់ការយោគយល់គ្នាទៅវិញទៅមក ។
បោះជំហានទៅមុខ យើងបានប្រគល់ភារកិច្ចឱ្យរដ្ឋមន្ត្រីការបរទេស នៃប្រទេសទាំងពីរ ចូលរួមក្នុងកិច្ចពិភាក្សាបន្ថែមឱ្យកាន់តែលម្អិត និងបន្តអនុវត្តការងារទាំងនោះតាមរបៀបជាក់ស្តែង និងផ្ដោតលើលទ្ធផល ដូចអ្វីដែលលោកប្រធានាធិបតីបានលើកឡើង ៕
ចែករំលែកព័តមាននេះ