រាជធានីភ្នំពេញ ៖ សេចក្តីរាយការណ៍មួយបានឲ្យដឹងថា នគរបាលការិយាល័យព្រហ្មទណ្ឌកម្រិតស្រាលនៃអគ្គស្នងការដ្ឋាននគរបាលជាតិ កាលពីថ្ងៃទី១៦ ខែកក្កដា ឆ្នាំ២០១៩ បានឃាត់ខ្លួននាយកក្រុមហ៊ុនម្នាក់ ពាក់ព័ន្ធនឹងករណីចេញមូលប្បទានបត្រគ្មានសាច់ប្រាក់(សែកស្អុយ)ជាង១លានដុល្លារអាមេរិក ។ ក្រោយពីឃាត់ខ្លួន ជនសង្ស័យត្រូវបានប្រគល់ឲ្យទៅនាយកដ្ឋានសន្តិសុខផ្ទៃក្នុង កសាងសំណុំរឿងបញ្ជូនទៅសាលាដំបូងរាជធានីភ្នំពេញ នាព្រឹកថ្ងៃទី១៩ ខែកក្កដា ។
ជនសង្ស័យឈ្មោះ ឌីម សួនណាត ភេទប្រុស អាយុ៣៦ឆ្នាំ ជានាយកក្រុមហ៊ុនអុីណារីតា ឌីវេឡុបម៉ិន ឯ.ក ជាប់ចោទពីបទឆបោក រំលោភលើទំនុកចិត្ត និងចេញមូលប្បទានបត្រគ្មានសាច់ប្រាក់ ដែលមិនបំពេញកាតព្វកិច្ចចំពោះឧបករណ៍ដែលអាចជួញដូរបាន តាមពាក្យបណ្តឹងរបស់ឈ្មោះ គង់ លាកឈាង ជាពាណិជ្ជ
ករដូចគ្នា ។
ដើមហេតុបណ្តាលឲ្យមានការឃាត់ខ្លួននាយកក្រុមខាងលើនេះ ត្រូវបានសមត្ថកិច្ចឲ្យដឹងថា កាលពីអំឡុងខែធ្នូ ឆ្នាំ២០១៨ នៅក្រុមហ៊ុនដែលមានអាសយដ្ឋានលេខ៣៤ ផ្លូវលេខ១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ឈ្មោះ ឌីម សួនណាត បានទៅប្រើល្បិចបញ្ចុះបញ្ចូលឈ្មោះ គង់ លាកឈាង ឲ្យដាក់ទុនវិនិយោគលើការជួញដូររូបិយប័ណ្ណអន្តរជាតិជាមួយខ្លួនលើទឹកប្រាក់ចំនួន១.៣៤៧.២៦០លានដុល្លារអាមេរិក ដើម្បីឲ្យខ្លួនធ្វើការជួញដូររូបិយប័ណ្ណអន្តរជាតិ(លេងភាគហ៊ុន) ។
ពេលនោះឈ្មោះ ឌីម សួនណាត បានអះអាងថា នឹងទទួលបានប្រាក់ចំណេញមកវិញខ្ពស់ ដូច្នេះហើយបានជាដើមបណ្តឹងឈ្មោះ គង់ លាកឈាង សម្រេចចិត្តដាក់ទុនវិនិយោគដោយផ្ញើប្រាក់ឲ្យទៅឈ្មោះ ឌីម សួនណាត ដែលមានការិយាល័យក្រុមហ៊ុនផ្ទះលេខ៣៤ ផ្លូវលេខ១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ តាមរយៈធនាគារABA តាំងពីអំឡុងខែធ្នូ ឆ្នាំ២០១៨ រហូតមកដល់បច្ចុប្បន្ន ។
បន្ទាប់ពីឈ្មោះ ឌីម សួនណាត បានទទួលប្រាក់ទាំងអស់នោះរួចហើយ ក៏ចេញមូលប្បទានបត្រទុកឲ្យដើមបណ្តឹង(គង់ លាកឈាង)សម្រាប់ទូទាត់ ។ លុះដល់ថ្ងៃកំណត់ ដើមបណ្តឹងបានទៅធនាគារABAដើម្បីបើកប្រាក់ ប៉ុន្តែគណនីធនាគាររបស់ឈ្មោះ ឌីម សួនណាត នៅទីនោះគ្មានសាច់ប្រាក់ទេ ។
ដើមបណ្តឹងបានព្យាយាមទាក់ទងទៅឈ្មោះ ឌីម សួនណាត ជាច្រើកលើកដែរ តែឈ្មោះនេះបានបិទទូរស័ព្ទ ក្នុងចេតនាគេចវេះ គេចខ្លួនមិនអាចទាក់ទងបានដូច្នេះហើយទើបដើមបណ្តឹងសម្រេចចិត្តប្តឹងសមត្ថកិច្ចឲ្យជួយចាត់ការលើឈ្មោះ ឌីម សួនណាត តាមផ្លូវច្បាប់ ។
សមត្ថកិច្ចបានបង្ហើបទៀតថា ជនជាប់សង្ស័យឈ្មោះ ឌីម សួនណាត នៅមានជាប់បណ្តឹងជាច្រើនទៀត ដែលសុទ្ធតែរឿងចេញសែកស្អុយប្រហាក់ប្រហែលគ្នាដូចដើមបណ្តឹងនេះដែរ ។ រឿងរ៉ាវចាប់ខ្លួននាយកក្រុមហ៊ុនរូបនេះ ហាក់កំពុងល្បីក្នុងបណ្តាញសង្គមដែលអ្នកខ្លះចេញមុខគាំទ្រនិងខ្លះចោទបន្ថែម ៕
ចែករំលែកព័តមាននេះ