រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា មានករណីទំនាស់ពាក្យសម្តីគ្នា ឈានរហូតដល់ប្រើអំពើហិង្សារវាងភាគីខាងអ្នកបើកបររថយន្ត និងភាគីខាងអ្នកបើកបរម៉ូតូ បង្កឲ្យមានការភ្ញាក់ផ្អើលកាលពីវេលាម៉ោង៩យប់ថ្ងៃទី២០ ខែកក្កដា ឆ្នាំ២០១៩ ស្ថិតនៅលើផ្លូវ២០១១ កែងផ្លូវសហព័ន្ធរុស្សី ភូមិតាងួន សង្កាត់កាកាប១ ខណ្ឌពោធិសែនជ័យ ។
ភាគីខាងរថយន្តមួយគ្រឿងម៉ាកឡិចស៊ីស RX៣៣០ ពណ៌ស ពាក់ស្លាកលេខ ភ្នំពេញ ២BB-០០២៣ អ្នកបើកបរមិនត្រូវបានស្គាល់អត្តសញ្ញាណ ។ ចំណែកភាគីខាងម៉ូតូមួយគ្រឿង ធុនសេ១២៥ ជិះគ្នា៣នាក់ប្តីប្រពន្ធនិងកូនមិនស្គាល់អត្តសញ្ញាណ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញភាគីខាងរថយន្តឡិចស៊ីស RX៣៣០ បានធ្វើដំណើរតាមផ្លូវសហព័ន្ធរុស្ស៊ីក្នុងទិសដៅពីលិចទៅកើត លុះមកដល់ផ្លូវកែងបានបត់ឆ្វេងមកផ្លូវ២០១១វិញ ស្រាប់តែមានបុរសម្នាក់បើកបរម៉ូតូមួយគ្រឿងមានដឹកប្រពន្ធនិងកូនប្រុសអាយុប្រហែល៣ឆ្នាំ ធ្វើដំណើរតាមផ្លូវ២០១១ ក្នុងទិសដៅពីជើងទៅត្បូង ខណៈមកដល់ផ្លូវកែងបានឈប់ចាំស្តុប។
តាមប្រភពដដែលបានបន្តថា ពេលនោះភាគីខាងអ្នកបើកបររថយន្តបត់ឆ្វេងមកឃើញភាគីខាងម៉ូតូឈប់ ធ្វើអោយភាគីខាងរថយន្តពិបាកក្នុងការបត់ក៏ចុចស៊ីផ្លេដើម្បីអោយភាគីខាងម៉ូតូចៀស ហើយពេលនោះទាំងរថយន្តនិងម៉ូតូមិនមានប៉ះពារគ្នានោះទេ ស្រាប់តែកើតទំនាស់ពាក្យសម្តីគ្នា រហូតឈានដល់ភាគីខាងអ្នកបើកបររថយន្តចុះមកវាយភាគីខាងអ្នកបើកបរម៉ូតូមួយដៃ ក្លាយជាទំនាស់ឈ្លោះប្រកែកគ្នាផ្អើលដល់សមត្ថកិច្ចចុះមកអន្តរាគមន៍ ដោយនាំភាគីទាំង២ទៅធ្វើការសាកសួរនៅប៉ុស្តិ៍កាកាប ចុងក្រោយភាគីសងខាងបានសម្រួលគ្នាដើម្បីបញ្ចប់រឿងនៅប៉ុស្តិ៍នគរបាលតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ