ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា នារីម្នាក់ត្រូវបានប្រជាពលរដ្ឋប្រទះឃើញដេកស្លាប់នៅចំណុចដីឡូតិ៍ទុកចោលខាងលិចសណ្ឋាគារអង្គរហ្គ្រង់អូរមួយកន្លែង បង្កឱ្យមានការភ្ញាក់ផ្អើលដល់សមត្ថកិច្ច និងប្រជាពលរដ្ឋ កាលពីថ្ងៃទី២០ ខែកក្កដា ឆ្នាំ២០១៩ ស្ថិតក្នុងក្រុមទី២ ភូមិមណ្ឌល២ សង្កាត់ស្វាយដង្គំ ក្រុងសៀមរាម ខេត្តសៀមរាប។
បើតាមសមត្ថកិច្ចមូលដ្ឋានបានឱ្យដឹងថា ករណីមនុស្សដេកស្លាប់ខាងលើនេះ សពជនរងគ្រោះនៅមិនស្គាល់អត្តសញ្ញាណនោះទេ គ្រាន់តែដឹងថា ជាស្ត្រីអាយុប្រហែល២០ឆ្នាំ ហើយជាជនអនាថា ដែលបានចូលទៅធ្វើរោងស្នាក់នៅក្នុងដីឡូតិ៍ខាងលិចសណ្ឋាគារអង្គរហ្គ្រង់អូរតែលនេះ ហើយប្រហែលមកពីមានជំងឺប្រចាំកាយរ៉ាំរ៉ៃ ទើបដេកស្លាប់យ៉ាងអាណោចអាធ័មតែម្តង។
សមត្ថកិច្ចបន្តទៀតថា បើតាមការពិនិត្យលើសាកសពស្ត្រីរងគ្រោះពុំឃើញមានស្លាកស្នាមអ្វីពាក់ព័ន្ធនឹងបទល្មើសព្រហ្មទណ្ឌឡើយ។ ហើយចំពោះមូលហេតុនៃសពស្ត្រីរងគ្រោះខាងលើនេះ សង្ស័យស្លាប់ដោយសារជំងឺប្រចាំកាយ គឺហូបចុកមិនគ្រប់គ្រាន់។
សូមបញ្ជាក់ថា បន្ទាប់ពីសមត្ថកិច្ចត្រួតពិនិត្យលើដងខ្លួនសពរួចរាល់មក ត្រូវបានរថយន្តរបស់មន្ទីរពេទ្យបង្អែកខេត្តសៀមរាប ដឹកយកទៅបូជានៅវត្តដំណាក់ ក្នុងក្រុងសៀមរាប រួចរាល់ហើយ ព្រោះមិនឃើញមានសាច់ញាតិមកទទួល ទើបកម្លាំងជំនាញហៅរថយន្តដឹកយកទៅបូជាតែម្តង។ (កែសម្រួលដោយ ៖ បុប្ផា)
ចែករំលែកព័តមាននេះ