ការសិក្សាដែលធ្វើឡើងដោយសាកលវិទ្យាល័យ Institute of Education ចក្រភពអង់គ្លេសបានបង្ហាញថា ការលេងឧបករណ៍តន្ត្រីជួយជំរុញដល់ការផ្ចង់ស្មារតី ទំនួលខុសត្រូវនិងបំណិនសង្គមផ្សេងៗទៀតចំពោះក្មេងៗ ។ ក្រៅពីនេះ វាក៏ជួយកែលំអដល់បំណិនស្តាប់ជាទូទៅរបស់ពួកគេផងដែរ ។
ក្រុមអ្នកស្រាវជ្រាវបាននិយាយថា ការលេងឧបករណ៍ដូចជា ព្យាណូ ខ្លុយ ឬវីយ៉ូឡុងជួយធ្វើឱ្យល្អប្រសើរដល់សមត្ថភាពកុមារក្នុងការឆាប់រកឃើញកំហុសខ្លួន ហើយកែប្រែភ្លាមៗ ពោលគឺខួរក្បាលរបស់ពួកគេរហ័សរហួនខ្លាំងជាងមនុស្សធម្មតាដែលមិនចេះតន្ត្រី ។
ចំណែកការសិក្សាដែលធ្វើឡើងដោយក្រុមអ្នកវិទ្យាសាស្ត្រសាកលវិទ្យាល័យNorthwestern University នៅរដ្ឋអីុលីណយ សហរដ្ឋអាមេរិករកឃើញថា ការរៀនលេងឧបករណ៍តន្ត្រីណាមួយក្នុងវ័យកុមារភាពគឺជួយរក្សាខួរក្បាលជាពិសេសសោតវិញ្ញាណឱ្យនៅមុតស្រួចដដែលពេលឈានចូលដល់វ័យចំណាស់ ។
អ្នកវិទ្យាសាស្ត្របានពន្យល់ថា នៅពេលបុរសឬក៏ស្ត្រីកាន់តែចំណាយពេលច្រើនរៀនលេងឧបរណ៍តន្ត្រីណាមួយក្នុងយុវវ័យ នោះបណ្តាកោសិកាប្រសាទក្នុងខួរក្បាលរបស់គេឆ្លើយតបទៅនឹងសំឡេងកាន់តែរហ័សជាងមុន ។ ពួកគេបានថ្លែងថា ៖«លទ្ធផលនៃការសិក្សាលើកនេះ ចង្អុលបង្ហាញពីសារសំខាន់នៃការសិក្សាតន្ត្រីសម្រាប់ក្មេងៗនាពេលបច្ចុប្បន្ននិងសម្រាប់ការរស់នៅប្រកបដោយសុខភាពរាប់ទសវត្សទៅមុខ »។ Nina Krausសមាជិកក្រុមអ្នកស្រាវជ្រាវធ្លាប់បានបង្ហាញពីមុនមកថា បណ្តាជនចូលនិវត្តន៍ពីការងារដែលផ្សារភ្ជាប់ជីវិតរបស់ខ្លួនជាមួយឧបករណ៍តន្ត្រីណាមួយពេញមួយជីវិតគឺមានភាពរហ័សរហួនក្នុងចាប់យកសំឡេងនៅជុំវិញខ្លួនជាងអ្នកមិនលេងឧបករណ៍តន្ត្រី ។
ដោយឡែក Michael Kilgard អ្នកវិទ្យាសាស្ត្រផ្នែកខួរក្បាលសាកលវិទ្យាល័យ Texas Universityបានថ្លែងថា៖«ភាពលឿនរហ័សកន្លះវិនាទីហាក់មិនច្រើនទេ ប៉ុន្តែសម្រាប់ខួរក្បាលគឺវាងាយនឹងឆាប់ទទួលដឹងបំផុតចំពោះកាលវេលា ហើយភាពរហ័សកន្លះវិនាទីដែលបូកបញ្ចូលគ្នាជាមួយសរសៃប្រសាទរាប់លាន ពិតជាអាចធ្វើឱ្យមានការផ្លាស់ប្តូរមួយក្នុងជីវិតមនុស្សវ័យចាស់ »។ ឯការសិក្សាស្រាវជ្រាវផ្សេងទៀតពីមុនមកគឺសុទ្ធតែបានបង្ហាញថា សិក្សាឧបករណ៍តន្ត្រីជួយជំរុញភាពវៃឆ្លាតដល់ខួរក្បាល ៕
ចែករំលែកព័តមាននេះ