តាម​ប្រភព​ព័ត៌មាន The Sun បានឱ្យ​ដឹង​ថា ឪពុក​របស់​កីឡាករ Neymar នឹង​ទៅ​ជួប​ជាមួយ​នឹង​ថ្នាក់ដឹកនាំ​របស់​ក្លិប​សេះបង្កង់ ដើម្បី​ពិភាក្សា​ពី​ការ​ចុះ​កុងត្រា​សម្រាប់​រដូវ​កាល​ក្រោយ​។

យោង​តាម CalcioMercato បានឱ្យ​ដឹង​ថា Neymar Sr ដែល​ជា​ឪពុក បាន​ធ្វើ​ដំណើរ​ជុំវិញ​អឺរ៉ុប ដើម្បី​និយាយ​ជាមួយនឹង​ក្លិប​ណា​ដែល​មាន​បំណង​ទិញ​យក​កូន​របស់​ខ្លួន​។ នៅ​ពេល​នេះ លោក​ត្រូវ​នឹង​ទៅ​ជាមួយនឹង​លោក Fabio Paratici ដែល​ជានា​យក​ខាង​ផ្នែក​កីឡាករ​នៅ Juventus នៅ​ទីក្រុង Turin ប្រទេស​អ៊ី​តា​លី ។

ពួក​គេ​ទាំង​ពីរ​នាក់ នឹង​ធ្វើការ​ពិភាក្សា​ពី​ការ​ទិញ​យក Neymar អាយុ​២៧​ឆ្នាំ ដើម្បី​យក​ទៅ​លេង​បូក​ជើង​គ្នា​ជាមួយនឹង Cristiano Ronaldo អាយុ​៣៤​ឆ្នាំ ។ ដោយឡែក កីឡាករ Neymar ធ្លាប់​បាន​ប្រាប់​យ៉ាង​ជាក់ច្បាស់​ហើយ​ថា ចង់ទៅ​លេង​នៅ Barcelona ដូច​កាល​គ្រា​ដើម ។ តែ​ខាង Barca មិន​មាន​លុយ​គ្រប់គ្រាន់​ក្នុង​ការ​ទិញ​យក ព្រោះតែ​បាន​ជះ​លុយ​១០៨​លាន​ផោន​ទៅ​លើ​កីឡាករ Antoine Griezmann បាត់​ទៅ​ហើយ ។

តាម​ប្រភព​បែកធ្លាយ​បានឱ្យ​ដឹង​ថា ពេល​នេះ Barcelona កំពុង​ធ្លាក់​ក្នុង​បំណុល ៨០០​លាន​ផោន ដែល​ធ្វើ​ឱ្យ​គម្រោង​ទិញ Neymar ត្រូវ​ស្ថិត​ក្នុង​ភាព​មិន​ច្បាស់លាស់ ។

ដោយ​ទឹក​ចិត្តជា​ឪពុក លោក Neymar Sr. បាន​ដើរ​រក​អ្នក​ជំនួស Barca ដែល​ក្នុង​នោះ​មាន Manchester United និង Juventus ដើម្បី​រក​អនាគត​ល្អ​ដល់​កូនប្រុស ។ អ្វី​ដែល​ឃើញ​ថា ល្អ​នោះ​គឺថា PSG ក៏​កំពុង​តែ​ចង់​លក់ Neymar ក្នុង​តម្លៃ​ឡៃ​ឡុ​ង​ដែរ ស្រប​ពេល​ជាមួយនឹង Juventus ក៏​មិន​ក្រ​ដែរ ៕

ប្រភព ៖ thesun , កែសម្រួល​ដោយ ៖ សំណាង