រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសជានគរបាលម្នាក់បានស្លាប់ភ្លាមៗ បន្ទាប់ពីរថយន្តធន់ធំបើកបុក ហើយថយកិន បណ្តាលឱ្យស្លាប់នៅនឹងកន្លែងកើតហេតុយ៉ាងអាណោចអាធ័ម បង្កឲ្យមានការភ្ញាក់ផ្អើលកាលពីម៉ោង៧និង១០នាទីយប់ ថ្ងៃទី១៩ ខែកក្កដា ឆ្នាំ២០១៩ តាមបណ្តោយផ្លូវជាតិលេខ៣ ស្ថិតក្នុងភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ ។
ជនរងគ្រោះខាងលើមានឈ្មោះ យឹង ស៊ិន ភេទប្រុស អាយុ៥៤ឆ្នាំ មុខរបរជានាយរងប៉ុស្តិ៍ឃុំខ្វាវ មានទីលំនៅភូមិកន្សោមក្លែង ឃុំជំរះពេន ស្រុកសំរោង ខេត្តតាកែវ ។ ជនរងគ្រោះជិះម៉ូតូ ម៉ាក SUZUKI រីវ៉ូ ស៊េរីឆ្នាំ២០០៩ ពណ៌ខ្មៅ ពាក់ស្លាកលេខនគរបាល 1.5071 បើកតាមបណ្តោយផ្លូវជាតិលេខ៣ ពីជើងទៅត្បូង។ ចំណែករថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3E.0345 បើកដោយបុរសម្នាក់ស្របជាមួយម៉ូតូរងគ្រោះ។
តាមប្រភពព័ត៌មានបានឱ្យដឹងថា នៅមុនពេលកើតហេតុ គេឃើញជនរងគ្រោះជិះម៉ូតូមួយគ្រឿង SUZKI រីវ៉ូ ពណ៌ខ្មៅ បើកបរក្នុងទិសដៅពីជើងទៅត្បូងក្នុងល្បឿនមធ្យម លុះមកដល់ចំណុចកើតហេតុស្រាប់តែឃើញរថយន្តធុនធំបើកពីជើងទៅត្បូង ស្របគ្នាជាមួយម៉ូតូជនរងគ្រោះ ហើយក៏បើកបុកពីក្រោយពេញទំហឹង រួចអូសជាច្រើនម៉ែត្រផងដែរ បណ្តាលឲ្យខ្ទេចម៉ូតូឡើងម៉ត់ ហើយចំណែកឯជនរងគ្រោះវិញខ្លួនប្រាណឡើងរមូរ រយះដៃ រយះជើងស្លាប់ភ្លាមៗនៅកន្លែងកើតហេតុផងដែរ ។
តាមសម្តីប្រជាពលរដ្ឋនិយាយតៗគ្នា ប្រាប់ថា មុនកើតហេតុ រថយន្តខាងលើនោះបើកបុក ហើយថយក្រោយមកកិនបន្ថែម បណ្តាលឲ្យម៉ូតូខ្ទេច និងជនរងគ្រោះស្លាប់រមូររយះ មើលលែងយល់ ក្រោយមករថយន្តនោះទៅមុខប្រមាណជាង១០ម៉ែត្រ ហើយអ្នកបើកបរក៏លោតចុះរត់គេចខ្លួនបាត់ស្រមោលតែម្តង។
ក្រោយពីកើតហេតុ សមត្ថកិច្ចមូលដ្ឋានចុះមកដល់ ហើយក៏ទាក់ទង់ទៅសមត្ថកិច្ចជំនាញដើម្បីវាស់វែងនៃការិយាល័យចរាចរណ៏ផ្លូវគោក ស្នងការនគរបាលរាជធានីភ្នំពេញ ដើម្បីរង់ចាំការដោះស្រាយថ្ងៃក្រោយ ចំណែកសពសមត្ថកិច្ចធ្វើកំណត់ហេតុរួច ប្រគល់ឲ្យទៅសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត ។ (កែសម្រួលដោយ ៖ បុប្ផា)
ចែករំលែកព័តមាននេះ