ផ្សោតមេគង្គត្រូវសម្លាប់ដោយអ្នកនេសាទខុសច្បាប់

ថ្ងៃទី ២៣ ខែ កក្កដា ឆ្នាំ ២០១៩

ម៉ោង ១០:១០

ការនេសាទខុសច្បាប់របស់ប្រជាជនមួយចំនួន ពិសេសការដាក់មង នៅក្នុងតំបន់អភិរក្ស នៅតែជាកត្តាប្រឈមចម្បងមួយនៃមូលហេតុដែលធ្វើអោយមានការស្លាប់សត្វផ្សោត ដែលជាសត្វអភិរក្សនៅក្នុងដែនទឹកទន្លេមេគង្គរបស់កម្ពុជា ។

អង្គការមូលនិធិសកលសម្រាប់អភិរក្សធនធានធម្មជាតិ wwf Cambodia បានសរសេរបង្ហោះក្នុងហ្វេសប៊ុកផ្លូវការរបស់ខ្លួន កាលពីល្ងាចថ្ងៃទី២២ ខែកក្កដា ម្សិលមិញដោយបង្ហាញពីការសោកស្តាយដែលសត្វផ្សោតមួយក្បាលបានស្លាប់ និងបានប្រទះឃើញនៅក្នុងភូមិកាកុត ឃុំសំបុក ស្រុកចិត្របុរី ទីរួមខេត្តក្រចេះ ។ សាកសពសត្វផ្សោតត្រូវបានយកមករក្សាទុកនៅក្នុងទូរទឹកកកនៅឯការិយាល័យ WWF-ប្រចាំខេត្តក្រចេះ ដើម្បីទុកធ្វើកោសល្យវិច្ច័យ ។

ក្រុមការងារស្រាវជ្រាវរួម ដែលមានរដ្ឋបាលជលផល និងអង្គការ WWF បានធ្វើការសន្និដ្ឋានជាបឋមថា សត្វផ្សោតនោះស្លាប់ដោយសារជាប់មងព្រោះមានស្នាមមង នៅកន្ទុយរបស់វា ។ ផ្សោតនោះជាផ្សោតឈ្មោល មានទំងន់១០៤គីឡូក្រាម មានប្រវែងសរុប ១,៩៨ ម៉ែត្រ និងអាយុប្រហាក់ប្រហែលចន្លោះពី ១៥-១៨ ឆ្នាំ ។ សត្វផ្សោតដែលស្លាប់នេះត្រូវបានគេកត់សម្គាល់ថាជាសត្វផ្សោតទី៥ ហើយដែលបានត្រូវគេប្រទះឃើញស្លាប់តាំងពីខែមករា ឆ្នាំ២០១៩ រហូតមកដល់បច្ចុប្បន្ន ហើយចំនួនកូនផ្សោតដែលកើតក្នុងកំឡុងពេលដូចគ្នានេះ គឺមានចំនួន៩ក្បាល ។

គួរបញ្ជាក់ថា សត្វផ្សោតទន្លេមេគង្គ គឺជាជាបេតិកភណ្ឌមានជីវិតដ៏មានតម្លៃមួយរបស់ប្រទេសយើងដែលខាងអង្គរការ WWF កំពុងព្យាយាមអភិរក្ស ដូចច្នេះយើងនៅតែសូមអំពាវនាវដល់ប្រជាពលរដ្ឋក្នុងមូលដ្ឋាន មេតាសូបកុំធ្វើការនេសាទខុសច្បាប់ក្នុងតំបន់អភិរក្ស ដើម្បីការពារសត្វដ៏កម្រមួយនេះ ៕ កែសម្រួលដោយ ៖ សុឃាក់