រាជធានីភ្នំពេញ ៖ ចំនួនភ្ញៀវទេសចរបរទេសបានសម្រុកមកទស្សនានៅក្នុងប្រទេសកម្ពុជារយៈពេលប៉ុន្មាន ៥ ឆ្នាំចុងក្រោយមានសន្ទុះកើនច្រើនខ្លាំង បានបណ្តាលឲ្យការផ្គត់ផ្គង់សណ្ឋាគារសម្រាប់ស្នាក់នៅជូនភ្ញៀវបរទេសស្នាក់នៅមិនគ្រប់គ្រាន់និងបានទាមទារឲ្យមានការសាងសង់បន្ថែម ។ តែសម្រាប់ដើមឆ្នាំនេះវិញការផ្គត់ផ្គង់សណ្ឋាគារហាក់មានចំនួនគ្រប់ តែចំនួនភ្ញៀវទេសចរអន្តរជាតិហាក់ស្ងាត់បន្តិច ពោលគឺមានទៅតាមរដូវកាល។
ហេតុដូច្នេះហើយអ្នកប្រតិបត្តិទេសចរណ៍ ជាពិសេសក្នុងវិស័យសណ្ឋាគារនេះ ផ្ទាល់បានផ្ដល់ជាមតិយោបល់ដល់វិនិយោគិនដែលចង់អភិវឌ្ឍន៍សណ្ឋាគារថាគួរមានការប្រុងប្រយ័ត្ន និងត្រូវពិនិត្យឲ្យម៉ត់ចត់ពីតម្រូវការភ្ញៀវទៅលើសណ្ឋាគារប្រភេទណាដែលចាំបាច់ត្រូវសាងសង់នោះ។
បើតាមលោកស្រី Clais Chenda ( ក្លេ ខៃ ចិន្ដា ) ប្រធានសមាគមសណ្ឋាគារកម្ពុជា បានមានប្រសាសន៍ថា បច្ចុប្បន្ននេះ ការផ្គត់ផ្គង់បន្ទប់សណ្ឋាគារ ទៅកាន់ភ្ញៀវទេសចរ បរទេសដែលមកស្នាក់នៅក្នុងប្រទេសកម្ពុជាគឺមានការឆ្លើយតបបានល្អ មានន័យថាមិនខ្វៈការផ្គត់ផ្គង់នោះទេ តែទន្ទឹមនឹងនេះ ក៏គេសង្កេតឃើញតម្រូវការហាក់មានការធ្លាក់ចុះ ដែលពេលខ្លះសណ្ឋាគារមួយចំនួនរកតែភ្ញៀវស្នាក់នៅមិនបានផង ។ ដូច្នេះអ្នកដែលចង់វិនិយោគ សណ្ឋាគារបន្ថែម គួរតែគិតគូរអោយច្បាស់មុននឹងសម្រេចចិត្ត ហើយត្រូវគិតថាតើទីតាំងណាដែលគួរវិនិយោគសណ្ឋាគារ ហើយសណ្ឋាគារប្រភេទណា ដែលគួរវិនិយោគ ។
លោកស្រីបានបន្តថា ដំណាក់កាលនោះ យើងមិនហាមអ្នកវិនិយោគ ដាក់ទុនវិនិយោគក្នុងវិស័យសណ្ឋាគារនោះទេ តែយកល្អគួរតែផ្អាកបន្តិចសិនរង់ចាំមើល តែបើសិនជាសន្ទុះភ្ញៀវទេសចរច្រើនឡើងវិញ ពេលនេះចាប់ផ្ដើមដាក់ទុនវិនិយោគចុះ ។ លោកស្រីបានបញ្ជាក់បន្តថា « ដំណាក់កាលនេះ គួរតែផ្អាកបន្តិចសិនលើការដាក់ទុនវិនិយោគសណ្ឋាគារនៅក្នុងប្រទេសកម្ពុជា ព្រោះតាមតួលេខនិងភាពជាក់ស្ដែង ភ្ញៀវទេសចរបរទេស មកលេងស្រុកខ្មែររាងស្ងាត់បន្តិចនិងស្ងាត់ជាងមុនៗបន្តិច ។ ក្នុងនោះដែរដូចបានឃើញតួលេខថ្មីៗរបស់គ្រឹះស្ថានអង្គរ ដែលលក់សំបុត្រជូនភ្ញៀវបរទេសនោះ បានធ្លាក់ចុះទាំងចំនួនប័ណ្ណនិងទឹកប្រាក់ »។
លោកស្រី Clais Chenda បានបន្តថា បើតាមជាយោបល់លោកស្រីសម្រាប់ពេលនេះការវិនិយោគ គួរតែបែរតម្រង់ទៅតំបន់ណាដែលមិនទាន់មានសណ្ឋាគារ និងជាតំបន់គោលដៅទេសចរណ៍ នៅពេលអនាគត ដូចជាខេត្តមណ្ឌលគិរី រតនគីរី និងខេត្តក្រចេះ ជាដើម ព្រោះខេត្តទាំងនោះ មើលទៅមិនទាន់មានសណ្ឋាគារច្រើនប៉ុន្មានទេ ខណៈដែលបណ្តាខេត្តទាំងនោះមានសក្តានុ ពលតំបន់ទេសចរណ៍ធម្មជាតិច្រើន និងជាទីដែលភ្ញៀវបរទេស ពិសេសមកពីអឺរ៉ុបចូលចិត្តខ្លាំងណាស់។ លោកស្រីបាននិយាយបន្តថា «ក្នុងករណីដែលមហាសេដ្ឋី ឬអ្នកមានប្រាក់ចង់វិនិយោគលើសណ្ឋាគារ គួរតែអភិវឌ្ឍន៍ឱ្យមានបែបផែនប្លែកពីសណ្ឋាគារនៅពេលបច្ចុប្បន្ន ព្រោះភ្ញៀវបរទេសដែលមានលុយ គេក៏ចង់បាននិងចង់ស្នាក់នៅកន្លែងប្លែកៗដែរ ហើយបើសិនជាយើងនៅតែសាងសង់សណ្ឋាគារបែបដដែលនោះ វាមិនទាក់ទាញដល់វិនិយោគិនបន្ថែមទៀតនោះទេ ។ តាមធម្មតា ទេសចរចង់បានអ្វីដែលប្លែកៗនិងថ្មី»។
ជាទស្សនៈប្រធានសមាគមសណ្ឋាគារថ្មីនេះដែរ លោកស្រីក្លេខៃ ចិន្ដា បានស្នើរដល់
រដ្ឋាភិបាលបន្ថែមការផ្សព្វផ្សាយវិស័យទេសចរណ៍ទាំងក្នុងប្រព័ន្ធផ្សព្វផ្សាយ ក្នុងស្រុក និងក្រៅស្រុក ដើម្បីអោយបានដល់ភ្ញៀវទេសចរណ៍បរទេស ជាពិសេសលោកស្រីចង់ទាក់ទាញភ្ញៀវអឺរ៉ុបមកលេងនៅកម្ពុជាអោយបានច្រើនឡើងវិញ បន្ទាប់ពីបានថយចុះ មួយរយៈកន្លងទៅនោះ ។
អ្នកគ្រប់គ្រងសណ្ឋាគារមួយរូបក្នុងខេត្តសៀមរាប សូមមិនបញ្ចេញឈ្មោះបានឲ្យដឹងថា ក្នុងពេលរដូវវស្សាបែបនេះមិនសូវមានភ្ញៀវច្រើននោះទេ ។ ម្យ៉ាងទៀតភ្ញៀវដែលមកលេងនៅពេលបច្ចុប្បន្ននេះ ពួកគេមកជាក្រុម ដោយមានភ្នាក់ងារទេសចរណ៍ស្រាប់ ដូច្នេះសណ្ឋាគារ
ល្មមៗមិនអាចទាក់ទាញភ្ញៀវទាំងនោះមកទេ គឺមានតែសណ្ឋាគារធំៗ ដែលមានទំនាក់ទំនង
ជាមួយក្រុមហ៊ុនទេសចរក្នុងនិងក្រៅស្រុក ទើបមានភ្ញៀវ តែសម្រាប់សណ្ឋាគារលក្ខណៈតូចៗគឺមានតិចតួច ។
គួរបញ្ជាក់ថាក្នុងរយៈពេល៥ខែដំបូងក្នុងឆ្នាំ ២០១៩នេះ កម្ពុជាទទួលបានភ្ញៀវទេសចរអន្តរជាតិសរុប ជិត៣លាននាក់ ភាគច្រើនជាភ្ញៀវទេសចរជនជាតិចិន ដែលក្នុងនោះភ្ញៀវទេសចរចិនមានជាងមួយ១លាននាក់ហើយ ។ ប្រតិបត្តិករទេសចរណ៍ចង់អោយភ្ញៀវទេសចរមកពីអឺរ៉ុបមានកំណើនឡើងវិញ ពីព្រោះភ្ញៀវអឺរ៉ុបបើមកលេងហើយគឺគេស្នាក់នៅយូរនិងចាយលុយច្រើនជាងភ្ញៀវនៅតំបន់អាស៊ី ដែលហោះមកមើលតំបន់ណាមួយហើយ គេនឹងហោះត្រលប់ទៅវិញមិនស្នាក់នៅយូរនោះទេ ៕ កែសម្រួលដោយ ៖ សុឃាក់
ចែករំលែកព័តមាននេះ