ការមានគោលបំណងសន្សំលុយមិនមែនជារឿងចម្លែកទេ សម្រាប់មនុស្សម្នាក់ៗ ប៉ុន្តែវាមិនងាយស្រួលដូចការនិយាយឡើយ ។ មនុស្សក្នុងសង្គមតែងតែមានពេលដែលកាលៈទេសៈ ចាប់បង្ខំខ្លួនឲ្យចាយវាយលើសពីតម្រូវការដូចជា ការចូលរួមកម្មវិធីក្នុងសង្គម ឬការបញ្ចុះបញ្ចូលពីអ្នកលក់ឲ្យទិញអ្វីមួយជាដើម ។ ប្រសិនបើអ្នកធ្លាក់ក្នុងស្ថានការខាងលើ…
ការមានគោលបំណងសន្សំលុយមិនមែនជារឿងចម្លែកទេ សម្រាប់មនុស្សម្នាក់ៗ ប៉ុន្តែវាមិនងាយស្រួលដូចការនិយាយឡើយ ។ មនុស្សក្នុងសង្គមតែងតែមានពេលដែលកាលៈទេសៈ ចាប់បង្ខំខ្លួនឲ្យចាយវាយលើសពីតម្រូវការដូចជា ការចូលរួមកម្មវិធីក្នុងសង្គម ឬការបញ្ចុះបញ្ចូលពីអ្នកលក់ឲ្យទិញអ្វីមួយជាដើម ។
ប្រសិនបើអ្នកធ្លាក់ក្នុងស្ថានការខាងលើ អ្នកអាចសាកល្បងនិយាយពាក្យកុហកខាងក្រោមបានដែលអាចជួយឲ្យអ្នកជៀសវាងការចំណាយខ្ជះខ្ជាយ ឬលើអ្វីដែលមិនចាំបាច់ ។
១. ខ្ញុំមានវាហើយ
ប្រសិនបើអ្នកលក់ ឬអ្នកដែលអ្នកស្គាល់ព្យាយាមលក់អ្វីមួយដល់អ្នក អ្នកអាចបដិសេធពួកគេដោយមានសុជីវធម៌ដោយគ្រាន់តែនិយាយថា អ្នកមានវាស្រាប់ហើយ ។ វាក៏ជាការកុហកមួយដែលអ្នកអាចប្រើបានលើខ្លួនឯងដែរ ឧទាហរណ៍ដូចជា មិត្តរបស់អ្នកដាក់សម្ពាធឲ្យប្តូរទូរស័ព្ទជាដើម អ្នកអាចជៀសវាងការចំណាយមិនចាំបាច់បានដោយព្យាយាមបញ្ចុះបញ្ចូលខ្លួនថា អ្នកមានទូរស័ព្ទដែលកំពុងប្រើរួចហើយ ។
២. ខ្ញុំមានកម្មវិធីចំពេលតែមួយ
ការចូលរួមកម្មវិធីផ្សេងៗ ដើម្បីបង្កើតទំនាក់ទំនង គឺជារឿងទូទៅក្នុងសង្គម ប៉ុន្តែវាក៏ជាពេលដែលតម្រូវឲ្យអ្នកចាយវាយបន្តិចបន្តួច ឬច្រើនដែរ ។ សម្រាប់អ្នកដែលចង់ជៀសវាងកម្មវិធីទាំងនេះ ដើម្បីសន្សំថវិកា អ្នកអាចកុហកថា អ្នកមានកម្មវិធីដទៃដែលត្រូវចូលរួម ឬមានការងារជាប់រវល់ជាដើម ។
អ្នកត្រូវចងចាំថា អ្នកមានសេរីភាពក្នុងការបដិសេធ ប៉ុន្តែដើម្បីការពារមិនឲ្យប៉ះពាល់ដល់ទំនាក់ទំនងជាមួយអ្នកដទៃ អ្នកគួរតែប្រាប់ដល់អ្នកអញ្ជើញវិញថា អ្នកបើកទូលាយក្នុងការជួបពួកគេលើកក្រោយ (ក្នុងកាលៈទេសៈដែលមិនចាំបាច់ឲ្យអ្នកចំណាយច្រើនដូចជា នៅហាងកាហ្វេជាដើម) ។
៣. ខ្ញុំកំពុងសម្រកទម្ងន់ ឬកាត់បន្ថយអាហារទាំងនេះ
អ្នកប្រហែលជាមិនមានបញ្ហាសុខភាពទេ ប៉ុន្តែដើម្បីជៀសវាងកម្មវិធីសាច់អាំង ឬអាហារសេរីដែលតម្រូវឲ្យអ្នកចំណាយច្រើន អ្នកអាចប្រើពាក្យកុហកនេះបាន ។ ប្រសិនបើអ្នកមិនអាចជៀសវាងកម្មវិធីទាំងនេះទាំងស្រុងទេ នោះអ្នកអាចចូលរួមតែហៅអាហារតែបន្តិចបន្តួច ឬជៀសវាងការកម្ម៉ង់ភេសជ្ជៈជាដើម ។
៤. ឡានខ្ញុំនៅជាងជួសជុល
កម្មវិធីមួយចំនួនតម្រូវឲ្យអ្នកធ្វើដំណើរឆ្ងាយ ឬស្ថិតក្នុងទីតាំងដែលមានចរាចរណ៍ច្រើនធ្វើឲ្យអ្នកត្រូវចំណាយថវិកាបន្ថែមលើថ្លៃសាំងជាដើម ។ ក្នុងករណីនេះ អ្នកអាចដោះសារមិនបើកបរបានដោយនិយាយថា រថយន្តមានបញ្ហា ឬកំពុងតែនៅកន្លែងជួសជុល រួចស្នើសុំរួមដំណើរជាមួយនឹងមិត្តភក្តិ និងអ្នកស្គាល់វិញជាដើម ។ ប្រាកដណាស់ ប្រសិនបើអ្នកធ្វើដូច្នេះ អ្នកក៏គួរតែចេញថ្លៃសាំងឲ្យគេដែរ ៕ កែសម្រួលដោយ ៖ សុឃាក់
ចែករំលែកព័តមាននេះ