ខេត្តបាត់ដំបង ៖ នាយការិយាល័យដែលទើបឡើងថ្មីមួយរូបនៅក្នុងស្នងការដ្ឋានខេត្ត បាននិងកំពុងរងការរិះគន់មិនឈប់ឈរពីមហាជន ដោយសារតែប្រកាសចូលកាន់តំណែងមិនទាន់បានប៉ុន្មានខែផង ស្រាប់តែមន្ត្រីរូបនេះ បានដើររៃអង្គាសប្រាក់ពីអាជីវករ ឬឈ្មួញលក់ទំនិញនានាពេញទឹកពេញដីនៅក្នុងខេត្ត ដោយគ្មានហេតុផលច្បាស់លាស់ និងគ្មានលិខិតស្នាមបញ្ជាក់ពីអង្គភាពត្រិមត្រូវ…
ខេត្តបាត់ដំបង ៖ នាយការិយាល័យដែលទើបឡើងថ្មីមួយរូបនៅក្នុងស្នងការដ្ឋានខេត្ត បាននិងកំពុងរងការរិះគន់មិនឈប់ឈរពីមហាជន ដោយសារតែប្រកាសចូលកាន់តំណែងមិនទាន់បានប៉ុន្មានខែផង ស្រាប់តែមន្ត្រីរូបនេះ បានដើររៃអង្គាសប្រាក់ពីអាជីវករ ឬឈ្មួញលក់ទំនិញនានាពេញទឹកពេញដីនៅក្នុងខេត្ត ដោយគ្មានហេតុផលច្បាស់លាស់ និងគ្មានលិខិតស្នាមបញ្ជាក់ពីអង្គភាពត្រិមត្រូវ ។ មិនតែបំ់ុណ្ណោះ សូម្បីតែមន្ត្រីនៅក្នុងអង្គភាពជាមួយគ្នា ក៏បានរិះគន់អំពីសកម្មភាពលោកនាយការិយាល័យរូបនេះដែរថា កំពុងធ្វើឲ្យប៉ះពាល់យ៉ាងខ្លាំងដល់មុខមាត់ថ្នាក់ដឹកនាំ និងអង្គភាពស្នងការទាំងមូលទៀតផង។
ប្រភពពីមន្ត្រីស្នងការខេត្តបានប្រាប់ថា មន្ត្រីដែលកំពុងបង្កបញ្ហាធ្វើឲ្យប៉ះពាល់ដល់មុខមាត់ស្នងការខេត្តនេះ ឈ្មោះ វិន នល់ មានតូនាទីជានាយការិយាល័យគ្រប់គ្រងសន្តិសុខឯកជននៃស្នងការដ្ឋានខេត្តបាត់ ដំបង ។ មន្ត្រីរូបនេះ ទើបប្រកាសតែងតាំងតួនាទីនាយការិយាល័យគ្រប់គ្រងសន្តិសុខឯកជន កាលពីអំឡុងខែមីនាកន្លងទៅនេះ ប៉ុន្តែឡើងធ្វើធំមិនទាន់បានប៉ុន្មានខេត្តផង ស្រាប់តែលោកនាយការិយាល័យរូបនេះ ធ្វើសកម្មភាពដើររៃអង្គាសប្រាក់ពីបណ្ដាអាជីវករ ឈ្មួញលក់ទំនិញ ឬ ពីថៅកែក្លឹបកំសាន្តនានា នៅក្នុងក្រុងបាត់ដំបង។
ប្រភពដដែលបានបញ្ជាក់ថា សកម្មភាពរបស់លោកវិន នល់ បានធ្វើឲ្យមានការរិះគន់យ៉ាងខ្លាំងពីមហាជន រួមទាំងមន្ត្រីមួយចំនួន មិនថា នៅក្នុងអង្គភាព ឬនៅតាមបណ្ដាស្ថាប័នដទៃឡើយ ដោយសារតែប្រធានការិយាល័យទើបចូលកាន់តំណែងថ្មីរូបនេះ ដើរសុំប្រាក់គេដោយគ្មានហេតុផលច្បាស់លាស់ និងគ្មានសិខិតសស្នាមអនុញាតិត្រិមត្រូវបញ្ជាក់ពីអង្គភាព ។ ពាក់ព័ន្ធនឹងសកម្មភាពដើរសុំប្រាក់នេះ បើតាមព័ត៌មាននានាបានឲ្យដឹងថា លោកវិន នល់ បានដើរសុំប្រាក់ពីថៅក្លិបកម្សាន្តថៅកែក្លិប ខារ៉ាអូខេ ឬ តាមថៅកែដឹកទំនិញនានា ។
មិនតែប៉ុណ្ណោះ សូម្បីតែមន្ត្រីនៅក្នុងអង្គភាពជាមួយគ្នា ក៏លោកវិល នល់ ហារមាត់សុំប្រាក់ដោយគ្មានការអៀនខ្មាស់ដែរ។ កាន់តែធ្ងន់ធ្ងរជាងនេះ បើតាមប្រភពពីមន្ត្រីក្នុងអង្គភាព បានបញ្ជាក់ថា កន្លងទៅថ្មីៗនេះ លោកវិន លន់ បានព្យាយាមទំនាក់ទំនងទៅកាន់ក្រុមហ៊ុនផលិតស៊ីម៉ង់ត៏ដ៏ធំមួយ នៅស្រុករតនមណ្ឌល ស្នើរសុំស៊ីម៉ង់រាប់តោនដោយអះអាងថា យកមកសាងសង់អគារនៅក្នុងអង្គភាព ដែលការស្នើសុំនេះបានបង្កឲ្យមានបញ្ហាដល់អង្គភាពទៀតផង ពីព្រោះតែខាងក្រុមហ៊ុនស៊ីម៉ង់ត៏នោះបានសួរដេញដោលអំពីរឿងនេះ។
កោះសន្តិភាពមិនអាចទំនាក់ទំនងសុំការបំភ្លឺពីលោកវិន នល់ នាយការិយាល័យគ្រប់គ្រងសន្តិសុខឯកជន ដែលកំពុងរងការរិះគន់ពីមហាជននេះ បាននៅឡើយទេ នៅព្រឹកថ្ងៃទី២៥ កក្ដដា។ ដោយឡែក លោកឧត្តមសេនីយទោ អ៊ុច សុខុន ស្នងការខេត្ត ក៏ហាក់ដូចជាមិនបានជ្រាបអំពីសកម្មភាពមិនប្រក្រតីរបស់លោកវិន នល់ ដែលដើរសុំប្រាក់គេបែបអាណាធិបតេយ្យខាងលើនេះដែរ។
លោកស្នងការខេត្តបានមានប្រសាសន៍ប្រាប់កោះសន្តិភាពតាមទូរស័ព្ទថា លោកមិនបានដឹងអំពីរឿងដើររៃអង្គាសប្រាក់របស់លោកវិន នល់ នេះទេ តែលោកគ្រាន់តែដឹងថា លោកបានឃើញលោកវិន នល់ កំពុងជួសជុលអគារការិយាល័យរបស់ខ្លួនមែន ។ ប៉ុន្តែលោកស្នងការបានបដិសេធចំពោះការដើររៃអង្គាសប្រាក់នោះ ដោយលោកបានបញ្ជាក់យ៉ាងដូច្នេះថា « ខ្ញុំគ្មានគោលការណ៍ ឬដាក់បទបញ្ជាឲ្យលោកវិន នល់ ដើរសុំប្រាក់គេ ដើម្បីយកមកសាងសង់អគារនោះទេ.. ខ្ញុំមិនបានដឹងរឿងនេះទេ តែខ្ញុំគ្រាន់តែឃើញគេកំពុងជួសជុលអគារមែន »។
បើតាមការផ្ដល់ព័ត៌មានពីម្ចាស់អំណោយនានា ដែលបានឧបត្ថម្ភជួនលោកវិន នល់ បានស្រង់សំដីមន្ត្រីរូបនេះថា លោកវិន នល់ បានទំនាក់ទំនងសុំប្រាក់ពីតាមបណ្ដាក្លិបកំសាន្ត ឬពីអាជីវករនានា ដោយអះអាងថា យកទៅសាងសង់អគារការិយាល័យធ្វើការ តែមន្ត្រីរូបនេះ មិនបានបង្ហាញលិខិតបេសកកម្ម ឬលិខិតអនុ
ញ្ញាតជាលាយលក្ខណ៍អក្សរពីអង្គភាពឡើយ ។ ប្រភពដដែលបានបញ្ជាក់ថា គ្មាននរណាពេញចិត្តនឹងទង្វើរបស់មន្ត្រីរូបនេះទេ ព្រោះម្ចាស់អំណោយភាគច្រើនគេមិនសូវស្គាល់មុខមន្ត្រីនេះ ហើយថែមទាំងមិនមានទំនុកចិត្តទៀតផង។
ជាមួយនឹងការដើររៃអង្គាសប្រាក់បែបអនាធិបតេយ្យរបស់លោកនាយការិយាល័យ ទើបចូលកាន់តំណែងថ្មីនេះ បើតាមមន្ត្រីមួយចំនួន ដែលបានដឹងរឿងនេះ បានបង្ហើបប្រាប់កោះសន្តិភាពថា អាជីវករខ្លះ ត្រូវបានលោកវិន នល់ ទាក់ទនងតាមទូរស័ព្ទសុំប្រាក់រហូតរាប់ពាន់ដុល្លារឯណោះ តែមិនបានដូចបំណងទេ គឺគេផ្ដល់ជូនយ៉ាងច្រើនត្រិម១០% នៃចំនួនស្នើសុំតែប៉ុណ្ណោះ ពីព្រោះការដើរសុំប្រាក់នេះ គ្មានការទទូលខុសត្រូវពីថ្នាក់ដឹកនាំទើបគេមិនទុកចិត្ត។
តាមរយៈកោះសន្តិភាព ពាក់ព័ន្ធនឹងទង្វើមិនប្រក្រតីរបស់លោកវិន នល់ ខាងលើនេះ ទាំងម្ចាស់អំណោយ រួមទាំងមន្ត្រីមួយចំនួននៅក្នុងអង្គភាពស្នងការខេត្តផង បានសំណូមពរសូមឲ្យលោកស្នងការខេត្ត គួតែមានវិធានការរដ្ឋបាល ឬ វិធានការណែនាំដល់លោកវិន នល់ អំពីការដើរប្រព្រឹត្តនូវសកម្មភាពផ្ដេសផ្ដាស់នេះ ដែលនាំឲ្យមានការរិះគន់ពីមហាជន និងនាំឲ្យខូចឈ្មោះអង្គភាពស្នងការទាំងមូល។ ព្រោះបើតាមព័ត៏មានលោកវិន នល់ នៅតែបង្កព្យុះភ្លៀងតាមរយៈដើររៃអង្គាសប្រាក់ពីមនុស្សដោយមិនរើសមុខ ឬ គ្មានការអៀនខ្មាស់ឡើយ ។ (សម្រួលដោយ៖ ស្រីណា)
ចែករំលែកព័តមាននេះ