ខេត្តសៀមរាប ៖ តាមសេចក្តីរាយការណ៍បឋមបានឱ្យដឹងថា បន្ទាប់ពីកម្លាំងនគរបាលនាយកដ្ឋានព្រហ្មទណ្ឌ ក្រសួងមហាផ្ទៃបានចាប់ខ្លួនមេខ្លោងដ៏ធំម្នាក់ជានាយកក្រុមហ៊ុនអុីណារីតា ឌីវេឡុបម៉ិន ឯ.ក ពាក់ព័ន្ធករណីឆបោកកាលពីកន្លងមកនៅរាជធានីភ្នំពេញ ដោយមានបញ្ជាពីព្រះរាជអាជ្ញា និងមានបណ្ដឹងរបស់ជនរងគ្រោះជាច្រើននាក់ដែលបានបាត់បង់ប្រាក់អស់រាប់រយពាន់…
ខេត្តសៀមរាប ៖ តាមសេចក្តីរាយការណ៍បឋមបានឱ្យដឹងថា បន្ទាប់ពីកម្លាំងនគរបាលនាយកដ្ឋានព្រហ្មទណ្ឌ ក្រសួងមហាផ្ទៃបានចាប់ខ្លួនមេខ្លោងដ៏ធំម្នាក់ជានាយកក្រុមហ៊ុនអុីណារីតា ឌីវេឡុបម៉ិន ឯ.ក ពាក់ព័ន្ធករណីឆបោកកាលពីកន្លងមកនៅរាជធានីភ្នំពេញ ដោយមានបញ្ជាពីព្រះរាជអាជ្ញា និងមានបណ្ដឹងរបស់ជនរងគ្រោះជាច្រើននាក់ដែលបានបាត់បង់ប្រាក់អស់រាប់រយពាន់ រាប់ម៉ឺនដុល្លារទៅលើមេក្លោងដ៏ធំម្នាក់ខាងលើនេះ ។ សូមរំលឹកថា សែកស្អុយជាង១លានដុល្លារអាមេរិក…ទើបត្រូវចាប់ខ្លួននាយកក្រុមហ៊ុននេះ
ពាក់ព័ន្ធនឹងករណីឆបោកប្រាក់នេះគឺក្នុងរូបភាពចូលហ៊ុនរកស៊ី ដែលធ្វើឱ្យជនរងគ្រោះជាច្រើននាក់ស្រែកយំ ហើយសរុបជាទឹកប្រាក់ដែលជនសង្ស័យឆបោកដល់ខ្ទង់រយលានដុល្លារ និងត្រូវបានសាលាដំបូងខេត្តសៀមរាបចេញដីកាបង្គាប់ឱ្យឃុំខ្លួនមេខ្លោងម្នាក់ខាងលើដាក់ពន្ធនាគារកាលពីរសៀលថ្ងៃទី២១ ខែកក្កដា ឆ្នាំ២០១៩ ដែលដីកានេះចេញដោយលោក ជូ លឹមហ៊ាង ចៅក្រមស៊ើបសួរនៃសាលាដំបូងខេត្តសៀមរាប។
ជនជាប់ចោទខាងលើឈ្មោះ ឌឹម សួនណាត ភេទប្រុស អាយុ៣៦ឆ្នាំ ជានាយកក្រុមហ៊ុនអុីណារីតា ឌីវេឡុបម៉ិន ឯ.ក មានទីលំនៅផ្ទះ លេខ៣៤ ផ្លូវលេខ១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
បើតាមដីការបស់ចៅក្រមស៊ើបសួរនៃសាលាដំបូងខេត្តសៀមរាប លោក ជូ លឹមហ៊ាង ដែលបណ្ដាញព័ត៌មានទទួលបានកាលពីរសៀលថ្ងៃទី២២ ខែកក្កដា ឆ្នាំ២០១៩ នេះ បានសម្រេច ចោទប្រកាន់បុគ្គល ឌឹម សួនណាត ពីបទឆបោក ដោយមានស្ថានទម្ងន់ទោស និងមិនបំពេញកាតព្វកិច្ចចំពោះឧបករណ៍ដែលអាចជួញដូរបាន។
គួរបញ្ជាក់ផងដែរថា តាមការបញ្ជាក់របស់មន្ត្រីជាន់ខ្ពស់របស់ក្រសួងមហាផ្ទៃបានប្រាប់ថា រូបភាពនៃករណីឆបោកនេះ គឺជនសង្ស័យបានដើរតួនាទីជាម្ចាស់គម្រោងអភិវឌ្ឍន៍ទៅលើវិស័យអចលនទ្រព្យ រួមមាន ៖ ពុះដីឡូតិ៍ ផ្ទះល្វែង និងវីឡាជាដើម តាមរយៈរូបភាពឆបោកនេះ គឺជនសង្ស័យបានធ្វើកិច្ចសន្យាវិនិយោគជាមួយជនរងគ្រោះឲ្យដាក់លុយវិនិយោគ ដោយទទួលបានភាគរយខ្ពស់ប្រចាំខែ ដែលគេហៅថាភាគលាភ ឬប្រាក់ចំណេញ ប៉ុន្ដែជនរងគ្រោះបានទទួលប្រាក់ចំណេញនេះ តែខែដំបូង ឬពីរខែដំបូង ឬបីខែដំបូងតែប៉ុណ្ណោះ លុះខែបន្ដបន្ទាប់ទៀតនឹងមិនទទួលបាននោះឡើយ។
ជាក់ស្ដែង ជនរងគ្រោះម្នាក់ដែលដាក់ប្រាក់វិនិយោគចំនួន១០ម៉ឺនដុល្លារ ហើយខែដំបូងនឹងទទួលបាន២៥ភាគរយ ស្មើនឹង២៥.០០០ដុល្លារ ប៉ុន្ដែបានតែមួយខែ ឬពីរខែដំបូង នឹងលែងទទួលបានទៀតហើយ នោះមានន័យថា លុយដែលត្រូវបាត់បង់សឹងតែពាក់កណ្ដាល នៃទឹកប្រាក់ដែលបានដាក់វិនិយោគ។
ជនសង្ស័យបានប្រើរូបភាពនេះ ដោយពង្រាយបក្ខពួករបស់ខ្លួនចុះទៅតាមបណ្ដាខេត្ត ដោយដើរតួជាម្ចាស់គម្រោងអភិវឌ្ឍន៍លើវិស័យអចលនទ្រព្យ ហើយបើជនរងគ្រោះណាមានលុយតិចតួច គឺដាក់ចូលហ៊ុនតាមលទ្ធភាព ជាក់ស្ដែងករណីឆបោកនេះក៏បានកើតឡើងនៅលើទឹកដីស្រុកមេមត់ ខេត្តត្បូងឃ្មុំ និងមានប្រជាពលរដ្ឋ ព្រមទាំងអាជីវករនៅក្នុងផ្សារជាច្រើននាក់ ក៏ចាញ់បោកផងដែរ។
បច្ចុប្បន្ន ជនសង្ស័យ(ឌឹម សួនណាត )មេខ្លោងឆបោកដ៏ធំម្នាក់នេះត្រូវបានលោក ជូ លឹមហ៊ាង ចៅក្រមស៊ើបសួរសាលាដំបូងខេត្ត សម្រេចឱ្យឃុំខ្លួននៅពន្ធនាគារខេត្តសៀមរាបហើយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ