សហរដ្ឋអាមេរិក-តួកគី ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៦កក្កដាបានបន្ទន់សម្ដីជាមួយតួកគី ដោយលែងនិយាយពីលទ្ធភាពដាក់ទណ្ឌកម្ម ប្រឆាំងក្រុងអង់ការ៉ាក៏ទោះបីជា មានការផ្ដល់ជាដំបូងមីស៊ីលរុស្ស៊ី S-400 ដែលអាមេរិកចាត់ទុកថា មិនស៊ីខ្សែគ្នានឹងបណ្ដាគ្រឿងសព្វាវុធរបស់អូតង់ក្ដី។
ដោយលើកជាលើកដំបូងនូវសំណុំរឿងដ៏រសើបនេះ ៤ថ្ងៃក្រោយពីតួកគីទទួលបណ្ដាសមាសភាពនៃមីសីុលរុស្សីុ លោកត្រាំមិនរិះគន់ដល់ឥរិយាបថតួកគីឡើយ។ លោកលើកឡើងថាខ្ញុំមានទំនាក់ទំនងល្អជាមួយប្រធានាធិបតី លោករីស៊ីបតៃយ៉ីបអ័រដូហ្គាន។ និយាយដោយត្រង់ទៅនោះជាសភាពការណ៍ដ៏ស្មុគស្មាញបំផុតមួយ។
ក្រុងវ៉ាស៊ិនតោនខ្លាចថាមីស៊ីលរុស្ស៊ីទាំងនេះអាចទម្លុះអាថ៌កំបាំងនៃបច្ចេកវិទ្យា របស់យន្តហោះបំបាំងកាយជំនាន់ថ្មីរបស់ខ្លួនធុនF-35។ ប្រធានាធិបតីអាមេរិករំឭកថា ការផ្ដល់បណ្ដាសមាភាពមីស៊ីលS-400 ចាប់ពីពេលនេះទៅនាំឲ្យក្រុងអង់ការ៉ា មិនអាចទទួលបានយន្តហោះបំបាំងកាយF-35 ចំនួន១០០គ្រឿងដែលខ្លួនចង់ទិញ ដែលនោះវាស្របតាមឱសានវាទរបស់មន្ទីរប៉ង់តាហ្គោន ចេញកាលពីដើមខែមិថុនា។ ឪសានវាទនោះទុកពេលរហូតដល់ថ្ងៃទី៣១កក្កដា ឲ្យតួកគីបោះបង់ចោលគ្រឿងសព្វាវុធរុស្ស៊ី បើពុំដូច្នោះទេ ក្រុងអង់ការ៉ានឹងត្រូវផាត់ចេញពីកម្មវិធីយន្តហោះF-35។
លោកត្រាំបានទម្លាក់កំហុសលើអ្នកកាន់អំណាចមុនលោក គឹលោកបារ៉ាក់អូបាម៉ាចំពោះវិបត្តិនោះ។ លោកថារដ្ឋបាលលោកអូបាម៉ាមិនលក់មីស៊ីលPATRIOTឲ្យតួកគី។ រឿងនេះកើតមានយូរហើយតែពេលនេះ សេតវិមានបានផ្លាស់ប្ឌូរទស្សនៈវិញ។ តួកគីតាមពិតបានចុះហត្ថលេខាជាមួយរុស្ស៊ី និងបង់ប្រាក់ច្រើនឲ្យរុស្សុីរួចទៅហើយ។
ក្រសួងការបរទេសអារិកធ្លាប់អនុម័តកាលពីឆ្នាំ២០០៩ លក់ឲ្យតួកគីប្រព័ន្ធមីស៊ីលការពារអាកាសPATRIOTដល់១៣គ្រឿង មានទឹកប្រាក់ជិត៨ពាន់លានដុល្លារ តែក្រុងអង់ការ៉ាទាមទារចូលរួមក្នុងផលិតកម្មនិងឲ្យមានការផ្លាស់ប្ដូរបច្ចេកវិទ្យា តែក្រុងវ៉ាស៊ិនតោនបានបដិសេធ។ដូច្នេះតួកគីក៏ងាកមករករុស្សុីវិញ៕ (កែសម្រួលដោយ ៖ បុប្ផា)
ចែករំលែកព័តមាននេះ