រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា មនុស្សប្រុសស្រី៦នាក់ ត្រូវបានកម្លាំងនគរបាលខណ្ឌសែនសុខឃាត់ខ្លួននៅក្នុងការត្រួតពិនិត្យរដ្ឋបាល ព្រមទាំងដកហូតដាវកែច្នៃ០២ដើម ដែកអក្សរ T ០១ដើម និងសម្ភារប្រើប្រាស់គ្រឿងញៀនមួយចំនួនទៀត ដែលហេតុការ នេះបានធ្វើឡើង កាលពីវេលាព្រឹកថ្ងៃទី២១ ខែកកក្កដានេះ តាមបន្ទប់ជួល ក្នុងតំបន់ស្មុគស្មាញ នៅភូមិពោងពាយ សង្កាត់ភ្នំពេញថ្មី ខណ្ឌសែនសុខ ដឹកនាំដោយលោក វរសេនីយ៍ទោ ព្រហ្ម វ៉ាន់ឌី អធិការងនគរបាលខណ្ឌសែនសុខ ។
តាមព័ត៌មានអោយដឹងថាផ្ទះជួលចំនួន០២ខ្នង ដែលក្នុងនោះមាន៧០បន្ទប់ មានមនុស្សស្នាក់នៅ៧០គ្រួសារ សរុប២៥៨នាក់ ត្រូវបានសមត្ថកិច្ចធ្វើការត្រួតពិនិត្យឆែកឆេរដោយធ្វើការឃាត់ខ្លួន ជនសង្ស័យប្រើប្រាស់គ្រឿងញៀន០៦នាក់ ក្នុងនោះមានស្រី០២នាក់ ដកហូតដាវកែឆ្នៃ០២ដើម ដែកអក្សរ T ០១ដើម និងសម្ភារប្រើប្រាស់គ្រឿងញៀនមួយចំនួន ។
តាមលោកវរសេនីយ៍ទោ ព្រហ្ម វ៉ាន់ឌី អធិការងនគរបាលខណ្ឌសែនសុខបានអោយដឹងថា ដោយមានបញ្ជាពីលោកវរសេនីយ៍ឯកហួរ ម៉េង វ៉ាង អធិការនគរបាលខណ្ឌសែនសុខអោយចុះពង្រឹងសន្តិសុខនៅក្នុងមូលដ្ឋាននគរបាលខណ្ឌតែងតែជំរុញការល្បាតពួនស្ទាក់ និងត្រួតពិនិត្យរដ្ឋបាលនៅតំបន់ស្មុកស្មាញ ។ នៅក្នុងការត្រួតពិនិត្យ សមត្ថកិច្ចឃាត់ខ្លួនជនសង្ស័យ៦នាក់ រួមទាំងវត្ថុតាងបញ្ជូនទៅកាន់អធិការដ្ឋានសាកសួរ ។
លោកអធិការរងបានអោយដឹងទៀតថា នៅក្នុងខ្លួនជនសង្ស័យ សមត្ថកិច្ចពិនិត្យទឹកនោមមាន៥នាក់បានផ្ទុកសារធាតុញៀន ហើយនគរបាលបានកសាងសំនុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ និងម្នាក់ធ្វើការអប់រំ ៕ កែសម្រួលដោយ ៖សុឃាក់
ចែករំលែកព័តមាននេះ