រាជធានីភ្នំពេញ ៖ រដ្ឋមន្ដ្រីក្រសួងការបរទេសជប៉ុន នៅឆ្នាំ២០១៩នេះបានចេញលិខិតកោតសរសើរមន្ដ្រីជាន់ខ្ពស់កម្ពុជា២រូប ដែលមានស្នាដៃឆ្នើមលើវិស័យអន្តរជាតិ ដើម្បីជាការទទួលស្គាល់នូវការរួមចំណែករបស់ពួកគាត់ក្នុងការជំរុញចំណងមិត្តភាពរវាងប្រទេសជប៉ុន និងបណ្តាប្រទេសនានា ។ នេះបើ យោងតាមសេចក្តីប្រកាសព័ត៌មានរបស់ស្ថានទូតជប៉ុន ។
យោងតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំកម្ពុជា នៅថ្ងៃទី១៧ ខែកក្កដា ឆ្នាំ២០១៩ បានឲ្យដឹងថា មន្ដ្រីឆ្នើម២រូបទទួលលិខិតសរសើរសម្រាប់សកម្មភាពនានារបស់ខ្លួន រួមមាន អ្នកស្រីបណ្ឌិត អ៊ុំ រ៉ាវី សាកលវិទ្យាធិការរងនៃសាកលវិទ្យាល័យភូមិន្ទភ្នំពេញបានចូលរួមចំណែកជំរុញការយោគយល់គ្នារវាងជប៉ុន និងកម្ពុជា ជាពិសេសការផ្លាស់ប្តូរទំនាក់ទំនងរវាង សាកលវិទ្យាល័យនៃប្រទេសទាំងពីរ និងលោក ឯក ប៊ុនថា អគ្គនាយករងនៃក្រសួងវប្បធម៌ និងវិចិត្រសិល្បៈបានចូលរួមចំណែកជំរុញការយោគយល់គ្នារវាងជប៉ុន និងកម្ពុជា ជាពិសេសការ ផ្លាស់ប្តូរទំនាក់ទំនងវប្បធម៌រវាងប្រទេសទាំងពីរ ។
ចំណែកបុគ្គលឆ្នើមម្នាក់ទៀត គឺជាជនជាតិជប៉ុន លោក តាកាកាហ្សឹ យ៉ាម៉ាដា សាស្ត្រាចារ្យ ពិគ្រោះយោបល់នៃមហាវិទ្យាល័យសិល្បៈនៃសាកលវិទ្យាល័យភូមិន្ទវិចិត្រសិល្បៈ និងជានាយកនៃសាលាវិចិត្រសិល្បៈយ៉ាម៉ាដា ព្រមទាំងជាសមាជិកនៃវិទ្យាស្ថានសិល្បៈជប៉ុន (នីហុន ប៊ីជ្សិត្សឹអ៊ិន) បានចូលរួមចំណែកជំរុញការផ្លាស់ប្តូរវប្បធម៌តាមរយៈសិល្បៈ រវាងជប៉ុន និងកម្ពុជា ជាពិសេសលើកទឹកចិត្តវិចិត្រករកម្ពុជាតាមរយៈការអប់រំវិចិត្រសិល្បៈ ។
សូមរំលឹកថា សម្រាប់ពិធីប្រគល់លិខិតសរសើរជូនដល់បុគ្គលឆ្នើមទាំងបីរូបនេះនឹងត្រូវរៀបចំក្នុងពេលឆាប់ៗខាងមុខនេះ ៕ កែសម្រួលដោយ ៖ សុឃាក់
ចែករំលែកព័តមាននេះ